కానిస్టేబుల్ రమేష్ హత్య కేసులో ట్విస్ట్.. ప్రియుడి కోసం సొంత భార్యే ఘాతుకం

విశాఖలో కలకలం సృష్టించిన కానిస్టేబుల్ రమేష్ హత్య కేసులో పోలీసుల విచారణలో అసలు వాస్తవాలు వెలుగులోకి వస్తున్నాయి. వివాహేతర సంబంధమే ఈ హత్యకు కారణమని పోలీసులు తేల్చారు. ప్రియుడి కోసం భర్తను భార్య హత్య చేయించి, ఆ తర్వాత గుండెనొప్పితో మృతి చెందాడంటూ పోలీస్ స్టేషన్‌లో కంప్లైంట్ ఇచ్చింది. కానీ పోలీసులు కేసు నమోదు చేసి విచారణ చేపట్టగా.. పోస్టుమార్టం రిపోర్ట్‌తో భార్య ఆడిన డ్రామా బట్టబయలైంది.

ఈ కేసుకు సంబంధించిన వివరాలను శుక్రవారం నగర కమిషనర్ సీపీ తీవిక్రమ్ వర్మ వెల్లడించారు. కానిస్టేబుల్ రమేష్‌ భార్య శివాని ఎదురు ఇంట్లో ఉంటున్న ట్యాక్సీ డ్రైవర్‌ రామారావుతో వివాహేతర సంబంధం నడుపుతోంది. దీంతో భర్తను అడ్డు తొలగించుకునేందుకు ప్రియుడి రామారావుతో కలిసి హత్యకు ప్లాన్ చేసింది. ఇందుకోసం తన దగ్గర ఉన్న బంగారాన్ని తాకట్టు పెట్టి హత్య కోసం రామారావుకు రూ.లక్షన్నర డబ్బులు ఇచ్చింది. దీంతో రమేష్‌ను హత్య చేసేందుకు తన స్నేహిడుతైన నీలా అనే వ్యక్తికి రామారావు రూ.లక్ష ఇచ్చాడు.

ముందుగా చేసుకున్న ప్లాన్ ప్రకారం మూడు రోజుల క్రితం భర్త రమేష్‌కు ఫుల్లుగా శివాని మద్యం తాగించింది. అనంతరం మత్తులోకి వెళ్లగానే ఇంటి బయట వేచి ఉన్న ప్రియుడు రామారావు, హంతకుడు నీలాను పిలిచింది. రమేష్ కదలకుండా శివాని కాళ్లు పట్టుకోగా.. నీలా అనే వ్యక్తి దిండుతో మొఖం మీద గట్టిగా నొక్కడంతో ఊపిరాడక చనిపోయాడు. అనంతరం హత్య నుంచి తప్పించుకునేందుకు తన భర్త గుండెపోటుతో చనిపోయాడంటూ పోలీసులకు చెప్పుకొచ్చింది. పోలీసులు మృతదేహాన్ని పోస్టుమార్టం తరలించగా.. ఊపిరాడక రమేష్ చనిపోయినట్లు తెలింది. దీంతో పోలీసులు కేసు నమోదు చేసుకుని హత్య కోణంలో దర్యాప్తు చేపట్టారు.

భార్య శివానిని అదుపులోక తీసుకుని తమదైన శైలిలో ప్రశ్నించగా.. ప్రియుడు కోసం భర్తను చంపించినట్లు బయటపడింది. శివాని, రామారావు మధ్య ఏడాదిన్నరగా ప్రేమ వ్యవహరం నడుస్తున్నట్లు పోలీసులు గుర్తించారు వీరి ప్రేమ వ్యవహరంపై గతంలో అనేకసార్లు భార్యాభర్తల మధ్య గొడవలు జరిగాయి. పిల్లల్ని తనకు వదిలేసి ప్రియుడుతో వెళ్లిపోవాలని భార్యను రమేష్ కోరాడు. కానీ పిల్లలు, ప్రియుడు ఇద్దరు కావాలనుకున్న శివాని.. అడ్డుగా ఉన్న రమేష్‌ను చంపించింది. శివానికి నేర స్వభావం ఉందని, ఆమెకు తల్లిదండ్రులతో సైతం గొడవలు ఉన్నాయని పోలీసులు చెబుతున్నారు. A1 శివాని, A2 ప్రియుడు రామారావు. A3 నిలాపై పోలీసులు కేసు నమోదు చేసి అరెస్ట్ చేశారు.