యువకుడి పెదాలు కోసిన యువతి కుటుంబం

ప్రేమించుకుని గొడవలు పడి.. ఆ తర్వాత అవి సద్దుమణిగి పెళ్లి చేసుకునేవారు చాలా మంది ఉంటారు. కొంత మంది ప్రేమ ఆ గొడవలతోనే అంతమైపోతూ ఉంటుంది. ఇంకా కొంతమంది ఎన్ని గొడవలు వచ్చినా కలిసే ఉంటారు. అయితే ఓ జంట ఐదేళ్లు ప్రేమించుకున్నారు. అయితే చిన్న చిన్న గొడవలు వారి మధ్య పెద్ద వాగ్వాదానికి కారణమయ్యాయి. దీంతో ఆ యువతి తన కుటుంబసభ్యులకు విషయం తెలియజేసింది. దీంతో వారు.. ప్రేమికులను కలిపేందుకు వారిని ఇంటికి పిలిపించారు. అక్కడ వారు కలవడం విషయం పక్కన పెడితే పెద్ద గొడవ జరిగింది. ఈ గొడవలో యువతి కుటుంబ సభ్యులు యువకుడి పెదాలని కోసేశారు. ఈ దారుణ ఘటన పశ్చిమ బెంగాల్‌లో చోటు చేసుకుంది.

పశ్చిమ బెంగాల్‌ బీర్భూమ్ జిల్లా కాశీపూర్ గ్రామానికి చెందిన మోమినుల్ ఇస్లాం.. అదే గ్రామానికి చెందిన బోజోఖాన్ అనే వ్యక్తి కుమార్తెను ప్రేమించాడు. గత 5 ఏళ్ల నుంచి వీరి ప్రేమ సాఫీగానే సాగింది. అయితే కొంత కాలంగా వారిద్దరి మధ్య గొడవలు మొదలయ్యాయి. వారిద్దరు ఎన్ని సార్లు మాట్లాడుకున్నా పరిస్థితి సద్దుమణగలేదు. దీంతో ఆ యువతి జరిగిన విషయాన్ని తన తల్లిదండ్రులకు చెప్పింది. దీంతో మోమినుల్ ఇస్లాంను యువతి కుటుంబ సభ్యులు తమ ఇంటికి పిలిపించారు. జరిగిన గొడవపై ఇద్దరికీ సర్దిచెప్పాలని చూశారు. మొదట యువతీ యువకుల మధ్య గొడవలు పక్కన పెట్టి.. పెళ్లి చేయాలని ప్రయత్నించారు. అయితే మోమినుల్ ఇస్లాం.. యువతి కుటుంబ సభ్యులు చెప్పింది వినకపోవడంతో పెద్ద ఘర్షణ తలెత్తింది. దీంతో మోమినుల్ ఇస్లాంపై ప్రియురాలి కుటుంబ సభ్యులు దాడికి దిగారు. అతడ్ని బాగా కొట్టి.. పెదవులను కోసేశారు. ఈ ఘటనతో తీవ్ర రక్త స్రావం అయి మోమినుల్ ఇస్లాం రక్తంలోనే తడిసిపోయాడు.

ఘటన తర్వాత ఎలాగోలా అక్కడి నుంచి ఇంటికి చేరుకున్నాడు. అది చూసిన మోమినుల్ ఇస్లాం కుటుంబ సభ్యులు.. ఒక్కసారిగా షాక్ అయ్యారు. వెంటనే బోల్‌పూర్‌లోని ఆస్పత్రికి తరలించి మోమినుల్ ఇస్లాంకు చికిత్స అందించారు. అక్కడ డాక్టర్ల సూచనతో జిల్లా ఆస్పత్రికి తరలించారు. అయితే ఆస్పత్రిలో యువకుడికి సరైన చికిత్స అందించడం లేదని యువకుడి బంధువులు తీవ్ర ఆవేదన వ్యక్తం చేశారు. మరోవైపు.. ఈ ఘటన బుధవారం జరగ్గా.. మోమినుల్ ఇస్లాం తరఫు బంధువులు.. అతని ప్రియురాలు ఇంటిముందు శుక్రవారం ఆందోళనకు చేపట్టారు. ఈ ఘటన విని ఆ గ్రామస్థులు అందరూ షాక్‌కు గురయ్యారు.