భారీ వర్షాల ఎఫెక్ట్.. విద్యాసంస్థలు బంద్.. ఉద్యోగులకు వర్క్‌ఫ్రమ్ హోం

ఉత్తర భారత దేశాన్ని భారీ వర్షాలు వణికిస్తున్నాయి. గత కొన్ని రోజులుగా కురుస్తున్న వర్షాలు ఉత్తరాది వాసులను తీవ్ర ఇబ్బందులకు గురి చేస్తున్నాయి. ఈ క్రమంలోనే విద్యుత్, తాగునీటి సమస్యలు తలెత్తుతున్నాయి. దీంతో ప్రజలు తీవ్ర అవస్థలు పడుతున్నారు. భారీ వర్షాల కారణంగా దేశ రాజధాని ఢిల్లీలో జనజీవనం స్తంభించింది. అయితే వారికి తాగునీటి ఇబ్బందులు తప్పవని ఢిల్లీ సీఎం అరవింద్ కేజ్రీవాల్ సూచించారు. విద్యాసంస్థలన్నీ ఆదివారం వరకు మూసి ఉంచాలని.. ఉద్యోగులు వర్క్‌ఫ్రమ్ హోం చేయాలని తెలిపారు.

ఇటీవల కురుస్తున్న వానలతో దేశంలోని చాలా రాష్ట్రాలు అతలాకుతలం అవుతున్నాయి. ముఖ్యంగా ఢిల్లీ, హిమాచల్ ప్రదేశ్, హర్యానా రాష్ట్రాల్లో భారీ వర్షాలు, వరదలు తీవ్ర ఇక్కట్లకు గురి చేస్తున్నాయి. యమునా నది మహోగ్ర రూపం దాల్చడంతో ఢిల్లీకి వరద ముప్పు ఉందని వాతావరణ శాఖ హెచ్చరికలు జారీ చేస్తున్నాయి. ఢిల్లీలోని అన్ని పాఠశాలలు, కళాశాలలు, యూనివర్సిటీలు ఆదివారం వరకు మూసివేయాలని ఆదేశాలు జారీ చేశారు. ప్రభుత్వ, ప్రైవేటు సంస్థలు వర్క్ ఫ్రమ్ హోం విదానాన్ని పాటించాలని సూచించారు. ఈ క్రమంలోనే ఢిల్లీ వాసులకు మరో షాక్ తగిలింది. ఢిల్లీలోని పలు ప్రాంతాల్లో సరఫరా అయ్యే మంచినీటిపై కోత విధించనున్నట్లు కేజ్రీవాల్ సర్కార్ తెలిపింది. దీంతో భారీ వర్షాలు, వరదలతో ఆందోళన చెందుతున్న ఢిల్లీ ప్రజలకు మరో ఇబ్బంది ఎదురైంది.

యమునా నదిలో వరద ప్రవాహం క్రమంగా పెరుగుతుండటంతో ఢిల్లీ డిజాస్టర్ మెనేజ్‌మెంట్ అథారిటీ సమావేశం నిర్వహించినట్లు ఢిల్లీ సీఎం అరవింద్ కేజ్రీవాల్ తెలిపారు. వరద పరిస్థితిపై చర్చించినట్లు వెల్లడించారు. ఈ క్రమంలోనే ఢిల్లీ వాసులకు కీలక సూచనలు చేశారు. ఆదివారం వరకు ఢిల్లీ పరిధిలోని అన్ని పాఠశాలలు, కళాశాలలు, యూనివర్సిటీలు మూసివేయాలని ఆదేశించారు. అత్యవసరం కాని ప్రభుత్వ కార్యాలయాలకు చెందిన ఉద్యోగులు వర్క్ ఫ్రమ్ హోమ్ చేయాలని తెలిపారు. ప్రైవేటు సంస్థలు కూడా వర్క్‌ఫ్రమ్ హోం విధానాన్ని అనుసరించాలని సూచించారు. ఢిల్లీలోకి వచ్చే భారీ ట్రక్కులపై నిషేధం విధించామని కేవలం అత్యవసర సర్వీసులను మాత్రమే అనుమతిస్తామని తెలిపారు. ఢిల్లీ వాసులు ఓపికతో ఉండాలని ఒక్కసారి వరద ప్రవాహం తగ్గితే అన్ని పరిస్థితులు సాధారణం అవుతాయని పేర్కొన్నారు.

