దెందులూరు వైసీపీలో అసమ్మతి,,,ఈసారి అభ్యర్థిని మార్చాలని డిమాండ్

ఏలూరు జిల్లా దెందులూరు ఎమ్మెల్యే కొఠారు అబ్బయ్యచౌదరిపై సొంత పార్టీలోనే అసమ్మతిరేగింది. గత ఎన్నికల్లో అబ్బయ్యచౌదరి 17వేల ