విశాఖ ఎంపీ ఫ్యామిలికీ భద్రత పెంపు,,,,కిడ్నాప్ ఐదుగుర్ని అరెస్ట్ చేశారు

విశాఖలో ఎంపీ ఫ్యామిలీ కిడ్నాప్ ఎపిసోడ్‌తో మరింత అలర్ట్ అయ్యారు. ముందస్తు జాగ్రత్తగా ఎంపీ ఎంవీవీ సత్యనారాయణతో పాటూ కుటుంబానికి, ఆడిటర్ జీవీ (గన్నమనేని వెంకటేశ్వరరావు)కి భద్రత పెంచారు. ఈ మేరకు ప్రభుత్వం నిర్ణయం తీసుకుంది. ఎంపీకి టూ ప్లస్‌ టూ, అతని కుటుంబ సభ్యులతో పాటు జీవీకి వన్‌ ప్లస్‌ వన్‌ భద్రతా సిబ్బందిని కేటాయించారు. అంతేకాదు ఈ కిడ్నాప్ కేసులో మరో ఐదుగురు నిందితులను పోలీసులు అరెస్ట్‌ చేశారు.

తాజాగా సాయి, బాలాజీలను ఆనందపురం హైవే కూడలి దగ్గర బుధవారం అరెస్ట్‌ చేశారు. ఆనందబాబును ఆదర్శ్‌నగర్‌ హైవే రోడ్డులో అదుపులోకి తీసుకున్నారు. వీరి ముగ్గురిదీ గాజువాక. వీరి దగ్గర నుంచి రూ.10 లక్షలు, 4 మొబైల్స్ స్వాధీనం చేసుకుని రిమాండ్‌కు తరలించారు. మైనర్లను జువైనల్‌ హోమ్‌కు తరలించారు. ఈ నెల 15న ఎంపీ ఎంవీవీ సత్యనారాయణ భార్య, కుమారుడితో పాటు ఆడిటర్‌ జీవీని హేమంత్‌కుమార్‌ గ్యాంగ్‌ కిడ్నాప్‌ చేసిన విషయం బయటపడిన సంగతి తెలిసిందే.

ఈ కిడ్నాప్ వ్యవహారంపై ఎంపీ సత్యనారాయణ క్లారిటీ ఇచ్చారు. ఈ నెల 12న ఆఫీస్‌లోనే కూర్చున్నామని.. 13వ తేదీ తెల్లవారుజామున 5.30 కి ముగ్గురు వ్యక్తులు తన కుమారుడు ఉంటున్న ఇంట్లోకి చొరబడి కత్తులతో బెదిరించినట్లు వివరించారు. కుమారుడు దగ్గర వాచ్, ఉంగరాలు, డబ్బులు తీసుకున్నారని.. తన కుమారుడు తల్లికి ఫోన్ చేసి రావాలని కోరారన్నారు. అక్కడికి వెళ్లిన తర్వాత తన భార్యను కూడా బంధించారని.. తన మిత్రుడు ఆడిటర్ జీవిని కూడా పిలిచి బంధించారన్నారు. జీవీ ఫోన్ ఎత్తక పోవడంతో అనుమానం వచ్చి పోలీస్ కమిషనర్‌‌కు ఫిర్యాదు చేశానన్నారు.

తన భార్య, కుమారుడు కిడ్నాపైనట్లు చివరి నిమిషం వరకు తెలియదని.. తన కుమారుడు ఎప్పుడు ఏ పోలీస్ స్టేషన్ కి ఫోన్ చెయ్యలేదన్నారు. తన పని తను చేసుకుని వెళ్లిపోయే మనస్తత్వమని.. కిడ్నాప్ కేసులో ప్రధాన నిందితుడు హేమంత్ అనే వ్యక్తి తమకు తెలియదన్నారు. గడిచిన రెండేళ్లు తన కాల్ డేట్ కూడా పరిశీలించుకోవచ్చని.. ప్రభుత్వం పోలీస్ వ్యవస్థ చాలా బాగా పనిచేసిందన్నారు. విశాఖ ప్రశాంతంగా ఉందని.. తాను హైద్రాబాద్ వెళ్లిపోతాను అన్నారు. దీనికి మీడియానే కారణమనడం విశేషం.

తనకు ప్రభుత్వం నుంచో పార్టీ నుంచో ఇబ్బంది లేదని.. తాను వ్యాపారం చేస్తున్నాను అన్నారు.. కానీ మీడియా వక్రీకరిస్తోందని ఆవేదన వ్యక్తం చేశారు. ఈ రోజుకి తమ సంస్థలో కొనుగోళ్లకు వినియోగదారులు క్యూ కడుతున్నారని.. రఘురామ కృష్ణరాజు అనే వ్యక్తి గజ్జి కుక్కతో సమానం అన్నారు. తన కుటుంబం ఇబ్బంది పడితే డ్రామా అంటున్నారని.. రూ.1000 కోట్లు ల్యాండ్ డీల్ అంటున్నారన్నారు. తన ఆస్తులే వేయి కోట్లు లేవని.. తాను విశాఖ నుంచి పారిపోతే పీతల మూర్తి యాదవ్ సంతోషం అంటున్నారన్నారు. తన కుటుంబ కిడ్నాప్ అయితే అది కూడా రాజకీయం చేస్తారా అని మండిపడ్డారు.

ఈ కిడ్నాప్ కేసులో ప్రధాన నిందితులు హేమంత్‌పై 13 కేసులు, రాజేష్ మీద 45 కేసులు ఉన్నాయన్నారు. జనసేన కార్పొరేటర్ మూర్తి యాదవ్ తనను విమర్శిస్తున్నారని.. తన డివిజన్‌కు ఒక్క పని కూడా చేయలేదన్నారు. ఈ ఘటన మీద సీబీఐ విచారణ చేయాలని డిమాండ్ చెయ్యాలంటున్నారని.. తాను కూడా సిద్ధమన్నారు. తాను ఇప్పటికే హైదరాబాద్‌లో వ్యాపారం మొదలు పెట్టానని.. ప్రభుత్వం తనకు అనుకూలంగానే ఉందన్నారు. కేవలం డబ్బు కోసం ఈ కిడ్నాప్ చేశారన్నారు.