ఏపీలో ఇక నుంచి డిజిటల్ డ్రైవింగ్ లైసెన్సులు

వాహనదారులకు ఊరట కలిగించేలా ఏపీ ప్రభుత్వం కీలక నిర్ణయం తీసుకుంది. పేపర్ విధానంలో డ్రైవింగ్ లైసెన్స్, రిజిస్ట్రేషన్ సర్టిఫికేట్ జారీని శుక్రవారం నుంచి నిలిపివేయనుంది. ఇక నుంచి డిజిటల్ డ్రైవింగ్ లైసెన్స్, ఆర్సీ కార్డులను జారీ చేయనుంది. ఈ విధానం వల్ల ఇక నుంచి లైసెన్స్ కార్డు, పోస్టల్ ఛార్జీల కోసం దరఖాస్తుదారులు డబ్బులు చెల్లించాల్సిన అవసరం ఉండదు. దీని వల్ల డబ్బులు ఆదా అవుతాయి.

చాలామంది డ్రైవింగ్ లైసెన్స్‌ను తమ ఇంట్లో మర్చిపోతారు. ఇలాంటి సమయంలో ట్రాఫిక్ పోలీసులకు బుక్కై జరిమానాలు కడుతూ ఉంటారు. అయితే డిజిటల్ విధానంలో డ్రైవింగ్ లైసెన్స్‌ల వల్ల అలాంటి ఇబ్బంది అసలు ఉండదు. ట్రాఫిక్ పోలీసులు అడిగినప్పుడు మీ ఫోన్‌ ద్వారా సులువుగా చూపించవచ్చు. దరఖాస్తుదారుడు అప్లై చేసుకున్న తర్వాత పరిశీలన చేపట్టి డిజిటల్ కార్డు జారీ చేశారు. దీనిని డిజి లాకర్, ఎం-పరివాహన్ ఫ్లాట్‌ఫామ్‌లో అందుబాటులో ఉంచుతారు. ఆ అప్లికేషన్లలోకి లాగిన్ అయి మీ డ్రైవింగ్ లైసెన్స్ కార్డులను డౌన్‌లోడ్ చేసుకోవచ్చు. అససరం అనుకుంటే వాటిని ప్రింట్ చేసుకోవచ్చు.

పోలీసులు వాహనం ఆపినప్పుడు ఎం-పరివాహన్, డిజి లాకర్‌లోని డిజిటల్ డ్రైవింగ్ లైసెన్స్‌, రిజిస్ట్రేషన్ కార్డులను చూపించవచ్చు. ఇక నుంచి పేపర్ విధానంలో కార్డులను రవాణాశాఖ జారీ చేయదు. అన్నీ ఆన్‌లైన్‌లో అందుబాటులో ఉంచుతుంది. ప్రస్తుతం పేపర్ విధానంలో జారీ చేస్తున్న డ్రైవింగ్ లైసెన్స్ కార్డుకు రూ.200, పోస్టల్ ఛార్జి రూ.35 చెల్లించాల్సి వస్తుంది. డిజిటల్ విధానంలో కార్డు జారీ చేయడం వల్ల ఆ ఛార్జీలను ఇక నుంచి రవాణాశాఖ వసూలు చేయదు. ఇవి వాహనదారులకు ఊరట కలిగించే అంశమని చెప్పవచ్చు.

పేపర్‌లెస్ విధానంలో లైసెన్స్, రిజిస్ట్రేషన్ సర్టిఫికేట్లను జారీ చేయాలని రాష్ట్ర ప్రభుత్వాలకు కేంద్ర ప్రభుత్వం సూచించింది. దీంతో అన్ని రాష్ట్ర ప్రభుత్వాలు ఆ దిశగా అడుగులు వేస్తున్నాయి. కానీ ఇప్పటివరకు ఏ రాష్ట్ర ప్రభుత్వం దానిని అమల్లోకి తీసుకురాలేదు. తొలిసారి ఏపీ ప్రభుత్వం డ్రైవింగ్ లైసెన్సుల జారీలో డిజిటల్ విధానాన్ని అమలు చేస్తోంది. ప్రస్తుతం డిజిటల్ యుగం నడుస్తోంది. లావాదేవీలతో పాటు అన్నీ ఆన్‌లైన్‌లోనే జరుగుతున్నాయి. కేంద్ర ప్రభుత్వం కూడా డిజిటల్ ఇండియా ప్రాజెక్టును ప్రకటించింది. ప్రభుత్వ శాఖల్లో పేపర్ విధానానికి స్వస్తి పలికి డిజిటల్ విధానంలోనే అన్నీ పనులు చేసేలా అత్యాధునిక టెక్నాలజీని ఉపయోగించుకుంటోంది. అటు తెలంగాణ ప్రభుత్వం కూడా డిజిటల్ విధానంలో డ్రైవింగ్ లైసెన్స్ కార్డులు జారీ చేయాలని చూస్తోంది.