అనంతపురం ఏఎస్పీ హనుమంతు జీవితం,,,ఈ ప్రసంగం అందరికీ స్ఫూర్తిదాయకం

చిన్న జాబ్ వచ్చినా.. నా అంత మొగోడే లేడు అన్నంత బిల్డప్ ఇచ్చే వాళ్లు మన సమాజంలో చాలా మందే ఉంటారు. ఎంత ఎదిగినా, తమ ఎదుగుదలకు కారణమైన వ్యక్తులను, మూలాలను గుర్తుచేసుకునే వారు అరుదుగా ఉంటారు. అనంతపురం ASP హనుమంతు గారు చెప్పిన ఈ మాటలు వింటే మాత్రం ఎలాంటి వారైనా కన్నీళ్లు పెట్టుకుంటారు. జిల్లా పోలీసు శాఖకే రెండో అత్యున్నత వ్యక్తి స్థాయిలో ఉండి, చిన్నతనంలో తాను తిండికి లేక ఆడుక్కొని తిన్నానని చెప్పేందుకు ఎంత ధైర్యం కావాలి..?! అంత ధైర్యం ఉంది కాబట్టే.. పేదరికం అడుగడుగునా వెక్కిరించినా, మొక్కవోని గుండె ధైర్యంతో ఎదిరించి, కష్టపడి చదివి ఉన్నత ఉద్యోగం సాధించారు. సోషల్ మీడియాలో వైరల్ అవుతున్న వీడియోలో ఏఎస్పీ హనుమంతు చెప్పిన మాటలు వింటే, ఆయనకు హ్యాట్యాఫ్ చెప్పకుండా ఉండలేరు.

చిన్ననాటి హనుమంతు.. ఆకలితో అల్లాడుతూ, తల్లితో కలిసి ఇంటింటికీ తిరుగుతూ భిక్షాటన చేసే వాడట. గుక్కెడు అన్నం కోసం ఊర్లు తిరిగేవాడట. ఊర్లో ఎవరైనా చనిపోతే, పనిచేసేందుకు వెళ్లేవాడట. చావు, కర్మకాండ పనుల్లో పాల్పంచుకునేవాడట. అంత్యక్రియల కోసం సమాధులు తీసేందుకు కూడా వెళ్లేవారట. ఆ తర్వాత వారు పెట్టే అన్నంతో కడుపు నింపుకునేవారట.

ఇన్ని పనులు చేస్తూ కూడా చదువు కొనసాగించానని చెప్పారు ఏఎస్పీ హనుమంతు. అయితే, చదువు కోసమని పాఠశాలకు వెళ్తే తన బట్టలు చూసి తరిమికొట్టారట. చిరిగిన, మాసిన దుస్తులూ.. కింద చెడ్డీ కూడా లేదు. పైగా ఆ ప్రాంతంలో ఆ బాలుడు అడుక్కొని తింటాడని విద్యార్థులు, టీచర్లు అందరికీ తెలుసు. పాఠశాలకు కూడా అడుక్కునేందుకు వచ్చాడేమో అని అపోహపడి ఆ బాలుణ్ని తరిమేశారు. ఎంత ధైన్యం..?

హనుమంతు తల్లి ఇలా కాదు నాన్నా అని చెప్పి.. ఓ రెడ్డి గారింట్లో.. వారి పిల్లల పాత దుస్తులు అడుక్కొచ్చి, తన బిడ్డకు తొడిగి మరుసటి రోజు మళ్లీ పాఠశాలకు తీసుకెళ్లారట. మరో ఇంటి నుంచి సేకరించిన ఓ పగిలిన పలకను ఆ పిల్లాడి చేతిలో పెట్టి లైన్లో నిల్చోబెట్టారు. ఆ పలకను చూసిన ఓ మాష్టారు.. ‘రేయ్.. చదువుకునేందుకు వచ్చావా? అడుక్కోవడానికి వచ్చావేమో అనుకొని నిన్న తరిమికొట్టామే..’ అని బాధపడి.. ఆ పిల్లాడిని తీసుకెళ్లి తరగతి గదిలో కూర్చోబెట్టారట. ‘ఆ రోజు నా చేతిలో సరైన పలక కూడా లేదు. ఇవాళ ప్రభుత్వం మీకు అన్నీ ఇస్తోంది. డిజిటల్ పలకలు ఇస్తున్నారు’ అంటూ తన చేదు అనుభవాలు గుర్తుచేసుకున్నారు హనుమంతు సార్.

