నైరుతి రుతుపవనాల రాక ఆలస్యం
Andhra Pradesh Telugu | Suryaa Desk | Published : Wed, Jun 07, 2023, 11:32 AM
ఈ ఏడాది నైరుతి రుతుపవనాల రాక ఆలస్యం అవుతుంది. మూడు నుంచి నాలుగు రోజులు ఆలస్యంగా నైరుతి రుతుపవనాలు కేరళ తీరాన్ని తాకవచ్చని విశాఖ వాతావరణ శాఖ మంగ‌ళ‌వారం ప్రకటన విడుదల చేసింది. నిజానికి కేరళ తీరాన్ని జూన్‌ 4 నాటికి రుతు పవనాలు చేరుకుంటాయని తొలుత అంచనా వేశారు. తాజా అంచనాల ప్రకారం జూన్‌ 7 నాటికి రుతు పవనాలు కేరళను తాకవచ్చని తెలుస్తోంది. ఆ తర్వాత అక్కడి నుంచి కర్ణాటక, తెలంగాణ, ఆంధ్రప్రదేశ్‌ తదితర రాష్ట్రాలకు రుతు పవనాల వ్యాప్తి కొనసాగుతుంటుంది.
దక్షిణ అరేబియా సముద్రంపై పశ్చిమాది గాలులు పెరుగుతుండడంతో, పరిస్థితులు అనుకూలంగా మారుతున్నాయి. పడమర గాలుల తీవ్రత ఆదివారం నుంచి పెరిగింది. సముద్ర ఉపరితలానికి 2. 1 కిలోమీటర్ల ఎత్తుకు జూన్‌ 4న చేరాయి. ఆగ్నేయ అరేబియా సముద్రంపైనా మేఘాల వ్యాప్తి పెరుగుతోంది. ఈ అనుకూల పరిస్థితులతో రుతుపవనాలు వచ్చే మూడు నాలుగు రోజుల్లో మరింత పురోగమిస్తాయి అని భారత వాతావరణ విభాగం ప్రకటించింది.
ఈ ఏడాది ఎల్‌నినో ప్రభావం ఉంటున్నప్పటికీ. సాధారణ వర్షాలకే ఎక్కువ అవకాశాలు ఉన్నాయని భారత వాతావరణ శాఖ ఇదివరకే ప్రకటించింది. 2022లో నైరుతి రుతు పవనాలు మే 29 కేరళ తీరాన్ని చేరగా, 2021లో జూన్‌ 3న, 2020లో జూన్‌ 1న చేరుకున్నాయి. ఈ ఏడాది ఇప్పటికే ఆలస్యమైనట్టు తెలుస్తోంది.
|
|