వాహనాల ట్రాఫిక్ చలాన్లను రద్దు చేసిన యూపీ రాష్ట్ర ప్రభుత్వం

రాష్ట్రంలో ఉన్న అన్ని వాహనాలపై ఉన్న ట్రాఫిక్ చలాన్లను రద్దు చేస్తూ ఉత్తర్‌ప్రదేశ్‌లోని యోగి ఆదిత్యనాథ్ సర్కార్ సంచలన నిర్ణయం తీసుకుంది. ఈ మేరకు  సర్కార్ ఉత్తర్వులు జారీ చేసింది. 5 ఏళ్లలో ఉత్తర్‌ప్రదేశ్‌లోని వాహనాలపై నమోదైన ట్రాఫిక్ చలాన్లను రద్దు చేస్తున్నట్లు ప్రకటించింది. దీంతో లక్షలాది మంది వాహనదారులకు భారీ ఊరట కలిగింది. ఈ మేరకు ఉత్తర్‌ప్రదేశ్ సర్కార్ జీవో విడుదల చేసింది. వాహనదారులు ఎవరూ భయపడకుండా వెబ్‌సైట్‌లో వాహనం నంబరు ఆధారంగా వివరాలు చెక్ చేసుకోవచ్చని వివరించారు.

నిర్ణీత సమయంలో వాహనాలపై నమోదైన ట్రాఫిక్ చలాన్లను మాత్రమే రద్దు చేస్తున్నట్లు వెల్లడించింది. 2017 జనవరి 1 నుంచి 2021 డిసెంబరు 31 వరకు ఉత్తర్‌ప్రదేశ్‌లోని అన్ని రకాల ప్రైవేటు, కమర్షియల్ వాహనాలపై విధించిన ట్రాఫిక్ చలాన్లు అన్నింటిని రద్దు చేస్తున్నట్లు యోగి సర్కార్ ప్రకటించింది. ఈ మేరకు 2 వ నంబరు జీవో జూన్ 2023 ను విడుదల చేసింది. ఈ కాలంలో చలాన్లు నమోదై కోర్టులో కేసులు ఉన్న వాహనాలపైనా ఈ ఉత్తర్వులు వర్తిస్తాయని పేర్కొంది. వాహనాలపై ఉన్న ట్రాఫిక్ చలాన్లను రద్దు చేయాలని ఇటీవల నోయిడాలోని రైతులు రోడ్లపైకి వచ్చి నిరసనలు వ్యక్తం చేయడం గమనార్హం.

యోగి ప్రభుత్వం తీసుకున్న నిర్ణయానికి అనుగుణంగా అధికారులు చర్యలు చేపట్టారు. ఉత్తర్‌ప్రదేశ్ రాష్ట్ర ట్రాన్స్‌పోర్టు కమిషనర్ చంద్ర భూషణ్ సింగ్.. ఈ మేరకు అందరు రీజినల్ ట్రాన్స్‌పోర్టు అధికారులకు ఆదేశాలు జారీ చేశారు. కేసుల జాబితాను కోర్టు ఇచ్చిన తర్వాత.. ట్రాన్స్‌పోర్టు పోర్టల్ నుంచి అన్ని చలాన్లను తొలగించాలని సూచించారు. ఉత్తర్‌ప్రదేశ్ తీసుకున్న నిర్ణయంతో ఆ రాష్ట్రంలో ఉన్న ప్రైవేటు, కమర్షియల్ వాహనదారులకు భారీ ఊరట దక్కింది. యోగి ఆదిత్యనాథ్ తీసుకున్న ఈ నిర్ణయంపై లక్షల మంది వాహనదారులు హర్షం వ్యక్తం చేశారు.

యోగి సర్కార్ తీసుకున్న ఈ నిర్ణయంతో చలాన్లకు సంబంధించిన కోట్ల రూపాయల పెండింగ్ బిల్లులు మాఫీ అయ్యాయి. వాహనదారులకు ఎవరికీ చలాన్లు కట్టాలన్న భయం ఉండొద్దని అధికారులు సూచించారు. ఇంట్లోనే కూర్చొని ఆన్‌లైన్‌లో దరఖాస్తును నింపితే సరిపోతుందని పేర్కొన్నారు. దీనికి సంబంధించిన పూర్తి సమాచారం ఉత్తర్‌ప్రదేశ్ ట్రాఫిక్ పోలీస్ అధికారిక వెబ్‌సైట్‌లో ఉంటుందని తెలిపారు. కేవలం వాహనం నంబరు ఆధారంగా చలాన్ల సమాచారం తెలుసుకోవచ్చని వివరించారు. ఒకవేళ ఏదైనా వాహనంపై తప్పుడు చలాన్లు విధించినట్లు డ్రైవర్లు గుర్తిస్తే.. నేరుగా వెబ్‌సైట్‌లో ఫిర్యాదు చేయవచ్చని చెప్పారు. వాహనంపై ఉన్న చలాన్లు రద్దు అయిపోయిన తర్వాత ఆ వాహనదారుడి మొబైల్ నంబరుకు మెసేజ్ వస్తుందని తెలిపారు.