వందేభారత్ రైల్లో హలాల్ టీ సర్వ,,,,ప్రయాణికుడు తీవ్ర అభ్యంతరం

వందేభారత్ రైల్లో సిబ్బంది సర్వ్ చేసిన టీపై హైడ్రామా చోటుచేసుకుంది. సిబ్బంది, ప్రయాణికుల మధ్య ఇది గొడవకు దారితీసింది. దీనికి సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. అసలు టీ గురించి ఎందుకు ఈ రాద్దాంతం? అంతలా గొడవపడటానికి ఏముంది? అనుకుంటున్నారా?.. హలాల్ సర్టిఫైడ్ టీ ఇవ్వడమే ఇందుకు కారణం. దీనిపై ప్రయాణికుడు అసహనం వ్యక్తం చేస్తూ.. సిబ్బందితో వాగ్వాదానికి దిగాడు. శ్రావణమాసంలో ఇలాంటివి ఎలా సర్వ్ చేస్తారమని నిలదీయగా.. సిబ్బంది మాత్రం అతడికి సర్ది చెప్పే ప్రయత్నం చేశారు. అది పూర్తిగా శాకాహార ప్రోడక్ట్ అని వివరించారు.

శ్రావణంలో హలాల్ టీ?

‘శ్రావణ మాసంలో హలాల్ సర్టిఫైడ్‌ టీ ఎలా ఇస్తారా?’ అని ప్రయాణికుడు ప్రశ్నించగా.. దీనికి రైల్వే సిబ్బంది ‘అంటే ఏంటి’ఆశ్చర్యంగా ముఖం పెట్టి అడిగాడు. ‘మీకు తెలిసే ఉంటుంది.. హలాల్ సర్టిఫైడ్ అంటే ఏంటో చెప్పండి.. మనకు ISI సర్టిఫికేట్ ఏంటో తెలుసు.. హలాల్ సర్టిఫికేట్ అంటే ఏంటో కూడా వివరించండి.. అందరూ ఇది తెలుసుకోవాలి..’ అని ప్రయాణికుడు మండిపడ్డాడు.

దీనికి రైల్వే ఉద్యోగి బదులిస్తూ ‘ఇది మసాలా టీ ప్యాకెట్ సర్... ఇది పూర్తిగా వెజిటేరియన్‌ ప్రొడక్ట్.. మీరు అనవసరంగా వీడియో తీస్తున్నారు.. ఛాయ్‌ అనేది 100 శాతం వెజిటేరియన్‌ సర్’ అని ఒకింత అసహనం వ్యక్తం చేశాడు. అతడి సమాధానానికి ప్రయాణికుడికి చిర్రెత్తుకొచ్చింది. ‘నాకు ఎలాంటి సర్టిఫికేషన్‌లు అవసరం లేదు. అలా అనుకుంటే స్వస్తిక్ ముద్ర వేయండి’ అని డిమాండ్ చేశారు. కచ్చితంగా ఆలోచిస్తామని రైల్వే ఉద్యోగి తిరిగి బుదలిచ్చాడు. చాలా సేపు ఇరువురి మధ్య ఇలా వాగ్వాదం జరిగింది.

దీనిపై తోటి ప్రయాణికులు కూడా అభ్యంతరం వ్యక్తంచేశారు. టీ సాచెట్స్‌కి హలాల్ సర్టిఫికేషన్ ఇవ్వాల్సిన అవసరం ఏంటని ప్రశ్నించారు. ఈ మొత్తం తతంగాన్ని అక్కడున్నవారు వీడియో తీసి సోషల్ మీడియాలో షేర్ చేశారు. దీంతో ఇది ప్రస్తుతానికి సోషల్ మీడియాలో వైరల్ అవుతోంది. దీనిపై నెటిజన్లు భిన్నంగా స్పందిస్తున్నారు. కొందరు ప్రయాణికుడ్ని సమర్దించగా... మరి కొందరు రైల్వే ఉద్యోగికి మద్దతుగా కామెంట్స్ చేస్తున్నారు. ప్యాసింజర్ అంతలా నిలదీస్తున్నా..ఏ మాత్రం అసహనానికి గురి కాకుండా చాలా ఓపిగ్గా మాట్లాడాడని ప్రశంసిస్తున్నారు.

ఈ వీడియో వైరల్ కావడంతో ఐఆర్‌సీటీసీ హలాల్ టీపై వివరణ ఇచ్చింది. ట్వీట్ చేసిన ఐఆర్‌సీటీసీ ‘పేర్కొన్న బ్రాండ్ ప్రీమిక్స్ టీకి తప్పనిసరిగా ఎఫ్ఎస్ఎస్ఏఐ సర్టిఫికేషన్ ఉంది. ఉత్పత్తి 100% శాఖాహారం.. గ్రీన్ డాట్ సూచన తప్పనిసరి. ఇంకా ఉత్పత్తి సంస్థ ప్రకారం.. హలాల్ సర్టిఫికేషన్ తప్పనిసరి చేసే అటువంటి ఉత్పత్తులను ఇతర దేశాలకు కూడా ఎగుమతి చేస్తుంటారు’ అని పేర్కొంది. అటు, రైల్వే మంత్రిత్వ శాఖ కూడా స్పందిస్తూ.. ప్రయాణికులకు పూర్తి శాకాహార టీని అంతర్జాతీయ ప్రమాణాలతో అందజేస్తున్నామని స్పష్టం చేసింది.