కర్నూలు ఎమ్మెల్యే హఫీజ్ ఖాన్ తనను వేధిస్తున్నారంటూ యువతి సెల్పీ వీడియో

కర్నూలు వైసీపీ ఎమ్మెల్యే అబ్ధుల్ హఫీజ్ ఖాన్‌ తనను తీవ్రంగా వేధిస్తున్నారని, పోలీసులతో కలిసి కేసులు పెట్టిస్తున్నానిర శోభారాణి అనే యువతి విడుదల చేసిన సెల్పీ వీడియో కలకలం సృష్టిస్తోంది. జిల్లా ఎస్పీ తన వీడియోపై స్పందించి ఎమ్మెల్యేపై చర్యలు తీసుకోవాలని, లేకపోతే ఆత్మహత్యే శరణ్యం అంటూ యువతి ఆవేదన వ్యక్తం చేసింది. మూడు రోజుల క్రితం కూడా ఎమ్మెల్యే హఫీజ్ ఖాన్, ఓ మహిళ వాట్సాప్ కాల్ మాట్లాడిన వీడియో కలకలం సృష్టించింది. ఈ క్రమంలో ఇప్పుడు మరో యువతి వీడియో రావడం ప్రకంపనలు రేపుతోంది.

'నా పేరు శోభ. నేను గతంలో వన్‌టౌన్‌లో ఉండేదాన్ని. ఫ్యాషన్ డిజైనర్‌గా పనిచేస్తున్నా. గతంలో ఎన్నికల్లో నామినేషన్ కూడా వేశాను. ఎమ్మెల్యే తీరుతో గత ఏడాదిగా ఇబ్బంది పడుతున్నారు. వన్‌టౌన్ సీఐ వెంకటరమణ కావాలని ఎమ్మెల్యే చెప్పారని నాపై కేసులు పెడుతున్నారు. దానికి సంబంధించిన వివరాలను ఎస్పీకి పంపిస్తున్నా. రాత్రికి రాత్రి నాపై కేసులు పెడుతున్నారు. ఎలాంటి ఎవిడెన్స్ లేకపోయినా, నేను ఏం తప్పు చేయకపోయినా కేసులు పెట్టి బెదిరిస్తున్నారు. వారి వేధింపులు భరించలేకపోతున్నా.. ఎనిమిది నెలల క్రితం ఎఫ్‌ఐఆర్ ఫైల్ చేశారు. అప్పట్లో హోంమంత్రికి ఫిర్యాదు చేసి సాక్ష్యాలు కూడా అందించా. రెండు రోజుల క్రితం మరో కేసు ఫైల్ చేశారు. నాపై పలుమార్లు దాడులు, హత్యాయత్నం చేయించారు. అయినా ధైర్యంతో ముందుకెళ్తున్నా' అని వీడియోలో యువతి కన్నీళ్లు పెట్టుకుంది.

'కేసు నమోదు చేసిన తర్వాత నాకు ఎఫ్‌ఐఆర్ కాపీలు పంపడం లేదు. ఎమ్మెల్యే హఫీజ్ ఖాన్ అనుచరుడు నాకు వాట్సప్‌లో ఎఫ్‌ఐఆర్ కాపీలు పంపుతున్నారు. నాకు సంబంధించిన సాక్ష్యాలు లాక్కోవడంతో పాటు బట్టలు లేకుండా నగ్నంగా పూజలు చేయించారు. ఎమ్మెల్యే వేధింపుల వల్ల నాతో పాటు కుటుంబం ఇబ్బందులు పడుతుంది. ఇప్పటికీ ఉన్నతాధికారులు స్పందించకపోతే ఆత్మహత్య చేసుకోవడం తప్ప వేరే దారి లేదు. సీఐ వెంకటరమణ మరిన్ని ఇబ్బందులు పెడుతున్నారు. వీటికి సంబంధించిన ఎవిడెన్స్ అన్నీ ఎస్పీకి పంపిస్తున్నా' అని శోభోరాణి ఆవేదన వ్యక్తం చేసింది.

కాగా కొద్దిరోజుల క్రితం రూ.3 కోట్ల ఆర్థిక వ్యవహారానికి సంబంధించి ఎమ్మెల్యేతో మహిళ మాట్లాడిన ఆడియో సోషల్ మీడియాలో వైరల్‌గా మారింది. అయితే అందులో తప్పేమీ మాట్లాడలేదని ఎమ్మెల్యే హఫీజ్ ఖాన్ కొట్టిపారేశారు. ఈ క్రమంలో శోభారాణి పేరుతో సెల్ఫీ వీడియో వైరల్ అవుతోంది. అయితే ఈ ఆరోపణలు చేసిన శోభారాణి పేరుతో ఉన్న మహిళ మాత్రం ఇంకా అందుబాటులోకి రాలేదు.