మొన్న మూత్రవిసర్జన.. నేడు దళితుడి ముఖానికి మలం

అమాయక గిరిజనులు, ఆదివాసీలు, దళితులపై పలుచోట్ల ఇటీవల జరుగుతోన్న వరుస దాడులు ఆందోళనకు గురిచేస్తున్నారు. ఇటీవల మధ్యప్రదేశ్‌లో గిరిజనుడిపై ఓ ప్రబుద్ధుడు మూత్రం పోసిన ఘటన దేశవ్యాప్తంగా చర్చనీయాంశమైన విషయం తెలిసిందే. తాజాగా, అదే అక్కడే అలాంటి మరో ఘటన చోటుచేసుకుంది. పొరపాటున గ్రీజు అంటుకోవడంతో రెచ్చిపోయిన ఓ వ్యక్తి... దళితుడి ముఖం, శరీరంపై మలం పూశాడు. బాధితుడి ఫిర్యాదు మేరకు నిందితుడ్ని పోలీసులు శనివారం అదుపులోకి తీసుకున్నారు.

మధ్యప్రదేశ్ ఛతర్పూర్ జిల్లాలోని బికౌరా గ్రామంలో ఈ అమానవీయ ఘటన చోటుచేసుకుంది. జిల్లా కేంద్రానికి 35 కిలోమీటర్ల దూరంలోని బికౌర గ్రామంలో డ్రైనేజీ నిర్మాణ పనులకు దశరథ్ అహిర్వార్ అనే దళిత కూలీ వెళ్లాడు. అతడు పనిచేస్తోన్న డ్రైనేజీకి సమీపంలోని చేతి పంపు వద్ద రాంకృపాల్ పటేల్ అనే వ్యక్తి స్నానం చేస్తున్నాడు. ఈ క్రమంలోఅహిర్వార్ చేతికి ఉన్న గ్రీజు పొరపాటున రాంకృపాల్కు అంటింది. దీంతో రెచ్చిపోయిన రాంకృపాల్.. అతడిపై తీవ్ర ఆగ్రహం వ్యక్తం చేశాడు. అనంతరం తాను స్నానం చేస్తున్న మగ్గుతో.. సమీపంలో ఉన్న మలాన్ని తీసుకువచ్చి.. దశరథ్ అహిర్వార్ తల, ముఖం, శరీరంపై పూశాడు.

అక్కడితో ఆగకుండా కులం పేరుతో దూషణకు దిగాడు. ఈ విషయాన్ని గ్రామ పంచాయితీ దృష్టికి తీసుకెళ్తే.. తిరిగి బాధితుడిదే తప్పన్నట్టు వ్యవహరించింది. అతడికి రూ. 600 జరిమానా విధించింది. చివరకు బాధితుడు పోలీస్ స్టేషన్‌కు వెళ్లి ఫిర్యాదు చేశాడు. ఈ ఘటనపై స్పందించిన సబ్-డివిజినల్ ఆఫీసర్ ఆఫ్ పోలీస్ మన్మోహన్ సింగ్ భగేల్.. నిందితుడిపై ఎస్సీ/ ఎస్టీ చట్టంతో పాటు పలు ఐపీసీలోని పలు సెక్షన్ల కింద కేసు నమోదు చేశామని చెప్పారు.

అయితే, దీనిపై పోలీసులు భిన్నంగా చెబుతున్నారు. రాంకృపాల్, దశరథ్.. ఇద్దరు ఒకరిపై ఒకరు సరదాగా వస్తువులు విసిరేసుకున్నారని చెప్పారు. తర్వాత రాంకృపాల్కు అహిర్వార్ గ్రీజు పూశాడని.. అనంతరం చేత్తో మలాన్ని తీసి.. అహిర్వార్పై అతడు పూశాడని తెలిపారు. అహిర్వార్ శనివారం ఫిర్యాదు చేసినట్లు వెల్లడించారు. అయితే, పంచాయితీకి ఫిర్యాదు చేసిన విషయంలో అహిర్వార్ను ఆరా తీయగా.. ఎటువంటి సమాచారం ఇవ్వలేదన్నారు. ఇద్దరు వ్యక్తుల వయసు 40 నుంచి 45 మధ్య ఉంటుందని తెలిపారు. ఇక, మూత్రం విసర్జన బాధితుడ్ని మధ్యప్రదేశ్ సీఎం శివరాజ్ సింగ్ చౌహన్ కలిసి.. అతడికి పాదపూజ చేసి ఆ నీళ్లు నెత్తిపై చల్లుకున్న విషయం తెలిసిందే.