శ్రీకాకుళం జిల్లాలో గంజాయి కలకలం,,,భారీగా గంజాయి, నల్లమందు సీజ్

ఆంధ్రప్రదేశ్ రాష్ట్రంలోని శ్రీకాకుళం జిల్లాలో గంజాయి కలకలంరేపింది. ఇచ్ఛాపురం పరిధి పురుషోత్తపురం తనిఖీ కేంద్రం దగ్గర స్పెషల్‌ ఎన్‌ఫోర్స్‌మెంట్‌ బ్యూరో అధికారులు, సిబ్బంది నిర్వహించిన తనిఖీల్లో ఇద్దరు మహిళల నుంచి 100 కిలోల గంజాయి, కిలో నల్ల మందును సీజ్ చేశారు. పురుషోత్తపురం గేట్‌ పరిధిలో బడ్డీలు, చిన్న,చిన్న షాపుల దగ్గర గంజాయి విక్రయాలు జరుగుతున్నట్లు అనుమానం వచ్చి సెబ్‌ అధికారులు దాడులు నిర్వహించారు. ఆ సమయంలో ధనలక్ష్మి, సోదమ్మ అనే మహిళల బడ్డీ షాపుల్లో 13 కిలోల గంజాయి లభ్యమైందన్నారు. వారి ఇళ్లను తనిఖీ చేసి.. మరో 87 కిలోలు గంజాయి, కిలో నల్లమందు స్వాధీనం చేసుకున్నారు.

ఈ గంజాయిని ఒడిశా నుంచి తీసుకొచ్చి చిన్న, చిన్న పొట్లాలు కట్టి లారీ డ్రైవర్లు, క్లీనర్లకు విక్రయిస్తున్నారని గుర్తించారు. పోలీసులకు దొరక్కుండా పాన్‌మసాలా మాదిరిగా పొట్లాలు కట్టి గంజాయి విక్రయిస్తున్నారు. ఆ తర్వాత షాపుల వెనుకభాగంలో తనిఖీలు చేయగా.. నిల్వ ఉంచిన గంజాయి, నల్లమందు దొరికింది. ఈ దందా వెనుక ఇంకా ఎవరున్నారనే దానిపై దర్యాప్తు చేస్తున్నారు. యువత మాదక ద్రవ్యాల బారిన పడకుండా జాగ్రత్తలు తీసుకోవాలని ఎస్పీ రాధిక తెలిపారు. మత్తు రహిత జిల్లాగా తీర్చిదిద్దేందుకు కృషి చేస్తున్నామన్నారు.

2019 నుంచి ఇప్పటి వరకు జిల్లాలో నిర్వహించిన దాడుల్లో 12 వేల కిలోలకుపైగా గంజాయి స్వాధీనం చేసుకున్నామని తెలిపారు. 241 మందిని అరెస్టు చేశామని.. మేజిస్ట్రేట్‌ అనుమతితో స్వాధీనం చేసుకున్న గంజాయిని ధ్వంసం చేశామన్నారు. గంజాయి రవాణా, అమ్మకాలు, వినియోగంపై ఉక్కుపాదం మోపుతామని.. పోలీసు, సెబ్‌ బృందాలు సంయుక్తంగా దాడులు చేస్తున్నాయన్నారు. అలాగే సచివాలయ మహిళా పోలీసులు, ఇతరుల సహకారం తీసుకుంటున్నామన్నారు. ప్రజలు కూడా తమకు సహకరించాలని.. ఏదైనా సమాచారం ఉంటే పోలీసులకు ఇవ్వాలని కోరారు. విద్యార్థులు, యువత మత్తు పదార్థాల జోలికి వెళ్లి జీవితాలు నాశనం చేసుకోవద్దన్నారు.