బ్యాంకు బయటే బురిడీ కొట్టించారు,,,రూ.10 లక్షలు ఎత్తుకెళ్లిన దుండగులు

రూ.20 కోసం కక్కుర్తిపడి రూ.10 లక్షలు పోగొట్టుకున్నాడో వ్యక్తి. బ్యాంకులో డబ్బులు డ్రా చేసి బయటకు రాగానే.. చిన్న ట్రిక్‌తో దొంగలు డబ్బులు దోచుకెళ్లారు. పాత గుంటూరు బాలాజీ నగర్‌కు చెందిన కోసూరి హరిబాబు ఎం.ఎన్‌ ఎక్స్‌పోర్టు కంపెనీలో మూడేళ్లుగా గుమస్తాగా పని చేస్తున్నారు. శుక్రవారం ఉదయం ఆయన లక్ష్మీపురంలోని హెచ్‌డీఎఫ్‌సీ బ్యాంకులో రూ.10 లక్షలు డ్రా చేశారు.. బ్యాంకు నుంచి బయటకు వచ్చి డబ్బులు ఉన్న బ్యాగును బైక్ హ్యాండిల్‌కు తగిలించారు. స్టాండ్‌ తీసి బైక్ ఎక్కి అక్కడి నుంచి బయల్దేరబోయాడు.

ఇంతలో ఒక వ్యక్తి వెనుక నుంచి వచ్చాడు.. డబ్బులు కిందపడిపోయాయని చెప్పాడు. ఆయన కింద ఉన్న రూ.20ను తీసుకునేందుకు బైక్ పై నుంచి కిందకు అలా ఒంగాడు. ఇంతలో మరో వ్యక్తి బైక్ హ్యాండిల్‌కు ఉంచిన డబ్బుల సంచిని ఎత్తుకెళ్లాడు. అప్పటికే మరొక వ్యక్తి వాహనం స్టార్ట్‌ చేసి సిద్ధంగా ఉన్నాడు. ముగ్గురు కలిసి అక్కడి నుంచి పరారయ్యారు. వెంటనే బాధితుడు పట్టాభిపురం పోలీసులకు ఫిర్యాదు చేశారు. వెంటనే పోలీసులు సంఘటనా స్థలానికి చేరుకుని సీసీ ఫుటేజీ పరిశీలించారు. దొంగలు మాస్కులు పెట్టుకుని ఉన్నట్లు పోలీసులు తెలిపారు. అలాగే ఫుటేజ్ ఆధారంగా.. బ్యాంకులోకి కూడా ఒక దొంగ ముందుగా వచ్చి ఎంత నగదు డ్రా చేసింది రెక్కీ నిర్వహించినట్లు గుర్తించారు పోలీసులు.

ముగ్గురు వ్యక్తులు ముందుగానే ప్లాన్ చేసుకుని బ్యాంక్ దగ్గర రెక్కీ చేశారు. ఓ వ్యక్తి బ్యాంకులోకి వెళ్లి హరిబాబు డబ్బులు డ్రా చేస్తున్న విషయాన్ని గమనించాడు. అతడు డబ్బులు డ్రా చేసి బయటకు రాగానే ప్లాన్ అమలు చేశారు. గతంలో కూడా ఇదే తరహాలో దోపిడీ జరిగినట్లు చెబుతున్నారు. తమిళనాడుకు చెందిన గ్యాంగ్ ఈ తరహాలో చోరీలు చేస్తున్నట్లు చెబుతున్నారు. పోలీసులు నిందితుల కోసం గాలిస్తున్నారు. పాత నేరస్థుల గురించి ఆరా తీస్తున్నారు.