సాహసం వికటించి 68 వ అంతస్థు నుంచి పడిన యువకుడు మృతి

కొంతమందికి సాహసాలు చేయడం అంటే చాలా ఇష్టం. మరికొంత మంది వారు చేసిన సాహసాలను సోషల్ మీడియాలో పెట్టుకుని వాటి ద్వారా వచ్చిన ఆదాయంతో బతుకుతూ ఉంటారు. ఇంకొంత మంది సాహసాలు చేయడానికే దేశ విదేశాల్లో తిరుగుతుంటారు. తమ సాహసాలతో ఫేమస్ కావాలని భావిస్తూ ఉంటారు. ఈ క్రమంలోనే కొంతమంది ప్రాణాలు కోల్పోవడం, ఆస్పత్రి పాలు కావడం మనం చూస్తూనే ఉన్నాం. తాజాగా ఓ యువకుడు పెద్ద భవనంపైకి ఎక్కాడు. అనంతరం అక్కడి నుంచి కింద పడటంతో దుర్మరణం పాలయ్యాడు. ఈ ఘటన హాంకాంగ్‌లో చోటు చేసుకుంది.

రెమీ లూసిడి అనే 30 ఏళ్ల యువకుడికి సాహసాలు చేయడమంటే ఎనలేని ఇష్టం. ఫ్రాన్స్‌కు చెందిన ఈ రెమీ లూసిడి.. ఫ్రెంచ్ డేర్‌డెవిల్‌గా ప్రసిద్ధి చెందాడు. ఇప్పటివరకు ఎన్నో సాహసాలను చేసిన లూసిడి తాజాగా చేసిన ఓ సాహసం.. తిప్పికొట్టి ప్రాణాలు కోల్పోయాడు. హాంకాంగ్ అధికారులు చెప్పిన వివరాల ప్రకారం.. హాంకాంగ్‌లోని ది ట్రెగంటెర్ టవర్ కాంప్లెక్స్‌ అనే పెద్ద భవనాన్ని ఎక్కాలని లూసిడి నిర్ణయించుకున్నాడు. అందుకోసం ఆ టవర్ కాంప్లెక్స్ వద్దకు చేరుకున్న లూసిడి.. అందులోకి వెళ్లేందుకు అక్కడ ఉన్న సెక్యూరిటీ సిబ్బందికి ఓ అబద్ధం చెప్పాడు. ఆ టవర్ కాంప్లెక్స్‌లోని 40 వ అంతస్థులో తన ఫ్రెండ్ ఉంటాడని.. అతడిని కలిసేందుకు వెళ్తానని చెప్పి లోపలికి ప్రవేశించాడు.

సోమవారం సాయంత్రం 6 గంటల సమయంలో లూసిడి.. ఈ ది ట్రెగంటెర్ టవర్ కాంప్లెక్స్ లోపలికి వెళ్లాడు. మొదట లిఫ్ట్‌లో ప్రయాణించాడు. 49 వ అంతస్థు వరకు లిఫ్ట్‌లో వెళ్లిన లూసిడి.. అక్కడి నుంచి మెట్ల మార్గం ద్వారా పైకి ఎక్కాడు. అందుకు సంబంధించిన దృశ్యాలు.. ఆ కాంప్లెక్స్‌లో ఉన్న సీసీటీవీల్లో రికార్డ్ అయ్యాయి. చివరికి భవనం పై అంతస్థుకు చేరుకున్న లూసిడి.. అక్కడి నుంచి ఫొటోలు, వీడియోలు కూడా తీసుకున్నాడు. అయితే అక్కడ భవనం అంచుకు చేరగా.. కాలు జారిపోయింది. దీంతో కింద పడిపోయాడు. మొదట 68 వ అంతస్థులో ఉన్న ఓ ఫ్లాట్‌ కిటికీకి లూసిడి చిక్కుకున్నాడు. కిటికీలో లూసిడి ఇరుక్కున్న సమయంలో ఆ ఫ్లాట్‌లో పనిచేసే ఓ పనిమనిషి చూసి.. ఆశ్చర్యపోయింది. ఆ తర్వాత అక్కడి నుంచి జారిపోయిన లూసిడి.. కింద పడి దుర్మరణం చెందాడు.

సాయంత్రం 7 గంటల 38 నిమిషాలకు కిటికీలో ఇరుక్కుపోయిన లూసిడిని చూసిన పనిమనిషి వెంటనే పోలీసులకు ఫోన్ చేసి విషయం చెప్పింది. దీంతో వెంటనే పోలీసులు ఆ కాంప్లెక్స్ వద్దకు చేరుకుని చూసేసరికి.. అప్పటికే లూసిడి కింద పడి చనిపోయాడు. ఘటనా స్థలంలో లూసిడి ఉపయోగించిన కెమెరాను పోలీసులు స్వాధీనం చేసుకున్నారు. అయితే ఆ కాంప్లెక్స్‌లోని 40 వ ఫ్లోర్‌లో తన మిత్రుడు ఉన్నాడని లూసిడి.. సెక్యూరిటీకి చెప్పిన విషయం ఆధారంగా.. అక్కడ ఉన్న వ్యక్తిని ప్రశ్నించగా.. తనకేమీ తెలియదని పేర్కొన్నాడు. అసలు తాను లూసిడిని ఎప్పుడూ చూడలేదని వెల్లడించాడు.