మణిపూర్‌లో చల్లారని మెయితీ, కుకీల హింస

మణిపూర్ రాష్ట్రం ఇంకా అట్టుడికిపోతోంది. అప్పటివరకు ఆడుతూ పాడుతూ ఉన్న కుమారుడు ఒక్కసారిగా బుల్లెట్ గాయంతో కుప్పకూలడంతో ఆ తల్లి.. తల్లడిల్లిపోయింది. పోలీసులు, భద్రతా సిబ్బంది సాయంతో 8 ఏళ్ల కుమారుడిని ఆస్పత్రికి తరలించే ప్రయత్నం చేసింది. తోడుగా ఓ బంధువును కూడా వెంటబెట్టుకుపోయింది. మార్గమధ్యలో అంబులెన్స్‌ను అడ్డగించిన నిరసనకారులు దానికి నిప్పంటించారు. దీంతో ఆ మహిళ, బాలుడు సహా బంధువు.. ముగ్గురూ సజీవ దహనం అయ్యారు. ఈ ఘోర దుర్ఘటన అల్లర్లు చెలరేగిన మణిపూర్‌లో చోటు చేసుకుంది.

మణిపూర్‌లో హింస చెలరేగడంతో అక్కడ భీకర పోరు సాగుతున్న ప్రాంతాల్లో ఉన్నవారిని అస్సాం రైఫిల్స్ ఏర్పాటు చేసిన పునరావాసానికి తరలించారు. ఇందులో భాగంగానే 8 ఏళ్ల టోన్సింగ్ హాంగ్సింగ్.. అతని తల్లి మీనా హాంగ్సింగ్.. పునరావాసానికి వెళ్లారు. మీనా హాంగ్సింగ్ మెయితీ వర్గానికి చెందిన మహిళ కాగా.. ఆమె భర్త కుకీ వర్గానికి చెందినవాడు. వీరిద్దరూ ప్రేమించి పెళ్లి చేసుకున్నారు. అయితే పునరావాస కేంద్రంలో టోన్సింగ్ చిన్నపిల్లలతో ఆడుకుంటుండగా.. ఆందోళనకారులకు చెందిన వారి దగ్గరి నుంచి ఒక్కసారిగా బుల్లెట్ వచ్చి తలలో దిగింది. దీంతో భద్రతా బలగాలు ఎదురు కాల్పులు జరిపి కాల్పులను అడ్డుకున్నారు. ఏం జరుగుతుందో తెలుసుకునేలోపే రక్తం చిమ్ముతూ పడిపోయాడు. అది గమనించిన మీనా హాంగ్సింగ్ పరుగెత్తుకొచ్చి కొడుకును చూసి రోదించింది. వెంటనే స్థానిక పోలీసులతో మాట్లాడిన భద్రతా దళాలు.. అంబులెన్స్‌ ఏర్పాటు చేశారు.

దీంతో అంబులెన్స్‌లో టోన్సింగ్‌ను ఆస్పత్రికి తరలించారు. అంబులెన్స్‌లో మీనా హాంగ్సింగ్.. ఆమె బంధువు లిడియా లౌరెంబమ్ ఎక్కారు. టోన్సింగ్‌కు మెరుగైన చికిత్స కోసం ఇంఫాల్‌లోని రిమ్స్ ఆస్పత్రి తీసుకెళ్లాలని అస్సాం రైఫిల్స్‌ అధికారులు అంబులెన్స్‌ సిబ్బందికి సూచించారు. దీంతో వేగంగా వెళ్లారు. మరికాసేపట్లో ఆస్పత్రికి చేరుకుంటారనగా.. ఇరోయ్‌సెంబా ప్రాంతంలో నిరసనకారులు అంబులెన్స్‌ను అడ్డుకుని నిప్పుపెట్టారు. క్షణాల్లో అంబులెన్స్‌ మొత్తం మంటలు వ్యాపించాయి. అందులో ఉన్న టోన్సింగ్, అతని తల్లి, బంధువు.. ముగ్గురూ సజీవ దహనమయ్యారు. ఈ ఘటనలో స్వల్పగాయాలతో అంబులెన్స్ సిబ్బంది ప్రాణాలు దక్కించుకున్నారు. ఈ ఘటన తెలిసి స్థానికులు తీవ్ర ఆవేదన వ్యక్తం చేశారు. మహిళలు, పిల్లలు అని తేడా లేకుండా ఆందోళనకారులు అత్యంత దుర్మార్గంగా వ్యవహరిస్తున్నారని మండిపడ్డారు.

కుకీ, మెయితీ తెగల మధ్య ఘర్షణతో మణిపూర్‌లో నెల రోజుల నుంచి తీవ్ర హింస చెలరేగుతోంది. కుకీ మిలిటెంట్లకు.. భద్రతా బలగాలకు మధ్య జరిగిన ఎదురు కాల్పుల్లో మంగళవారం ఒక బీఎస్‌ఎఫ్‌ జవాను దుర్మరణం చెందాడు. మరో ఇద్దరు అస్సాం రైఫిల్స్‌ జవాన్లు గాయపడ్డారు. పరిస్థితులు మరింత తీవ్రం కాకుండా మణిపూర్‌లో ఇంటర్నెట్‌ సేవలు నిలిపివేశారు. తర్వాత వాటిని ఈ నెల 10 మధ్యాహ్నం 3 గంటల వరకు పొడిగించారు. ఇన్ని రోజులుగా జరుగుతున్న హింసలో 80 మందికిపైగా మృత్యువాత పడగా.. వందలమంది గాయపడ్డారు. దాదాపు 35 వేల మందిని పునరావాస కేంద్రాలకు తరలించారు.