ఫ్లాట్ నుంచి లుంగీ, నైటీతో రావద్దు.... నొయిడాలోని ఓ హౌసింగ్ సొసైటీ డ్రస్ కోడ్

తమ అపార్ట్‌మెంట్‌ ఫ్లాట్స్‌లో నివాసం ఉండేవారు లుంగీలు, నైటీలతో బయటకు రావద్దని, పార్కింగ్ ప్రదేశాల్లో తిరగొద్దని ఓ హౌసింగ్ వెల్ఫేర్ సొసైటీ డ్రస్ కోడ్ తీసుకొచ్చింది. గ్రేటర్ నొయిడాలోని హిమ్‌సాగర్ అపార్ట్‌మెంట్ జూన్ 10 జారీ చేసిన ఉత్తర్వులు ప్రస్తుతం సోషల్ మీడియాలో వైరల్ అవుతున్నాయి. ఫ్లాట్స్ నుంచి బయటకు వచ్చేటప్పుడు పురుషులు లుంగీ, మహిళలు నైటీలు వేసుకోవద్దని ఉత్తర్వుల్లో పేర్కొంది. దీనిపై ప్రస్తుతం నెటిజన్లు భిన్నంగా స్పందిస్తున్నారు. జనం ఎలాంటి బట్టలు వేసుకోవాలో వారి వ్యక్తిగత విషయమని కొందరు మండిపడుతుంటే.. మరి కొందరు మాత్రం మంచి నిర్ణయమేనని సమర్దిస్తున్నారు.

‘సొసైటీ ప్రాంగణంలో వాకింగ్ డ్రస్ కోడ్’ పేరుతో గ్రేటర్ నొయిడా ఫేజ్-2లో హిమ్‌‌సాగర్ హౌసింగ్ సొసైటీ ఉత్తర్వులు జారీచేసింది. ‘మీరు హౌసింగ్ సొసైటీ పరిసరాల్లో ఎప్పుడైనా తిరుగుతున్నప్పుడు మీ ప్రవర్తనపై ఎవరైనా అభ్యంతరం చెప్పే అవకాశం లేకుండా వస్త్రధారణపై ప్రత్యేక శ్రద్ధ వహించాలి.. అందుకే ఎవరూ ఇంటి దుస్తులైన లుంగీ, నైటీ ధరించి తిరగవద్దని అభ్యర్థిస్తున్నాం’ అని పేర్కొంది. ఈ చర్యను కొందరు ప్రశంసించగా, మరికొందరు విమర్శిస్తున్నారు.

‘బహిరంగ ప్రదేశాలలో నడవడానికి నైటీలు, లుంగీలు సరైనవి కాదు... వీటిని పాతకాలం నాటివి పరిగణిస్తున్నారు.. అయితే వస్త్రధారణ విషయం కొన్ని పద్దతులు అనుసరించాలి’ అని ఓ నెటిజన్ కామెంట్ చేశాడు. ‘వీటితోపాటు కార్టూన్ ప్రింటెడ్ బాక్సర్ షార్ట్‌లు, ప్రింటెడ్ నైట్ సూట్‌లు, స్పోర్ట్స్‌వేర్‌ను కూడా నిషేధించాల్సిన అవసరం ఉంది’ అని మరొకరు వ్యాఖ్యానించారు. అయితే, ఇది ఖాప్ పంచాయతీ మాదిరిగా ఉందని మరో నెటిజన్ మండిపడ్డాడు. భావ వ్యక్తీకరణ స్వేచ్ఛలో దుస్తులకు చోటు లేదా? అని ఒకరు.. మనది విచిత్రమైన ప్రాధాన్యతలతో కూడిన సమాజం అని ఇంకొకరు ఇలా కామెంట్లు చేశారు.