ఆస్పత్రికి వచ్చిన రోగితో నర్సుకు సంబంధం,,,కారులో శృంగారం చేస్తుండగా రోగి మృతి

ఆస్పత్రిలో చికిత్స పొందుతున్న వ్యక్తితో అందులో పనిచేసే ఓ నర్సు రిలేషన్ పెట్టుకుంది. ఇదే క్రమంలో వారిద్దరూ అప్పుడప్పుడూ శారీరకంగానూ కలిశారు. అయితే ఒక రోజు ఆస్పత్రిలోని పార్కింగ్ ప్రదేశంలో అనుకోని సంఘటన చోటు చేసుకుంది. సదరు రోగితో కారులో శృంగారం చేసిన సమయంలో అతడు కార్డియాక్ అరెస్ట్‌తో కుప్పకూలిపోయాడు. దీంతో ఏం చేయాలో తెలియక ఆ నర్సు.. తన తోటి నర్సుకు ఫోన్ చేసి పిలిచింది. అయితే ఆ రోగిని ఆస్పత్రిలోకి తీసుకువెళ్లడం ఆలస్యం కావడంతో మృతి చెందాడు. దీంతో ఆ నర్సు తన ఉద్యోగం కోల్పోయింది. ఈ ఘటన బ్రిటన్‌లోని వేల్స్‌లో జరిగింది.

వేల్స్‌లోని ఒక హాస్పిటల్‌లో ఓ వ్యక్తి చాలా కాలంగా చికిత్స తీసుకుంటున్నాడు. కిడ్నీ సంబంధ వ్యాధులతో డయాలసిస్‌కు సంబంధించిన చికిత్స పొందుతున్నాడు. అయితే అదే ఆస్పత్రిలో పనిచేసే 42 ఏళ్ల పెనెలోప్ విలియమ్స్‌ అనే నర్సుతో ఆ రోగికి పరిచయం ఏర్పడింది. దీంతో కొన్ని రోజులకు వారి మధ్య పరిచయం సంబంధంగా మారింది. దీంతో ఒకరోజు ఆస్పత్రి పార్కింగ్ స్థలంలోని కారులో ఇద్దరూ కలిశారు. అయితే శృంగారం చేస్తుండగా.. ఆ వ్యక్తి ఒక్కసారిగా కుప్పకూలాడు. అతడికి కార్డియాక్ అరెస్ట్ కావడంతో స్పృహ కోల్పోయాడు. ఈ ఘటనతో భయపడిన విలియమ్స్.. తన తోటి నర్సుకు ఫోన్ చేసి రమ్మంది. అక్కడికి వచ్చిన మరో నర్సు.. ఆ రోగిని ఆస్పత్రికి తీసుకెళ్దామని సూచించినా విలియమ్స్ అడ్డుకుంది. దీంతో ఆ పేషంట్ కారులో మరణించాడు.

అయితే అక్కడికి వచ్చిన మెడికల్ సిబ్బంది కారులో రోగిని గుర్తించారు. అప్పటికే అతడు చనిపోయి.. నగ్నంగా ఉండడాన్ని గమనించారు. దీంతో ఘటనపై పోలీసులకు ఫిర్యాదు చేశారు. దీనికి కారణం విలియమ్స్ అని గుర్తించారు. అయితే రోగికి అస్వస్థతగా ఉండడంతో తాను వెళ్లినట్లు తొలుత ఆ నర్సు వెల్లడించింది. ఆ తర్వాత రోగితో ఉన్న సంబంధం గురించి ఒప్పుకుంది. దీంతో ఒక పేషంట్‌తో శారీరక సంబంధాన్ని పెట్టుకోకపోవడమే కాకుండా కార్డియాక్ అరెస్ట్ అయిన వ్యక్తిని కాపాడాల్సిన కనీస బాధ్యత కూడా తీసుకోలేదని ఆమెను నర్సు ఉద్యోగం నుంచి తొలగించారు. ఈ మేరకు నర్సు వృత్తిలో ప్రాథమిక బాధ్యత అయిన రోగిని కాపాడాలనే కనీస నియమం పాటించలేదని నర్సింగ్ అండ్ మిడ్ వైఫరీ కౌన్సిల్ ప్యానెల్ తేల్చింది.

అయితే ఆ రోగితో తనకు ఏడాదికి పైగా సంబంధం ఉన్నట్లు విచారణలో నర్సు అంగీకరించింది. అయితే వీరిద్దరి సంబంధం గురించి ఆమె తోటి నర్సులకు కూడా తెలుసని ఆస్పత్రి వర్గాలు తెలిపాయి. అయితే వారిలో కొందరు ఆ రోగితో సంబంధాన్ని తెంచుకోవాలని సూచించినా, హెచ్చరించినా.. ఆమె పట్టించుకోలేదని పేర్కొన్నాయి.