ఢిల్లీలోని కొన్ని ప్రాంతాల్లోని ఇళ్లకు సరఫరా చేసే తాగునీటిని గురు, శుక్ర వారాల్లో నాలుగో వంతు మాత్రమే సరఫరా చేస్తామని ఆమ్ ఆద్మీ పార్టీ సర్కార్ పేర్కొంది. ఈ మేరకు ఢిల్లీ సీఎం అరవింద్ కేజ్రీవాల్ ట్విట్టర్ ద్వారా వెల్లడించారు. యమునా నది పొంగిపొర్లుతుండటంతో దాని ఒడ్డున ఉన్న వాటర్ ప్లాంట్‌లు వరద నీటిలో మునిగిపోయాయని పేర్కొన్నారు. ఢిల్లీలోని కొన్ని ప్రాంతాల్లో ఈ నీటి కొరత ఉంటుందని వెల్లడించారు. యమునా నదిలో వరద ప్రవాహం తగ్గిన వెంటనే యుద్ద ప్రాతిపదికన సహాయక చర్యలు చేపట్టి.. వీలైనంత త్వరగా నీటి సరఫరా పునరుద్ధరిస్తామని తెలిపారు.

హర్యానా సహా పొరుగు రాష్ట్రాల్లో కురుస్తున్న భారీ వర్షాలతో యమునా నది ఉద్ధృతంగా ప్రవహిస్తోంది. 2 కోట్ల జనాభా ఉన్న ఢిల్లీలో గత కొన్ని రోజులుగా భారీ వానలను చవిచూస్తున్నాయని.. లోతట్టు ప్రాంతాలు నీట మునిగాయని పేర్కొన్నారు. వేలాది మంది ప్రజలను తాత్కాలికంగా ఏర్పాటు చేసిన సహాయక కేంద్రాలకు తరలించినట్లు తెలిపారు. గురువారం వరకు యమునా నదిలో ప్రవాహం అధికంగా ఉంటుందని.. వరద ప్రభావిత ప్రాంతాల నుంచి మరింత మందిని సురక్షిత ప్రాంతాలకు తరలించే ప్రక్రియ కొనసాగుతోందని వివరించారు. ప్రజల ప్రాణాలే అతి ముఖ్యమని.. ఈ సమయంలో ఢిల్లీ ప్రజలు సురక్షిత ప్రాంతాలకు వెళ్లాలని సూచించారు.

వర్షాకాలం ప్రారంభమైన జూన్ 1 వ తేదీ నుంచి ఢిల్లీలో రికార్డు స్థాయి వర్ష పాతం నమోదైనట్లు భారత వాతావరణ శాఖ అధికారులు వెల్లడించారు. పంజాబ్‌లో సాధారణం కన్నా 100 శాతం.. హిమాచల్ ప్రదేశ్‌లో సాధారణం కన్నా 70 శాతం వర్షపాతం నమోదైందని వివరించారు. ఇక దేశ రాజధానిలో సాధారణం కన్నా 112 శాతం అధిక వర్షం పడిందని తెలిపింది. ఢిల్లీ సివిల్ లైన్స్ రెసిడెన్షియల్ ప్రాంతంలో వరద రాకుండా బారియర్‌లు ఏర్పాటు చేసినట్లు కేజ్రీవాల్ వెల్లడించారు.

ఢిల్లీ సహా ఉత్తర భారత రాష్ట్రాలైన హర్యానా, హిమాచల్ ప్రదేశ్, ఉత్తరాఖండ్, జమ్ము కశ్మీర్, పంజాబ్ రాష్ట్రాల్లో కొన్ని రోజులుగా భీకర వర్షాలు కురుస్తున్నాయి. ఈ వర్షాల ధాటికి నదులు, వాగులు, వంకలు పొంగిపొర్లుతున్నాయి. ఇళ్లు, భవనాలు, విద్యుత్ స్తంభాలు, సెల్‌ఫోన్ టవర్లు కూలిపోతున్నాయి. భారీగా వరద నీరు చేరడంతో ఆయా రాష్ట్రాల్లో ఉన్న లోతట్టు ప్రాంతాలు జల దిగ్భందంలో చిక్కుకుపోయాయి. వేలాది మందిని ప్రభుత్వం వరద ప్రభావిత ప్రాంతాల నుంచి సురక్షిత ప్రాంతాలకు తరలిస్తోంది. ఢిల్లీ సహా ఉత్తర భారత రాష్ట్రాలైన హర్యానా, హిమాచల్ ప్రదేశ్, ఉత్తరాఖండ్, జమ్ము కశ్మీర్, పంజాబ్ రాష్ట్రాల్లో కొన్ని రోజులుగా భీకర వర్షాలు కురుస్తున్నాయి. ఈ వర్షాల ధాటికి నదులు, వాగులు, వంకలు పొంగిపొర్లుతున్నాయి. ఇళ్లు, భవనాలు, విద్యుత్ స్తంభాలు, సెల్‌ఫోన్ టవర్లు కూలిపోతున్నాయి. భారీగా వరద నీరు చేరడంతో ఆయా రాష్ట్రాల్లో ఉన్న లోతట్టు ప్రాంతాలు జల దిగ్భందంలో చిక్కుకుపోయాయి. వేలాది మందిని ప్రభుత్వం వరద ప్రభావిత ప్రాంతాల నుంచి సురక్షిత ప్రాంతాలకు తరలిస్తోంది.