స్కూల్లో చేరడంతో చిన్నారి హనుమంతు కష్టాలు తీరాయనుకుంటే పొరపాటే. ఇక్కడే మరో పెద్ద సమస్య ఎదురైంది. హనుమంతు దుస్తులు, అతడి వేషధారణ చూసి పిల్లలందరూ అతడిని దూరం కొట్టారు. అడుక్కునేవాడు తమతో కూర్చోవడమేంటని చిన్నచూపు చూశారు. తమతో కలిసి కూర్చోవద్దని తిడుతూ అతడిని కొట్టారు. అది చూసి గురువు రమణాచారి గుండె తరుక్కుపోయింది. తోటి ఉపాధ్యాయుల సహకారంతో మంచి దుస్తులు సేకరించి హనుమంతుకు ఇచ్చారట. ఆ దుస్తులు వేసుకొని వచ్చాక.. పిల్లలకు నచ్చజెప్పి హనుమంతుతో స్నేహం చేయించారు. అయినా, పిల్లలందరూ హనుమంతుతో కలవడానికి రెండేళ్లు పట్టిందట.

విద్యాభ్యాసం కొనసాగుతోంది. భిక్షాటన వృత్తినైతే మానేశాడు. మరి ఆకలి తీరేదెలా..? కడుపు నకనకలాడుతుంటే చదివింది బుర్రకు ఎక్కేదెలా? తరగతులు ముగిసిన తర్వాత పెళ్లిళ్లు, పెద్ద వారింట్లో పనులు చేసేందుకు వెళ్లేవారట. ఆ పనులు చేసిన తర్వాత వాళ్లు పెట్టింది తిని కడుపు నింపుకోవడమే కాదు, తన తమ్ముడు, చెల్లెలి ఆకలి తీర్చేందుకు ఇంటికి కూడా భోజనం తీసుకెళ్లేవాడట. ఇన్ని కష్టాలు పడుతూ.. కసితో చదివి పోలీస్ ఆఫీసరయ్యారు హనుమంతు.

ఇవాళ ఎస్సై, కానిస్టేబుళ్లకు తన తల్లి కనిపిస్తే.. ‘నమస్కారం అమ్మా’ అంటుంటే, ఆ తల్లి మనసు గర్వంతో పొంగిపోతోందట. ‘మీరూ మీ తల్లిదండ్రులను ఇలా గర్వపడేలా చేస్తారా..?’ - స్కూల్ విద్యార్థులను హనుమంతు సార్ అడిగిన ప్రశ్న ఇది. కానీ, ఈ కాలం విద్యార్థులకు ‘మా కాలంలో ఈ సెల్‌ఫోన్లు లేవు. తల్లి చెప్పిందే వేదం. గురువు చెప్పిందే వేదం. కానీ, మీ దగ్గర సెల్ ఫోన్ ఉంది. అదే పెద్ద శత్రువు. జాగ్రత్త. మా దగ్గర కూడా సెల్‌ఫోన్ ఉంటే, మేమూ చెడిపోయేవాళ్లమేమో. చదువుకోమని ఎవరూ చెప్పలేదు మాకు. సంస్కారం, క్షమశిక్షణే అన్నీ నేర్పించింది’ అని ఏఎస్పీ హనుమంతు చెప్పుకొచ్చారు.

అనంతపురంలో AGS ఫౌండేషన్ ఆధ్వర్యంలో ప్రభుత్వ పాఠశాలల్లో చదివే పిల్లలకు ఉచితంగా పుస్తకాలు, డిజిటల్ పలకలు పంపిణీ చేశారు. ఈ కార్యక్రమానికి అనంతపురం ASP హనుమంతు ముఖ్య అతిథిగా హాజరై ప్రసంగించారు. 400 మంది పిల్లలకు ఈ ప్రపంచంలో ఏ గురువూ చెప్పని ‘జీవిత పాఠం’ చెప్పారు.

నా గత జీవితం గురించి చెప్పుకునేందుకు నేను ఇన్‌సల్ట్‌గా ఫీలవ్వను. నా మాటల వల్ల ఒక నలుగురు విద్యార్థులు మారితే చాలు. వారితో సమాజానికి ఎంతో మేలు జరుగుతుంది. ఇవాళ సమాజం అన్నీ విడిచిపెట్టి నా అమ్మ గారికి దండం పెడుతోంది. మీరు మీ తల్లిదండ్రులకు దండం పెట్టిస్తారా..?’ - ఈ మాటలు చెబుతున్నప్పుడు హనుమంతు సార్ గొంతు ఎక్కడా తొణక లేదూ, బెనకలేదు. ఎంతటి కష్టాలను చూసిన జీవితం అది. సార్ మాటలు వింటే, మీలో అవి కచ్చితంగా స్ఫూర్తి నింపుతాయి. హ్యాట్సాఫ్ సార్..