రెజ్లర్లకు లైంగిక వేధింపుల కేసు కీలక పరిణామం..... బ్రిజ్‌ భూషణ్‌ శరణ్‌ సింగ్‌పై ధర్యాప్తు ప్రారంభించిన పోలీసులు

రెజ్లర్లకు లైంగిక వేధింపుల కేసు కీలక దశకు చేరుకొంటోందా. ఈ కేసులో ప్రధానంగా ఆరోపణలు ఎదుర్కొంటున్న రెజ్లింగ్ ఫెడరేషన్ ఆఫ్ ఇండియా మాజీ అధ్యక్షుడు, బీజేపీ ఎంపీ బ్రిజ్‌ భూషణ్‌ శరణ్‌ సింగ్‌పై పోలీసులు దర్యాప్తు ప్రారంభించారు. ఈ క్రమంలోనే శుక్రవారం బ్రిజ్ భూషణ్ ఇంటికి ఢిల్లీ పోలీసులు వెళ్లినట్లు మీడియాల్లో వార్తలు వచ్చాయి.

ఈ కేసులో ఆరోపణలు చేస్తున్న రెజ్లర్లలో ఒకరైన సంగీతా ఫోగాట్‌ను బ్రిజ్ భూషణ్‌ ఇంటికి ఢిల్లీ పోలీసులు తీసుకెళ్లారు. ఈ క్రమంలోనే బ్రిజ్ భూషణ్ ఇంటివద్ద.. లైంగిక ఆరోపణలకు సంబంధించి సీన్ రీ క్రియేషన్ చేసినట్లు తెలుస్తోంది. ఈ సమయంలో సంగీతా ఫోగాట్ వెంట మహిళా పోలీసులు ఉన్నట్లు సమాచారం. శుక్రవారం మధ్యాహ్నం ఒకటిన్నరకు ఈ సంఘటన జరిగినట్లు తెలుస్తోంది. మధ్యాహ్నం 2 గంటల వరకు పోలీసులు అక్కడే ఉన్నట్లు సమాచారం. బ్రిజ్ భూషణ్ నివాసంలో ఎక్కడెక్కడ వేధింపులకు గురి చేశాడో గుర్తుకు తెచ్చుకుని చెప్పాలని ఢిల్లీ పోలీసులు సంగీతా ఫోగాట్‌కు సూచించారు.

అయితే పోలీసులు తన ఇంటికి వచ్చి సీన్ రీ క్రియేషన్ చేశారని వస్తున్న వార్తలను డబ్లూఎఫ్ఐ మాజీ అధ్యక్షుడు బ్రిజ్ భూషణ్ ఖండించారు. అలాంటిదేమీ జరగలేదని స్పష్టం చేశారు. తనపై రెజ్లర్లు అనవసరంగా అసత్య ఆరోపణలు చేస్తున్నారని బ్రిజ్ భూషణ్ అన్నారు. తాను రెజ్లర్లను లైంగికంగా వేధించినట్లు ఆరోపణలు నిజమైతే ఉరి వేసుకుంటానని ఇప్పటికే పలు మార్లు బ్రిజ్ భూషణ్ వెల్లడించారు.

రెజ్లర్లు చేస్తున్న లైంగిక ఆరోపణల ఫిర్యాదుతో బ్రిజ్‌ భూషణ్‌పై ఢిల్లీ పోలీసులు రెండు ఎఫ్‌ఐఆర్‌లు నమోదు చేశారు. ఈ రెండు ఎఫ్‌ఐఆర్‌లపై ప్రత్యేక దర్యాప్తు బృందం - సిట్‌ విచారణ చేస్తోంది. ఇందులో భాగంగా ఇప్పటివరకు 180 మందికి పైగా విచారణ జరిపారు. దీనికి సంబంధించిన దర్యాప్తును వచ్చే వారం రోజుల్లోగా పూర్తి చేసి కోర్టుకు నివేదిక సమర్పిస్తామని సిట్‌ అధికారులు తెలిపారు.

ఈ కేసులో కీలక పరిణామం చోటు చేసుకుంది. బ్రిజ్‌భూషణ్‌పై తాము ఉద్దేశపూర్వకంగా తప్పుడు కేసు పెట్టామని ఆరోపణలు చేసిన మైనర్‌ రెజ్లర్‌ తండ్రి అంగీకరించారు. గతేడాది భారత జట్టుకు తన కుమార్తె ఎంపిక కాకపోవడంతోనే లైంగిక వేధింపుల ఆరోపణలు చేసినట్లు గురువారం చెప్పడం సంచలనంగా మారింది. కోర్టులో నిజం బయటకు వచ్చేంత వరకు ఆగకుండా ఇప్పుడే చెబుతున్నట్లు తెలిపారు.

డబ్లూఎఫ్ఐ మాజీ చీఫ్ బ్రిజ్‌ భూషణ్‌కు వ్యతిరేకంగా రెజర్లు ఢిల్లీలోని జంతర్‌మంతర్‌ వద్ద నెల రోజులకు పైగా పెద్ద ఎత్తున నిరసన ప్రదర్శనలు చేపట్టారు. రెజ్లర్ల ఆందోళనలు తీవ్రమవడంతో కేంద్ర క్రీడల శాఖ మంత్రి అనురాగ్‌ ఠాకూర్‌ స్పందించారు. రెజ్లర్లతో చర్చలు చేశారు. బ్రిజ్‌ భూషణ్‌పై జూన్ 15 లోగా ఛార్జ్‌షీట్‌ దాఖలు చేస్తామని చెప్పారు. అదే విధంగా జూన్‌ 30 లోపు రెజ్లింగ్ ఫెడరేషన్ ఆఫ్ ఇండియాకు ఎన్నికలు నిర్వహిస్తామని హామీ ఇవ్వడంతో.. రెజ్లర్లు ఉద్యమాన్ని తాత్కాలికంగా విరమించారు.