కూలి పనులకు వెళుతూనే,,భర్త ప్రోత్సాహంతో పీహెచ్‌డీ పట్టా

ఈ ప్రపంచాన్ని మార్చేయగల అత్యంత శక్తివంతమైన ఆయుధం చదువు.. పేదరికం చదువుకు ఏ మాత్రం అడ్డంకి కాదని ఎన్నో సందర్భాల్లో నిరూపితమైంది. అవును నిజమే.. ఈ చదువుల సరస్వతి కూడా పేదరికాన్ని జయించి అనుకున్నది సాధించారు. ఓ వైపు దినసరి కూలీగా పనులు చేసుకుంటూనే.. ఏకంగా కెమిస్ట్రీలో పీహెచ్‌డీ పట్టాను అందుకుంది. ఆర్థిక పరిస్థితి అంతంతమాత్రంగా ఉన్నా.. కుటుంబ పరిస్థితులు అవరోధంగా ఉన్నా సరే భర్త సహకారంతో అనుకున్నది సాధించింది ఈ సాకే భారతి.. ఈ రియల్ విన్నర్ స్టోరీ సోషల్ మీడియాలో వైరల్ అవుతోంది.

అనంతపురం జిల్లాకు శింగనమల నియోజకవర్గంలోని ఓ గ్రామానికి చెందిన సాకే భారతికి బాగా చదువుకోవాలని ఆశ. ఆమె పదో తరగతి వరకూ శింగనమల ప్రభుత్వ స్కూల్‌లో, ఇంటర్‌‌ను పామిడి జూనియర్‌ కాలేజీలో పూర్తి చేసింది. తల్లిదండ్రులకు ముగ్గురు ఆడపిల్లలు. అందరిలో భారతి పెద్ద.. వీరి బాధ్యతలు తండ్రికి భారంగా మారింది. ఆర్థిక స్థితి కూడా అంతంతమాత్రం. అందుకే తండ్రి భారతిని శింగనమల మండలం నాగులగుడ్డంకు చెందిన మేనమామ శివప్రసాద్‌‌కి ఇచ్చి పెళ్లి చేశారు. అక్కడితో చదువుకు అంతరాయం ఏర్పడింది. బాగా చదువుకోవాలన్న భారతి ఆపడినా.. ఆ విషయం భర్తకు చెప్పలేక పోయింది.

కొంతకాలానికి భారతి భర్త ఆమె కోరిక గురించి తెలుసుకున్నాడు. బాగా చదువుకోవాలని ప్రోత్సాహం అందించాడు. రోజూ కూలి పనులకు వెళితేనే కడుపు నిండుతుంది. అందుకే భారతి కొన్నిరోజులు కాలేజీకి వెళ్లి.. మిగిలిన రోజుల్లో కూలి పనులు చేశారు. అప్పటికే కూతురు గాయత్రి ఉంది.. ఆ బిడ్డ ఆలనా పాలనా చూసుకుంంది. అలా అనంతపురం ఎస్‌ఎస్‌బీఎన్‌లో డిగ్రీ, పీజీ పూర్తి చేశారు. చదువుతో పాటూ కుటుంబానికి ఆర్థికంగా అండగా ఉండేందుకు కూలి పనులకు వెళ్లారు భారతి. అన్ని పనులు చక్కబెట్టుకుంటూనే కష్టపడి చదివారు.

తాను కాలేజీకి వెళ్లాలంటే ఊరి నుంచి 28 కిలో మీటర్లు ప్రయాణం. రవాణా ఖర్చులు భరించలేని పరిస్థితి.. ఎనిమిది కిలోమీటర్లలో ఉన్న గార్లదిన్నె వరకూ నడిచి వెళ్లి అక్కడి నుంచి బస్సెక్కి కాలేజీకి వెళ్లేవారు. అలా కష్టపడి చదివి డిగ్రీ, పీజీ మంచి మార్కులతో చేశారు. పీజీతో చదువు ఆగిపోవాల్సిందేనా.. ఆ తర్వాత ఏంటి అనే ప్రశ్న భారతి మనసులో మొదలైంది. ఇంతలో లెక్చరర్లు, భర్త పీహెచ్‌డీ దిశగా అడుగులు వేయించారు. ఈ ప్రయత్నంలో ప్రొఫెసర్‌ డా.ఎంసీఎస్‌ శుభ దగ్గర ‘బైనరీ మిక్చర్స్‌’ అంశంపై పరిశోధనకు అవకాశం దక్కింది. పీహెచ్‌డీ అంటే ఊరికే రాదు.. ఆర్థికంగా కొంత అండ ఉండాలి. అలాంటి సమయంలో వచ్చిన ఉపకార వేతనం భారతికి సాయమైంది.

పీహెచ్‌డీ చేస్తున్నా సరే కూలి పనులు చేస్తూనే ఉన్నారు భారతి. డాక్టరేట్‌ అందుకుంటే తన కుటుంబానికి మంచి జరుగుతుందని.. యూనివర్సిటీ స్థాయిలో ఉద్యోగం అందుకోవచ్చని.. అందరి జీవితాలే బాగుపడతాయని భావించారు. ఇలా కష్టపడి పీహెచ్‌డీ పట్టాను అందుకున్నారు భారతి. శ్రీకృష్ణదేవరాయ విశ్వవిద్యాలయం స్నాతకోత్సవంలో పీహెచ్‌డీ పట్టా అందుకోవడానికి తన భర్త, కూతురుతో కలిసి వెళ్లారు భారతి. ఎక్కడా గర్వం లేదు.. పారగాన్‌ చెప్పులూ, ఓ సాదా చీరతో అలా వేదికపైకి వెళ్లగానే అక్కడున్న పెద్దలు, అతిథులు కూడా కొంత ఆశ్చర్యపోయారు. ఆ తర్వాత ఆమె గురించి తెలుసుకుని ప్రశంసించారు.

భారతి పీహెచ్‌డీ పట్టా అందుకున్న విషయం తెలిసి స్థానికులు, బంధువులు ఆమెపై పొగడ్తల వర్షం కురిపించారు. చదువుకు పేదరికం ఏమాత్రం అడ్డంకి కాదని ఈ చదువుల తల్లి భారతి నిరూపించారు. తాను పీహెచ్‌డీ చేశాననే గర్వం కూడా లేదు. రోజూ తమతో పాటు కూలి పనులకొచ్చే భారతి డాక్టరేట్ అందుకుందని తెలిసి తోటి కూలీలు సంతోషించారు. ఎంత ఎదిగినా ఒదిగి ఉండాలని భారతి నిరూపించారు.. ఎన్ని అవాంతరాలు ఎదురైనా తన లక్ష్యం దిశగా ముందుకు సాగారు. భారతి విజయం వెనుక ఉన్న ఆమె భర్త శివప్రసాద్‌‌‌ను కచ్చితంగా ప్రశంసించాల్సిందే.