శ్రీవాణి ట్రస్టు నిధులపై ,,,శ్వేతపత్రం విడుదల చేసిన టీటీడీ

టీటీడీ సాహసోపేత కార్యక్రమం చేపట్టింది. తిరుమల శ్రీవాణి ట్రస్ట్‌పై శ్వేతపత్రం విడుదల చేసింది టీటీడీ. దళారీ వ్యవస్థను రూపు మాపేందుకు శ్రీవాణి ట్రస్ట్ ఏర్పాటు చేశామన్నారు టీటీడీ ఛైర్మన్ వైవీ సుబ్బారెడ్డి. మొత్తం 70మంది దళారులను పట్టుకున్నామని.. మరో 214 కేసులు నమోదు చేశామన్నారు. స్వామివారికి విరాళం ఇస్తే రాజమార్గం ద్వారా దర్శనం ఏర్పాటు చేయాలనీ టీటీడీ భావించిందన్నారు. ఆలయాలు నిర్మించాలని 2018లోనే శ్రీవాణి ట్రస్ట్ రిజిస్ట్రేషన్ చేశారని.. వైఎస్సార్‌సీపీ ప్రభుత్వం అధికారం చేపట్టిన అనంతరం ట్రస్ట్‌ను ప్రారంభించామన్నారు. శ్రీవాణి ట్రస్ట్ ద్వారా ఆలయాలు., భజన మందిరాలు., శిధిలావస్థలో ఉన్న ఆలయాల పునఃనిర్మాణానికి నిధులు కేటాయిస్తున్నామన్నారు.

టీటీడీ పాలకమండలిలో చర్చించి.. భక్తుల అభిప్రాయం తెలుసుకొని శ్రీవాణిని ప్రారంభించామన్నారు. 2019 సెప్టెంబర్ 23 నాడు శ్రీవెంకటేశ్వర ఆలయ నిర్మాణ ట్రస్ట్ ప్రివిలేజ్ బ్రేక్ దర్శనం ఇవ్వడం జరిగిందన్నారు. రూ.10 వేల రూపాయలు చెల్లించిన భక్తుడికి శ్రీవారి దర్శన సదుపాయం కల్పించామన్నారు. శ్రీవాణి ద్వారా వచ్చే నగదు వివిధ బ్యాంకులలో ఫిక్సెడ్ డిపాజిట్స్ చేస్తున్నామని.. మొదట డొనేషన్ కు రూ. 10 వేలకు, రెండవది దర్శనం కోసం రూ.500 కు రసీదు ఇస్తున్నామన్నారు. వివిధ పార్టీలు చేస్తున్న ఆరోపణలు అవాస్తమని.. భక్తుడు చెల్లిస్తున్న ప్రతి రూపాయికి రసీదు ఇస్తున్నామన్నారు.

డబ్బులు తీసుకుపోయే ధైర్యం, అధికారం తమకు లేదని.. అలా తీసుకెళ్లిన శ్రీ వేంకటేశ్వరుడు వదలడన్నారు. ఏ ప్రభుత్వం ఆలోచించని విధంగా సామాన్య భక్తుల కొరకు ఎన్నో కార్యక్రమాలు చేపట్టామని.. మే 31 2023 వరకు రూ. 861 కోట్లు శ్రీవాణి ట్రస్టుకు భక్తులు విరాళం అందించారన్నారు. రూ. 602 కోట్ల రూపాయలు ఫిక్స్‌డ్ డిపాజిట్స్ వేశామని.. రూ. 120 కోట్ల రూపాయలను వివిధ కార్యక్రమాలకు వినియోగించామన్నారు. శ్రీవాణి ట్రస్ట్ ఏర్పాటు చేసిన కార్యక్రమాలకు మాత్రమే వినియోగిస్తున్నామని.. వివిధ రాష్ట్రాల్లో సుమారుగా 127 ప్రాచీన ఆలయాలు పునఃనిర్మాణానికి ఖర్చుపెట్టామన్నారు.

ఇందులో కొన్ని పూర్తి చేశామని.. మరికొన్ని చివరి దశకు చేరుకుందన్నారు. సేవింగ్స్ ఖాతాలో 139 కోట్ల నిధులు ఉన్నాయని.. శ్రీవాణి ట్రస్టు నిధుల డిపాజిట్లు ద్వారా 36.50 కోట్ల వడ్డీ వచ్చిందన్నారు. ఇప్పటి వరకు 8లక్షల మందికీ పైగా భక్తులు శ్రీవాణి ట్రస్టు ద్వారా స్వామి వారిని దర్శించుకున్నారన్నారు. భక్తులు ఎవరు టీటీడీపై ఆరోపణలు చెయ్యలేదని.. శ్రీవాణి ట్రస్టు ద్వారా దర్శనానికి వెళితే రసీదులు ఇవ్వలేదంటూ మాజీ మంత్రి బండారు సత్యనారాయణ టీటీడీపై ఆరోపణలు చేశారన్నారు. ఆయన ఎప్పుడు దర్శనానికి వచ్చారో చెబితే పరిశీలించి రసీదులు ఇస్తామన్నారు. ఆధారాలు లేకుండా రాజకీయ పరంగా నిరాధారమైన ఆరోపణలు చెయ్యడం తగదని.. భక్తుల మనోభావాలు దెబ్బతిన్నెలా ఆరోపణలు చేస్తే చట్ట పరంగా చర్యలు తీసుకుంటామని హెచ్చరించారు. శ్రీవాణి ట్రస్ట్ నిధులపై ఎటువంటి అనుమానాలు ఉన్నా నేరుగా టీటీడీని సంప్రదించవచ్చని.. ఇలాంటి అనవసర ఆరోపణలు చేయడం రాజకీయ నాయకులు మానుకోవాలన్నారు.

టీటీడీ పరిపాలన పూర్తి పారదర్శకంగా నడుస్తోందన్నారు. ఇందులో భాగంగా ఇప్పటికే టీటీడీ ఆస్తులు, ఫిక్స్‌డ్‌ డిపాజిట్లు, బంగారం డిపాజిట్లపై శ్వేతపత్రం విడుదల చేశామని ఛైర్మన్‌ చెప్పారు. ప్రస్తుతం శ్రీవాణి ట్రస్ట్‌ నిధుల వినియోగంపై శ్వేతపత్రాన్ని విడుదల చేశామన్నారు. శ్రీవాణి నిధుల వినియోగంపై సందేహాలను నివృత్తి చేసేందుకు తాము సిద్ధంగా ఉన్నామని.. నిధులు దుర్వినియోగం అవుతున్నాయని కొందరు స్వార్థ ప్రయోజనాల కోసం చేస్తున్న నిరాధార ఆరోపణలను నమ్మవద్దని భక్తులకు విజ్ఞప్తి చేశారు. ఈ నిధులను పురాతన ఆలయాల పునరుద్ధరణ, నూతన ఆలయాల నిర్మాణాలకు వినియోగిస్తున్నామని పునరుద్ఘాటించారు.