జగన్ సర్కార్ కోట్ల అప్పుల్లో కూరుకుపోయింది,,, పురంధేశ్వరి

జగన్ సర్కార్ కోట్ల అప్పుల్లో కూరుకుపోయిందని బీజేపీ ఏపీ అధ్యక్షురాలు దగ్గుబాటి పురంధేశ్వరి విమర్శించారు. దేశం కోసం నిరంతరం పనిచేసే పార్టీ ఆమె అన్నారు. ఏపీకి బీజేపీ ఏమీ చేయలేదని దుష్ప్రచారం చేస్తున్నారని విమర్శించారు. తన తండ్రి నందమూరి తారక రామారావు ఆశీసులతోనే ఈ స్టాయికి ఎదిగానన్నారు. ఏపీ బీజేపీ చీఫ్‌గా బాధ్యతలు చేపట్టాక తొలిసారి విశాఖ చేరుకున్న పురంధేశ్వరికి బీజేపీ శ్రేణులు ఘన స్వాగతం పలికాయి.

ఏపీ వేల కోట్లు అప్పులో కూరుకుపోయిందన్నారు పురంధేశ్వరి. వేల ఇళ్లు కేంద్రం కేటాయించిందని.. దీనిపై రాష్ట్ర ప్రభుత్వం శ్వేత పత్రం విడుదల చేయాలని డిమాండ్ చేశారు. వేల కోట్లతో ఏపీలో రైల్వే అభివృద్ధి పనులు జరుగుతున్నాయని.. రూ.రెండు వేల కోట్లతో అనకాపల్లి - ఆనందపురం ఆరు లైన్లు రోడ్డును కేంద్రం నిర్మించిందన్నారు. కేంద్రం ఇన్ని రోడ్డులు నిర్మిస్తుంటే.. రాష్ట్ర ప్రభుత్వం ఎన్ని రోడ్లు నిర్మించిందో చెప్పాలన్నారు.

ఏపీలో రోడ్డులు గుంతలమయంగా ఉన్నాయని.. రైల్వే జోన్ ఆలస్యానికి కారణం రాష్ట్ర ప్రభుత్వం భూములు కేటాయించకపోవడమే అన్నారు. మన్యం ప్రాంతంలో ఉన్న బాక్సైట్ తవ్వకాలు చేసి జేబులు నింపుకుంటున్నారని.. ఏపీలో ఒక ఎంపీకే రక్షణ లేకపోతే సామాన్య ప్రజల పరిస్థితి ఏంటని ప్రశ్నించారు. విచ్చలవిడిగా విద్యుత్ ఛార్టీలు పెంచుతున్నారని.. మద్యం పేరుతో దోపిడి చేస్తున్నారని ధ్వజమెత్తారు. ప్రజలు మరోసారి మోసపోవద్దని.. స్టీల్ ఫ్లాంట్ ఉద్యోగుల సంక్షేమానికి కట్టుబడి ఉన్నామన్నారు. ఉద్యోగులకు న్యాయం చేసే దిశగా కృషి చేస్తామన్నారు.

మరోవైపు ఏపీ అప్పులపై పురంధేశ్వరి కేంద్ర ఆర్థికశాఖ మంత్రి నిర్మలా సీతారామన్‌కు ఫిర్యాదు చేశారు. జగన్‌ ప్రభుత్వం నిధులు మళ్లించడంతోపాటు విచ్చలవిడిగా రుణాలు తీసుకుంటోందని ఆరోపించారు. దీని వల్ల రాష్ట్ర ప్రజలపై అప్పుల భారం పెరుగుతోందని విమర్శించారు. జగన్‌ ప్రభుత్వం వివిధ రూపాలలో తీసుకున్న అప్పులు, చెల్లించాల్సిన బకాయిలు, నిధుల మళ్లింపు వంటి అంశాలపై ఫిర్యాదులో పేర్కొన్నారు. రాష్ట్రం ఏర్పడిన కొత్తలో మొత్తం అప్పులు రూ.97వేల కోట్లు ఉంటే.. 2014 నుంచి 2019 నాటికి అది రూ.3,62,375 కోట్లకు పెరిగిందన్నారు పురంధేశ్వరి. జగన్‌ ప్రభుత్వ హయాంలో ఆ అప్పు రూ.10,77,000 కోట్లకు పెరిగిందన్నారు. నాలుగేళ్ల వైసీసీ పాలనలో రూ.7,14,625 కోట్లకు అప్పులు తీసుకున్నారన్నారు. రుణాలు, బాకాయిలు, మళ్లించిన నిధుల విషయంలో జగన్‌ సర్కారు ప్రజలకు సమాధానం చెప్పాలన్నారు.

అంతేకాదు గడిచిన తొమ్మిదేళ్లలో రూ.20 వేల కోట్లు ఒక్క పీఎమ్‌ఏవై కింద ఇచ్చిందని పురంధేశ్వరి గుర్తు చేశారు. ఇక ఆంధ్రప్రదేశ్‌కి ఎన్‌ఆర్‌జీపీ కింద 2022 – 23 వరకు 8 వేలకు కోట్లకు పైగా వచ్చాయని.. రాష్ట్రంలో 90 లక్షల మందికి ఉచిత‌ బియ్యం అందుతున్నాయన్నారు. ఈ ఏడాది బియ్యం ద్వారా 10 వేల కోట్లకు పైగా రాష్ట్రానికి అందిందని.. సీఎం జగన్ ఎన్నికల ముందు ప్రతీ రైతుకు రూ.12 వేలు ఇస్తామన్న హమీ ఏమైందని ప్రశ్నించారు. కేంద్రం ఇస్తున్న రూ.6 వేలు ఎందుకు చెప్పడం లేదని.. గ్రామాల అభివృద్ధికి కేంద్రం నేరుగా సర్పంచ్‌ల అకౌంట్‌లలోకి నిధులు విడుదల చేస్తుంటే ప్రభుత్వం పక్కదారి పట్టించిందన్నారు.