రామ్‌గఢ్ మున్సిపాల్టీలో దడపుట్టించిన కోతి,,,ప్రత్యేక టీమ్‌ల సాయంతో పట్టుకున్న అధికారులు

మధ్యప్రదేశ్‌లోని రాజ్‌గఢ్‌లో రెండు వారాలుగా 20 మందిపై దాడిచేసి హడలెత్తించిన కోతి.. ఎట్టకేలకు పట్టుబడింది. అధికారులు, స్థానికులు కలిసి, డ్రోన్ల సాయంతో కోతిని గుర్తించి, బాణాలు వేసి బంధించారు. ఇటీవలే ఈ కోతి తలపై అధికారులు రూ.21, వేలు రివార్డు ప్రకటించడం గమనార్హం. కోతిని పట్టుకోడానికి ఉజ్జయిని నుంచి బృందాన్ని రప్పించారు. కోతిని బంధించడానికి బుధవారం సాయంత్రం అధికారులు చేసిన ప్రయత్నాలు ఫలించాయి. దీంతో స్థానికులు పెద్ద ఎత్తున సంబరాలు చేసుకున్నారు. బోనులో అటవీ అధికారులు వాహనంలో మర్కటాన్ని తీసుకెళ్తుంటే జై శ్రీరామ్.. జై బజరంగ్ బలి నినాదాలు చేశారు.

రాజ్‌గఢ్ ప్రాంతంలో కోతి భయోత్పాతం సృష్టించింది. కోతి దాడికి భయపడి ఓ వ్యక్తి తన ఇంటిపై గన్‌తో పహారా కాసిన దృశ్యాలు సోషల్ మీడియాలో వైరల్ అయ్యాయి. రెండు వారాల్లో 8 మంది చిన్నారులు సహా 20 మందిపై ఈ కోతి దాడి చేసి తీవ్రంగా గాయపరిచింది. ఇంటి పైకప్పులు, కిటికీల గుమ్మాలపై కూర్చుని, అకస్మాత్తుగా జనాలపైకి దూసుకెళ్తోందని అధికారులు తెలిపారు. గాయపడిన వారిలో చాలా మందికి అనేక కుట్లు వేయాల్సిన లోతైన గాయాలయ్యాయి.

ఆ ప్రాంతంలోని సీసీటీవీ కెమెరాల్లో కోతి చేష్టలు రికార్డయ్యాయి. ఓ వృద్ధుడిపై దూకి అతడ్ని కింద పడేసి లాగుతున్న దృశ్యాలు కనిపించాయి. ఈ దాడిలో వ్యక్తి తొడపై తీవ్ర గాయమైంది. దీంతో కోతిని పట్టుకోవడానికి చేసిన ప్రయత్నాలు విఫలం కావడంతో స్థానిక అధికారులు రూ. 21,000 నగదు రివార్డు ప్రకటించారు. పట్టుకోడానికి ప్రత్యేక రెస్క్యూ బృందాన్ని కూడా పిలిచారు. ‘ఆ కోతిని పట్టుకునే సామర్థ్యం మున్సిపాల్టీకి లేదు.. మేము జిల్లా కలెక్టర్‌ను సంప్రదించాం.. ఆయన సహాకారంతో ఉజ్జయిని నుంచి అటవీ శాఖ రెస్క్యూ టీమ్‌ను పిలిపించాం.. మున్సిపాలిటీ సిబ్బంది.. స్థానికులు వారికి సహాయం చేశారు.. కోతిని పట్టుకోవడానికి 4 గంటల సమయం పట్టింది’ అని రాజ్‌గఢ్ మున్సిపల్ కార్పొరేషన్ చైర్మన్ వినోద్ సాహు తెలిపారు.

‘కోతిని పట్టుకోవడం రూ. 21,000 నగదు బహుమతిని ప్రకటించాం.. ఆ మొత్తాన్ని జంతు రక్షక బృందానికి అందజేస్తాం’ అని ఆయన చెప్పారు. రాజ్‌గఢ్‌లోని స్థానిక బృందం గత రెండు వారాలుగా కోతిని పట్టుకునేందుకు ప్రయత్నించినప్పటికీ సఫలం కాలేదని అటవీ అధికారి గౌరవ్ గుప్తా తెలిపారు. ‘మేము అనేక జిల్లాల్లో ప్రత్యేక బృందాలను సంప్రదించాం.. ఉజ్జయిని బృందం అందుబాటులో ఉండటంతో వారు రాజ్‌గఢ్‌కు చేరుకుని నాలుగు గంటల ఆపరేషన్ తర్వాత కోతిని పట్టుకోగలిగారు’ అని పేర్కొన్నారు. బంధించబడిన కోతిని ఎక్కడ విడిచిపెడతారనే ప్రశ్నించగా.. దట్టమైన అటవీ ప్రాంతంలో ప్రజలకు హాని కలిగించని ప్రాంతంలో వదిలిపెడతామని పేర్కొన్నారు.