న్యాయ సహాయం కల్పించండి..... సుప్రీం కోర్టులో దస్తగిరి వినతి

ఏపీలో రాజకీయ దుమారానికి కారణమైన  ముఖ్యమంత్రి వైఎస్ జగన్మోహన్ రెడ్డి బాబాయ్, మాజీ మంత్రి వైఎస్‌ వివేకానంద రెడ్డి హత్య కేసులో ఆదివారం కీలక పరిణామం చోటు చేసుకుంది. తనకు ఆర్థిక స్థోమత లేనందున న్యాయ సహాయం కల్పించాలంటూ వివేకా హత్య కేసులో అప్రూవర్ దస్తగిరి సుప్రీం కోర్టును ఆశ్రయించారు. ఈ మేరకు సుప్రీం కోర్టు లీగల్‌ సెల్‌ సర్వీసెస్‌ కమిటీకి విజ్ఞాపన పంపారు.

మరోవైపు వైఎస్ వివేకానందరెడ్డి హత్య కేసులో తనను బాధితుడిగా పరిగణించాలంటూ ఆయన వ్యక్తిగత సహాయకుడు కృష్ణా రెడ్డి సుప్రీం కోర్టులో పిటిషన్‌ వేశారు. వివేకా హత్యపై తొలుత ఫిర్యాదు చేసింది తానే కాబట్టి, తనను బాధితుడిగా చూడాలని తెలిపారు. ఈ పిటిషన్‌పై సుప్రీం కోర్టు విచారణ చేపట్టింది. అయితే పీఏ కృష్ణారెడ్డి అభ్యర్థనను వివేకానందరెడ్డి కుమార్తె సునీత వ్యతిరేకించారు.

ఇదే సమయంలో దర్యాప్తు సంస్థ సెంట్రల్ బ్యూరో ఆఫ్ ఇన్వెస్టిగేషన్ (సీబీఐ)కి, అప్రూవర్‌గా మారిన దస్తగిరికి సుప్రీం కోర్టు నోటీసులు జారీ చేసింది. సుప్రీం కోర్టు నోటీసులపై స్పందించిన దస్తగిరి.. వివేకా హత్య కేసులో తనకు న్యాయ సహాయం అందించాలని కోరాడు. సుప్రీం కోర్టులో న్యాయవాదిని పెట్టుకునేంత ఆర్థిక స్థోమత తనకు లేనందున న్యాయ సహాయం కల్పించాలని విజ్ఞప్తి చేశాడు.

మరో వైపు దస్తగిరి అప్రూవర్‌గా మారడాన్ని వైఎస్ వివేకానందరెడ్డి హత్య కేసులో నిందితుడు శివశంకర్‌రెడ్డి సుప్రీం కోర్టులో సవాల్‌ చేశారు. దీనిపై విచారణ జరిపిన జస్టిస్‌ ఎంఆర్‌ షా ధర్మాసనం.. ఈ పిటిషన్‌ను డిస్మిస్‌ చేసింది. నిందితులకు ఇలాంటివి కోరే హక్కు లేదని తేల్చి చెప్పింది.