సీఎం జగన్ వాట్సాప్ నంబర్ పంపిస్తే.. స్విమ్మింగ్‌ వీడియోలు పంపిస్తా
Andhra Pradesh Telugu | Suryaa Desk | Published : Sun, Jul 23, 2023, 07:33 PM
ముఖ్యమంత్రి వైఎస్ జగన్మోహన్ రెడ్డిపై తెలుగు దేశం పార్టీ జాతీయ ప్రధాన కార్యదర్శి నారా లోకేష్ మరోసారి ఘాటు వ్యాఖ్యలు చేశారు. నేతన్నకు చేయూత కార్యక్రమంలో భాగంగా శుక్రవారం నెల్లూరు జిల్లా వెంకటగిరి సభలో సీఎం జగన్మోహన్ రెడ్డి చేసిన వ్యాఖ్యలపై నారా లోకేష్ వ్యంగ్యాస్త్రాలు సంధించారు. యువగళం పాదయాత్రలో భాగంగా ప్రకాశం జిల్లా పొదిలిలో ఏర్పాటు చేసిన సభలో లోకేష్ మాట్లాడుతూ.. అమెరికాలో చదువుకునే రోజుల్లో తన స్నేహితులతో ఈత కొడితే సీఎం జగన్‌కు ఎందుకంత బాధ అని ప్రశ్నించారు.
స్విమ్మింగ్‌ పూల్‌లో ఈత కొట్టకుండా జాగింగ్‌ చేస్తారా అని సీఎం జగన్‌ను లోకేష్ ప్రశ్నించారు. సీఎం జగన్ వాట్సాప్ నంబర్ పంపిస్తే.. స్మిమ్మింగ్‌ వీడియోలు కావాలంటే పంపిస్తానని సెటైర్లు వేశారు. సీఎం జగన్ గురించి ఆయన సొంత చెల్లెలు వైఎస్ షర్మిల అంతా చెప్పారని పేర్కొన్నారు. ఇక, రాష్ట్రంలోనే అతిపెద్ద కుంభకోణం ప్రకాశం జిల్లా మార్కాపురంలో జరిగిందని చెప్పారు.
చోటా నయీం గ్యాంగ్‌.. రూ.800 కోట్లు విలువైన భూములను స్వాహా చేశారని లోకేష్ ఆరోపించారు. బినామీల పేరుతో 378 ఎకరాల ప్రభుత్వ భూమిని కొట్టేశారని పేర్కొన్నారు. తెలుగు దేశం పార్టీ అధికారంలోకి వచ్చాక సిట్‌ ఏర్పాటు చేసి కబ్జాకు గురైన భూములను వెనక్కి తీసుకొని పేదలకు పంచిపెడతామని లోకేష్ వెల్లడించారు. ఇక, వర్షం కురుస్తున్నప్పటికీ టీడీపీ కార్యకర్తలు, స్థానికులు ఉత్సాహంగా సభలో పాల్గొన్నారు.
|
|