ఉబర్, ర్యాపిడోలకు సుప్రీంకోర్ట్ షాక్

దేశ రాజధాని ఢిల్లీలో ర్యాపిడో, ఉబర్‌‌లకు ఊహించని షాక్ తగిలింది. ఢిల్లీ ప్రభుత్వం తుది విధానం రూపొందించేవరకు బైక్‌-ట్యాక్సీలను నడుపుకోవడానికి ఉబర్, ర్యాపిడో సంస్థలను అనుమతిస్తూ గత నెల 26న ఢిల్లీ హైకోర్టు ఇచ్చిన ఉత్తర్వులపై సోమవారం సుప్రీంకోర్టు స్టే విధించింది. జులై చివరి నాటికి కొత్త విధానాన్ని తీసుకొస్తామన్న ఆప్‌ ప్రభుత్వ వాదనను జస్టిస్‌ అనిరుద్ధ బోస్‌, జస్టిస్‌ రాజేశ్‌ బిందల్‌ ధర్మాసనం పరిగణనలోకి తీసుకుంది. ర్యాపిడో, ఉబెర్‌లు మోటార్‌ వాహనాల చట్టం-1988ను ఉల్లంఘిస్తున్నాయని పేర్కొంటూ..ఢిల్లీ ప్రభుత్వం గత ఫిబ్రవరిలో బైక్‌-ట్యాక్సీ సేవలను నిషేధించిన విషయం తెలిసిందే.

దీనిపై ఉబర్, ర్యాపిడోలు ఢిల్లీ హైకోర్టును ఆశ్రయించగా.. వారికి అనుకూలంగా ఉత్తర్వులు వెలువరించింది. ఈ ఉత్తర్వులను కేజ్రీవాల్ సర్కారు సుప్రీంకోర్టులో సవాల్ చేసింది. దీనిపై విచారణ చేపట్టిన జస్టిస్‌ అనిరుద్ధ బోస్‌, జస్టిస్‌ రాజేశ్‌ బిందల్‌ ధర్మాసనం.. ఉత్తర్వులను పక్కనబెట్టింది. ‘మా అభిప్రాయం ప్రకారం కొత్త విధానం ఖరారు చేసే వరకు చట్టబద్ధమైన పాలన మొత్తం-స్థాయి కార్యకలాపాలను నిలిపివేసే మధ్యంతర ఉత్తర్వు అసంబద్ధం’ అని ఢిల్లీ హైకోర్టు ఉత్తర్వులపై స్టే విధించింది.

ర్యాపిడో, ఉబెర్ లేవనెత్తిన వాదనల మెరిట్‌లను ధర్మాసనం తన ఉత్తర్వుల్లో పేర్కొంది. ముందస్తు విచారణ కోసం ఢిల్లీ హైకోర్టును ఆశ్రయించేందుకు ధర్మాసనం పార్టీలకు స్వేచ్ఛ ఇచ్చింది.ఢిల్లీ ప్రభుత్వం ఫిబ్రవరిలో మోటారు వాహనాల చట్ట, 1988 ప్రకారం రాజధానిలో అన్ని బైక్-టాక్సీ సేవలను ఢిల్లీ ప్రభుత్వం నిషేధించింది. నిబంధనలను ఉల్లంఘించిన రైడర్‌లకు రూ.10,000 వరకు జరిమానా విధిస్తామని, లైసెన్స్ కూడా మూడేళ్ల పాటు రద్దు చేస్తామని హెచ్చరించింది.