కాంగ్రెస్ పార్టీకి అల్టిమేటం విధించిన ఆప్ కన్వీనర్ కేజ్రీవాల్

మోదీని ఎదుర్కొనేందుకు ఏర్పాటు చేస్తున్న ప్రతిపక్షాల ఐక్యత సమావేశానికి ఆదిలోనే హంసపాదు తగిలింది. జేడీయూ అధినేత నితీశ్ కుమార్ ఆధ్వర్యంలో బిహార్ రాజధాని పాట్నాలో శుక్రవారం ఈ భేటీ జరగనుంది. ఈ సమావేశానికి దేశంలో ఉన్న దాదాపు 15 పార్టీలు హాజరు కానున్నాయి. అయితే ఈ సమావేశానికి ఒక్కరోజు ముందు ఆమ్ ఆద్మీ పార్టీ జాతీయ కన్వీనర్ , ఢిల్లీ ముఖ్యమంత్రి అరవింద్ కేజ్రీవాల్ కీలక ప్రకటన చేశారు. తమ డిమాండ్‌కు కాంగ్రెస్ అంగీకరించకపోతే విపక్షాల ఐక్యత సమావేశాన్ని బాయ్‌కాట్ చేస్తామని తేల్చి చెప్పారు. దీంతో కాంగ్రెస్ పార్టీ అయోమయంలో పడిపోయింది.

ఢిల్లీ ప్రభుత్వ అధికారులపై తీసుకువచ్చిన ఈ ఆర్డినెన్స్‌ను రాజ్యసభలో ఓడించాలని విజ్ఞప్తి చేసింది. కేజ్రీవాల్ విజ్ఞప్తితో ఆయా పార్టీలు ఆర్డినెన్స్‌ విషయంలో మద్దతు ప్రకటించాయి. అయితే ఈ విషయంలో కాంగ్రెస్ పార్టీ.. తటస్థంగా ఉండాలని నిర్ణయించింది. ఢిల్లీ, పంజాబ్ రాష్ట్రాల్లో ఆమ్ ఆద్మీ పార్టీ.. కాంగ్రెస్‌ నుంచి అధికారం లాక్కున్న నేపథ్యంలో.. హస్తం పార్టీ కేజ్రీవాల్‌కు మద్దతు ప్రకటించే విషయంలో తర్జన భర్జన పడుతోంది. ఇప్పుడు ఇదే కేజ్రీవాల్ ఆగ్రహానికి కారణమైంది. దీంతో చివరి వరకు వేచి చూసిన కేజ్రీవాల్.. తాజాగా అల్టిమేటం జారీ చేశారు.

ఇటీవల ఢిల్లీలో పాలనాధికారాల విషయంలో ఆ రాష్ట్రంలో ప్రజలతో ఎన్నికైన ప్రభుత్వానికే అధికారాలు ఉంటాయని సుప్రీంకోర్టు తీర్పు వెలువరించింది. అయితే ఈ సుప్రీం కోర్టు ఆదేశాలను విస్మరిస్తూ.. కేంద్రం ఒక ఆర్డినెన్స్‌ తీసుకువచ్చింది. సీఎం, లెఫ్టినెంట్ గవర్నర్, ప్రధాన కార్యదర్శిలతో కూడిన ఓ కమిటీని ఏర్పాటు చేస్తూ నిర్ణయం తీసుకుంది. దీని ప్రకారం ఢిల్లీలోని ప్రభుత్వ అధికారుల పోస్టింగ్‌లు, బదిలీలు, వారిపై పెత్తనం చెలాయించే అధికారం.. ఈ కమిటీకు ఉంటుందని పేర్కొంది. అయితే ఈ కమిటీ నిర్ణయాల్లో ఏదైనా సమస్య తలెత్తితే అంతిమ అధికారం.. లెఫ్టినెంట్ గవర్నర్‌కే ఉంటుందని ఆర్డినెన్స్‌లో స్పష్టం చేసింది. ఈ ఆర్డినెన్స్‌పై తీవ్ర స్థాయిలో మండిపడిన ఆమ్ ఆద్మీ పార్టీ.. దాన్ని వ్యతిరేకిస్తూ దేశవ్యాప్తంగా ఉన్న బీజేపీయేతర పార్టీల అధినేతలు అందరినీ కలిసింది.

మరోవైపు.. బహుజన సమాజ్ పార్టీ అధినేత్రి మాయావతి కూడా శుక్రవారం నిర్వహించే ప్రతిపక్షాల ఐక్యత సమావేశానికి దూరంగా ఉంటున్నట్లు ప్రకటించింది. ఈ సందర్భంగా కాంగ్రెస్, బీజేపీలపై ఆమె తీవ్ర స్థాయిలో విరుచుకుపడింది. ప్రతిపక్షాలు చేతులు కలపడం కాదు.. మనసులు కలపాలని ఆమె ట్వీట్ చేశారు. దేశంలో ద్రవ్యోల్బణం పెరుగుదల, పేదరికం, నిరుద్యోగం, వెనుకబాటుతనం, నిరక్షరాస్యత, విద్వేషాలు, మతపరమైన హింస పెరిగిపోతున్న నేపథ్యంలో బీజేపీ, కాంగ్రెస్ పార్టీలు.. అంబేడ్కర్ రాసిన రాజ్యాంగాన్ని అనుసరించి పాలించడం లేదని.. దేశంలో ఉన్న బహుజనుల పరిస్థితిని చూస్తే అర్థమవుతోందని ఆక్షేపించారు. ఈ భేటీకి ముందే దేశంలో ఉన్న ప్రతిపక్ష పార్టీలపై ప్రజలకు ఉన్న విశ్వాసాలను కూడగట్టుకుని.. ఏం చేయాలన్ని లక్ష్యాన్ని నిర్దేశించుకున్న తర్వాత ఈ సమావేశం నిర్వహిస్తే బాగుండేదని మాయావతి అభిప్రాయపడ్డారు. ఈ సందర్భంగా దేశంలో అత్యధిక లోక్‌సభ స్థానాలున్న ఉత్తర్‌ప్రదేశ్ నుంచి నేతలకు సరైన ప్రాధాన్యం కల్పించలేదని ఆమె అసహనం వ్యక్తం చేశారు.