జగనన్న సురక్ష కార్యక్రమం ,,,జులై 1 నుంచి ప్రత్యేక క్యాంపులు షురూ

ఏపీలోని వైసీపీ సర్కార్ మరోకొత్త కార్యక్రమానికి శ్రీకారం చుట్టనున్నది. ఈ క్రమంలో భాగంగా ఆంధ్రప్రదేశ్ ముఖ్యమంత్రి వైఎస్ జగన్ 'జగనన్న సురక్ష' కార్యక్రమాన్ని ప్రారంభించారు. సంక్షేమ పథకాలు, ప్రజా సమస్యలు సంతృప్త స్థాయిలో పరిష్కారమే లక్ష్యంగా.. నెలరోజుల పాటు ఈ కార్యక్రమం నిర్వహించనున్నారు. శనివారం నుంచి గృహాల సందర్శించి రాష్ట్రవ్యాప్తంగా 1.6 కోట్ల కుటుంబాలతో మమేకం కానున్నారు. రాష్ట్రవ్యాప్తంగా 15,004 సురక్ష క్యాంపుల నిర్వహిస్తున్నారు.. అలాగే‘1902’తో హెల్ప్‌ డెస్క్‌ కూడా ఏర్పాటు చేశారు. అర్హులై ఉండి ఏ ఒక్కరూ లబ్ధి అందకుండా మిగిలిపోకూడదన్న తపనతో ఇంట్లో ఏ చిన్న సమస్య ఉన్నా దానిని పరిష్కరించాలన్న చిత్తశుద్ధితో జగనన్నకు చెబుదాం కార్యక్రమాన్ని మరింత ముందుకు తీసుకెళ్తూ జగనన్న సురక్ష ప్రారంభించారు.

అలాగే ఈ ప్రత్యేక క్యాంపుల ద్వారా సర్టిఫికెట్లు (జనన, మరణ, కుల, సీసీఆర్సీ, రేషన్‌ కార్డు డివిజ­న్, హౌస్‌ హోల్డ్‌ డివిజన్, ఆదాయం) మొదలైన 11 రకాల ధ్రువీకరణపత్రాలు సర్వీస్‌ ఛార్జ్ లేకుండా ఉచితంగా అందించనున్నారు. వాలంటీర్లు, సచివాలయ సిబ్బంది, ప్రజా ప్రతినిధులతో కూడిన టీమ్‌ రాష్ట్రంలో ఉన్న ప్రతి ఇంటినీ సందర్శిస్తుంది. అర్హులై ఉండి ఎక్కడైనా లబ్ధి అందని వారుంటే వారిని గుర్తించి సమస్య పరిష్కారానికి కావల్సిన పత్రాలు సేకరిస్తారు.ఈ దరఖాస్తులను సచివాలయానికి తీసుకెళ్లి వాటిని అక్కడ సమర్పించి, టోకెన్‌ నంబర్, సర్వీస్‌ రిక్వెస్ట్‌ నంబరు తీసుకుని వాటిని తిరిగి ఇంటి వద్దకే వెళ్లి అందజేస్తారు.

దేవుడి దయతో ఇవాళ మరో మంచి కార్యక్రమానికి శ్రీకారం చుడుతున్నామన్నారు సీఎం జగన్. జగనన్న సురక్షా కార్యక్రమంలో నేరుగా ప్రజల వద్దకు వెళ్తామని.. నోరు తెరిచి అడగలేని, పొరపాటున ఎక్కడైనా, ఎవరైనా పథకాలు పొందకుండా మిగిలిపోయి ఉంటే ఆ అర్హులకు కూడా మంచి చేసే కార్యక్రమే జగనన్న సురక్ష కార్యక్రమం అని వివరించారు. అర్హులైన ఉండి ఏ ఒక్కరూ కూడా పలానా సేవలు కాని, పలానా లబ్ధి కాని అందలేదు అని చెప్పే అవకాశం ఉండకూడదన్నారు. జల్లెడ పట్టి మరీ అర్హులను గుర్తించి పథకాలే కాదు వారికి కావల్సిన డాక్యుమెంటేషన్లుకూడా ఇస్తారన్నారు.

నాలుగేళ్ల క్రితం రాష్ట్రంలో పరిస్థితులను చూడాలని.. ఏ గ్రామాన్ని తీసుకున్నా, ఏ వార్డును తీసుకున్నా, ఏ పట్టణాన్ని తీసుకున్నా.. ఏ పని కావాలన్నా ప్రభుత్వ కార్యాలయాలచుట్టూ, ప్రభుత్వ అధికారుల చుట్టూ, జన్మభూమి కమిటీల చుట్టూ తిరిగి లంచాలు ఇచ్చుకునే పరిస్థితి ఉండేదన్నారు. నాలుగేళ్లలో పరిస్థితిని పూర్తిగా మార్చేశామని.. ఏం కావాలన్నా ఇంటికే తీసుకువచ్చే గొప్ప వాలంటీర్‌ వ్యవస్థను తీసుకు వచ్చామన్నారు. గ్రామ, వార్డు సచివాలయాల ద్వారా అధికారంలోకి వచ్చిన ఆరు నెలల్లోపే దీన్ని తీసుకు వచ్చామని గుర్తు చేశారు. ఎక్కడా ఒక్క రూపాయికూడా లంచం ఇవ్వాల్సిన అవసరం లేకుండా, వివక్షకు తావు లేకుండా పారదర్శక పౌరసేవలు అందించడం ఈ ప్రభుత్వంలోనే ప్రారంభమైందన్నారు.

నవరత్నాల ద్వారా ఈ నాలుగేళ్లలో అక్షరాల రూ. 2.16 లక్షల కోట్లు బటన్‌ నొక్కి ఖాతాల్లోకి అత్యంత పారదర్శకంగా, వివక్ష లేకుండా, అవినీతి లేకుండా డీబీటీ ద్వారా జమచేశామన్నారు. ఇంకా అర్హులెవ్వరూ మిగిలిపోకూడదనే తపనతో జగనన్న సురక్ష కార్యక్రమాన్ని చేపట్టామన్నారు. ఆదాయం, కులం, బర్త్‌, కొత్త రేషన్‌ కార్డులు, సీసీఆర్సీ కార్డులు, ఆధార్‌ కు బ్యాంక్‌ లింకేజి, ఆధార్‌ కార్డుల్లో మార్పులు వంటి సేవలు అందిస్తారన్నారు. జులై 1 నుంచి కూడా ఈ క్యాంపులను నిర్వహిస్తారని.. ఎలాంటి ఛార్జీలు లేకుండానే ఈ సేవలు అందిస్తారన్నారు. దేశ చరిత్రలో ఎక్కడా, ఎప్పుడూ చూడని విధంగా పేదల పట్ల ఇంతగా ప్రేమ చూపిస్తున్న ప్రభుత్వం అన్నారు.