మండిపోతున్న టమాటా ధరలు,,,,మదనపల్లె మార్కెట్‌లో ఆల్ టైమ్ రికార్డు

ఏపీలో కూరగాయల ధరలు భారీగా పెరిగాయి. ముఖ్యంగా టమాటా, మిర్చి గురించి ప్రత్యేకంగా చెప్పనక్కర్లేదు. టమాటా ధరలైతే రోజు, రోజుకు పెరుగుతూనే ఉంది.. ఆల్ టైమ్ రికార్డ్ నమోదు చేసింది. తాజాగా అన్నమయ్య జిల్లా మదనపల్లె వ్యవసాయ మార్కెట్‌లో టమాటా ధర రికార్డు స్థాయిలో పలికింది. గతంలో ఎన్నడూ లేనివిధంగా అక్కడ కిలో రూ.124కి చేరింది.

మదనపల్లె మార్కెట్‌కు సాధారణంగా 1500 టన్నులు టమాటా వస్తుందని వ్యాపారులు అంటున్నారు. గురువారం మాత్రం 750 టన్నులు మాత్రమే వచ్చింది. దీంతో వ్యాపారుల మధ్య పోటీ పెరిగింది. ఏ గ్రేడ్‌ టమాటా కిలో రూ.106 నుంచి రూ.124 వరకు ధరల పలికింది. అదే బీ గ్రేడ్‌ రూ.86 నుంచి రూ.105 వరకు పలికింది. ఇలా సగటున రూ.100 నుంచి 110 వరకు పలికినట్లు చెబుతున్నారు. మదనపల్లె నుంచి ఉత్తరాది రాష్ట్రాలకు టమాటా ఎగుమతి చేస్తున్నారు. మరోవైపు మిర్చి ధర కూడా పెరిగింది. పచ్చిమిర్చి కేజీ రూ.100, లావు రకం మిర్చి రూ.120 పలుకుతున్నాయి.

మరోవైపు టమాటా రేట్లు భారీగా పెరగడంతో.. రాష్ట్ర ప్రభుత్వం ప్రధాన నగరాలు, పట్టణ ప్రాంతాల్లోని రైతుబజార్లలో కిలో రూ.50కే అందుబాటులో ఉంచేలా చర్యలు తీసుకుంటోంది. గురువారం నుంచి అందుబాటులోకి తీసుకొచ్చారు. ప్రభుత్వమే ప్రతి రోజూ 50–60 టన్నుల టమాటాలు సేకరించాలని భావిస్తోంది. అంతేకాదు సీఎం యాప్‌లో పరిస్థితిని ఎప్పటికప్పుడు సమీక్షిస్తోంది. వ్యవసాయ శాఖమంత్రి కాకాణి గోవర్ధన్‌ రెడ్డి సమీక్ష నిర్వహించారు. ధరల హెచ్చుతగ్గులను సమీక్షిస్తూ కృత్రిమ కొరత సృష్టించే వ్యాపారులపై చర్యలు తీసుకోవాలని అధికారులకు సూచించారు.

టమాటాతో పాటు పచ్చి మిర్చి ధరలు కూడా వంద దాటడంతో వాటిని కూడా సబ్సిడీపై అందించేందుకు చర్యలు చేపట్టాలని నిర్ణయించారు. రైతుబజార్ల ద్వారా అందుబాటులోకి తెచ్చేందుకు సిద్ధమయ్యారు. మదనపల్లె, పుంగనూరు, కలికిరి, పలమనేరు, పత్తికొండ మార్కెట్లకు టమాటాలు వస్తున్నాయి. వీటిని పొరుగు రాష్ట్రాల వ్యాపారులు కొనుగోలు చేస్తున్నారు. ప్రభుత్వం రైతుల నుంచి నేరుగా టమాటాలను సేకరిస్తోంది.