ఎమ్మెల్యే అనిల్‌ యాదవ్‌కు ఇంటర్నేషనల్‌ నోటీసులు ఎందుకొచ్చాయి

నెల్లూరు సిటీ వైఎస్సార్ కాంగ్రెస్ పార్టీ ఎమ్మెల్యే, మాజీ మంత్రి అనిల్ కుమార్ యాదవ్ తన ఆస్తులపై పచ్చి అబద్ధాలతో దేవుని ఎదుట ప్రమాణం చేశారని తెలుగు దేశం పార్టీ రాష్ట్ర అధికార ప్రతినిధి ఆనం వెంకటరమణారెడ్డి తీవ్ర స్థాయిలో విమర్శలు గుప్పించారు. ఆస్తి పత్రాల్లో ఉన్న చిరంజీవి ఎవరు? మీ పీఏ నాగరాజు సాక్షి సంతకం ఎందుకు పెట్టారని సూటిగా ప్రశ్నించారు. కూల్ డ్రింక్ షాపు యజమాని పేరుతో డాక్యుమెంట్లు ఎందుకు ఉన్నాయని ఆనం ప్రశ్నించారు.

ఈ మేరకు ఆదివారం నెల్లూరులో ఆనం వెంకట రమణారెడ్డి మీడియాతో మాట్లాడుతూ.. చిరంజీవి, నాగరాజు, కూల్ డ్రింక్ యజమాని మీ మనుషులు కాదా? అని సూటిగా నిలదీశారు. తప్పుడు ప్రమాణాలు చేసిన అనిల్‌ కుమార్ యాదవ్‌ను భగవంతుడు క్షమించాలని అన్నారు. 2017 ఆగస్టులో క్రికెట్ బెట్టింగ్‌ కేసులో అనిల్‌ కుమార్ యాదవ్‌ను ఎందుకు విచారించారో చెప్పాలన్నారు. బెట్టింగ్‌కు సంబంధం లేదని అంటున్న అనిల్ యాదవ్, ఇటీవల తన బాబాయ్ పాపం మోస్తున్నానని చెప్పారని, వాస్తవానికి బాబాయ్, అబ్బాయ్ కలిసే ఐపీఎల్ బెట్టింగ్‌కు పాల్పడ్డారని ఆనం ఆరోపించారు.

‘బెట్టింగ్ మా బాబాయ్ పనే’ అని పోలీసు విచారణలో అనిల్ యాదవ్ ఎందుకు చెప్పలేదని ఆనం వెంకట రమణారెడ్డి ప్రశ్నించారు. అనిల్‌కు ఇంటర్నేషనల్‌ నోటీసులు ఎందుకొచ్చాయని నిలదీశారు. పెరూలో అనిల్ యాదవ్‌కు బంగారు వ్యాపారం ఉందో, లేదో బయటపెట్టాలని డిమాండ్ చేశారు. ఇక, కోవూరు వైఎస్సార్ కాంగ్రెస్ పార్టీ ఎమ్మెల్యే నల్లపరెడ్డి ప్రసన్న కుమార్ రెడ్డి మర్యాదగా మాట్లాడటం నేర్చుకోవాలని హితవు పలికారు. ముదివర్తిపాళెం కాజ్ వే పనులకు ప్రసన్న వర్గీయులు దొంగ బ్యాంకు గ్యారంటీతో టెండర్లు వేసింది వాస్తవం కాదా? అని ఆనం ప్రశ్నించారు.