గ్రామ పంచాయతీ ఉప ఎన్నికల ఫలితాలపై ఆసక్తికర చర్చ

ఏపీలో గ్రామ పంచాయతీలకు జరిగిన ఉప ఎన్నికల్లో ఆసక్తికర ఫలితాలొచ్చాయి. మొత్తం 66 పంచాయతీలకు ఉపఎన్నికలు జరగ్గా.. ముందే 31 స్థానాల్లో అధికార వైఎస్సార్సీపీకి ఏకగీవ్రం అయ్యాయి. దీంతో శనివారం 35 పంచాయతీలు, 245 వార్డులకు పోలింగ్ నిర్వహించారు. వీటిలో ఎక్కువ స్థానాలను వైఎస్సార్సీపీ గెలుచుకోగా.. టీడీపీ రెండో స్థానంలో నిలిచింది. టీడీపీ 11 స్థానాల్లో విజయం సాధించింది. 22 స్థానాల్లో వైఎస్సార్సీపీ మద్దతుదారులు గెలుపొందారు. వార్డుల విషయానికి 130 చోట్ల వైఎస్సార్సీపీ మద్దతుదారులు గెలుపొందగా. 94 చోట్ల టీడీపీ బలపర్చిన అభ్యర్థులు గెలిచారు.

ఈ ఉపఎన్నికల ఫలితాలు టీడీపీ కేడర్లో జోష్ తీసుకొచ్చాయి. వైఎస్సార్సీపీ గెలుపు కోసం ఎన్ని రకాలుగా ప్రయత్నించినప్పటికీ తమ పార్టీ మంచి ఫలితాలు రాబట్టిందని టీడీపీ శ్రేణులు చెబుతున్నాయి. ఇక చంద్రబాబు నాయుడైతే ఓ అడుగు ముందుకేసి.. జగన్ సర్కారు జనం విశ్వాసాన్ని కోల్పోయిందన్నారు. ఎన్నికలు ఎప్పుడు జరిగినా వైఎస్సార్సీపీని ఓడిస్తామని ఆయన ధీమా వ్యక్తం చేశారు.

ఈ ఎన్నికల ఫలితాలను విశ్లేషిస్తే.. టీడీపీ బలం పుంజుకుందనేది నిర్వివాదాంశం. కానీ ఆ బలం అధికారంలోకి వచ్చే స్థాయిలో ఉందా అనేదే ప్రశ్న. ఎన్నికల ఫలితాలు తమ పార్టీకే అనుకూలంగా వచ్చాయని.. జనం ఇప్పటికీ తమతోనే ఉన్నారని వైఎస్సార్సీపీ ధీమాగా చెబుతోంది. ఈ ట్రెండ్ చూస్తుంటే.. టీడీపీ ఒంటరిగా పోటీ చేస్తే.. వైఎస్సార్సీపీనే తిరిగి అధికారంలోకి వస్తుందని.. కాబట్టి పవన్‌తో పొత్తు పెట్టుకోవడం ఆ పార్టీకి తప్పదని జనసేన శ్రేణులు చెబుతున్నాయి. పవన్ కళ్యాణ్‌ను సీఎం చేసేందుకు అంగీకరించాలని కూడా డిమాండ్ చేస్తున్నారు.

పంచాయతీ ఉపఎన్నికల ఫలితాలు జగన్ సర్కారుకు మేలు చేసే అవకాశమే ఎక్కువ. మొన్నటి దాకా వై నాట్ 175 అంటూ ధీమాతో ఉన్న జగన్‌కు క్షేత్రస్థాయిలో వాస్తవమేంటో ఈ ఫలితాలతో బోధపడుతుంది. 31 స్థానాలు ఏకగ్రీవం కాకపోతే పరిస్థితి ఇంకెలా ఉండేదో ఆయన కంటే ఎక్కువగా మరెవరికీ తెలీదనడంలో సందేహం లేదు. ఈ ఫలితాలు టీడీపీకి ఆశాజనకంగానే ఉన్నాయి.. కానీ మరీ వార్ వన్ సైడ్ అయ్యేంతలా అయితే ఉన్నాయనైతే భావించలేం. జగన్ పాలన పట్ల నిజంగా జనంలో అంత అసంతృప్తి ఉంటే.. ఈ ఫలితాల్లోనే అది స్పష్టంగా వెల్లడయ్యేది.

గతంలో చంద్రబాబు నాయుడు అధికారంలో ఉన్నప్పుడు విశాఖ మున్సిపల్ కార్పొరేషన్ ఎన్నికలు నిర్వహించే విషయంలో తాత్సారం చేశారు. 2012లో జీవీఎంసీ ఎన్నికలు నిర్వహించాల్సి ఉన్నప్పటికీ రకరకాల కారణాలతో ఆ ఎన్నికలు జరగలేదు. తాము అధికారంలోకి వస్తే వంద రోజుల్లోనే జీవీఎంసీ ఎలక్షన్స్ నిర్వహిస్తామని బాబు హామీ ఇచ్చారు. కానీ జగన్ అధికారంలోకి వచ్చిన తర్వాతే ఎన్నికలు జరిగాయి. 2019 సార్వత్రిక ఎన్నికల్లో విశాఖలో టీడీపీ హవా నడిచినప్పటికీ.. 2021లో విశాఖ కార్పొరేషన్‌పై జగన్ పార్టీ జెండా పాతింది.

ఓడిపోతాననే భయంతోనే చంద్రబాబు విశాఖ కార్పొరేషన్ ఎన్నికలు నిర్వహించడం లేదని గతంలో వైఎస్సార్సీపీ ఎద్దేవా చేసింది. కానీ ఇప్పుడు జగన్ మాత్రం పంచాయతీ ఉపఎన్నికలకు వెళ్లడం వల్ల గ్రౌండ్ లెవల్‌లో పరిస్థితి ఏంటనేది అటు పార్టీలకు ఇటు ప్రజలకు క్లియర్‌గా తెలిసే ఛాన్స్ ఉంది.