అమెరికా అధ్యక్ష భవనంలో తెల్ల పొడి ప్యాకెట్ కలకలం

అమెరికా అధ్యక్ష భవనం వైట్‌హౌస్‌లో తెలుపు రంగు పొడి కలకలం సృష్టించింది. దానివల్ల భవనాన్ని కొంతసేపు అధికారులు ఖాళీ చేయించి, తనిఖీలు నిర్వహించారు. ఆదివారం సాయంత్రం యునెటైడ్‌ సీక్రెట్‌ సర్వీస్‌ సిబ్బంది.. శ్వేతసౌధంలోని వెస్ట్ వింగ్‌లో తెలుపు రంగు పొడి ఉన్న ఓ అనుమానిత ప్యాకెట్‌ను గుర్తించారు. దీంతో అప్రమత్తమైన అధికారులు.. ముందుజాగ్రత్త చర్యలు చేపట్టారు. భవనంలోని వారిని ఖాళీ చేయించి.. కొద్దిసేపు సురక్షిత ప్రదేశానికి తరలించారు. అనంతరం పొడిని ల్యాబ్‌కు పంపి పరీక్షించడంతో ‘కొకైన్‌’ అని తేలింది. అది ప్రమాదకరమైన పదార్థం కాదని నిర్దారణ కావడంతో అధికారులు ఊపిరి పీల్చుకున్నారు.

అయితే, అత్యంత కట్టుదిట్టమైన భద్రత ఉండే ప్రదేశంలోకి అది ఎలా వచ్చిందని తెలుసుకోడానికి దర్యాప్తు కొనసాగిస్తున్నారు. ఈ ఘటన సమయంలో అధ్యక్షుడు జో బైడెన్ లేరని అధికార వర్గాలు తెలిపాయి. వాస్తవానికి వైట్‌హౌస్ సందర్శనకు వచ్చే వారిని ఈస్ట్ వింగ్‌లోకి మాత్రమే అనుమతిస్తారు. వెస్ట్ వింగ్‌లోకి ఎవర్నీ లోపలికి అనుమతించరు. అధ్యక్షుడు, ఉపాధ్యక్షుడు, ఇతర ఉన్నత అధికార యంత్రాంగం కార్యాలయాలు అక్కడే ఉంటాయి. ఇతరులను లోపలికి అనుమతించని ఈ ప్రదేశంలోకి కొకైన్ ఎవరు తీసుకొచ్చారనేది చర్చనీయాంశంగా మారింది.

వైట్‌హౌస్‌లో కనుగొన్న అనుమానిత పదార్ధానికి తదుపరి పరీక్షలు చేయనున్నట్లు సీక్రెట్ సర్వీస్ వెల్లడించింది. ‘ఈ పదార్థాన్ని తదుపరి పరీక్షల కోసం పంపాం.. అది వైట్ హౌస్‌లోకి ఎలా ప్రవేశించిందనే దానిపై విచారణ కొనసాగిస్తున్నాం.. అయితే, అది ప్రమాదకరమైంది కాదని గుర్తించాం’ అని సీక్రెట్ సర్వీస్ అధికార ప్రతినిథి ఆంథనీ గుగ్లియె ఓ ప్రకటనలో పేర్కొన్నారు.