ఆత్మహత్యయత్నం చేసిన గుర్తుతెలియని వ్యక్తి,,,రైలు పట్టాలపైకి దూకి కాపాడిన ఆర్పీఎఫ్ కానిస్టేబుల్
national | Suryaa Desk | Published : Fri, Jun 09, 2023, 10:40 PM
తాజాగా ఓ వీడియో సోషల్ మీడియాలో వైరల్ గా మారింది. పట్టాలపై పడుకుని ఆత్మహత్య చేసుకోవడానికి ప్రయత్నించిన ఓ వ్యక్తిని చివరి క్షణాల్లో ఆర్పీఎఫ్ మహిళా కానిస్టేబుల్ కాపాడింది. ఈ ఘటన పశ్చిమ్ బెంగాల్‌లోని పూర్వ మేదినీపూర్ రైల్వే స్టేషన్‌లో చోటుచేసుకుంది. దీనికి సంబంధించిన దృశ్యాలు సీసీటీవీ‌లో రికార్డు కాగా.. ఈ వీడియోను ఆర్పీఎఫ్ తన అధికారిక ట్విట్టర్ ఖాతాలో షేర్ చేసింది. దీంతో వీడియో వైరల్‌గా మారింది. గుర్తు తెలియని ఓ వ్యక్తి మేదినీపూర్ రైల్వే స్టేషన్‌కు చేరుకొని, ఓ రైలు రావడాన్ని గమనించి వెంటనే పట్టాల పైకి వెళ్లడం.. రైలు వచ్చే మార్గంలో పట్టాలపై పడుకున్నట్లుగా వీడియోలో కనిపిస్తోంది.
దీనికి సమీపంలోని ప్లాట్‌ఫాంపై విధులు నిర్వహిస్తున్న ఆర్బీఎఫ్ కానిస్టేబుల్ సుమతి దీనిని గమనించింది. వెంటనే కిందకు దిగి వచ్చి.. పట్టాలపై నుంచి అతడిని అమాంతం వెనక్కి లాగేసింది. అటుగా రైలు రావడానికి కొద్ది క్షణాల ముందే ఇది జరిగింది. ఆమె పట్టాలపై లాగిన మరుక్షణమే రైలు దూసుకుపోయింది. మరో ఇద్దరి సాయంతో అతడిని ఆర్పీఎఫ్ కానిస్టేబుల్ ప్లాట్‌ఫాం పైకి తీసుకొచ్చింది. సమయస్ఫూర్తితో వ్యవహరించి.. అతడ్ని కాపాడటానికి సాహసించిన కానిస్టేబుల్ సుమతిపై ప్రశంసలు కురుస్తున్నాయి.
ఇందుకు సంబంధించిన వీడియోను ఆర్పీఎఫ్ ఇండియా ట్వీట్ చేసింది. ప్రయాణికుల భద్రత విషయంలో ఆమె నిబద్ధతకు ఇది నిదర్శనమని వ్యాఖ్యానించింది. ఈ వీడియోను చూసిన నెటిజన్లు కానిస్టేబుల్ సుమతి చూపిన తెగువకు ఫిదా అవుతున్నారు. ఆమె పొగడ్తల్లో ముంచెత్తుతున్నారు.
|
|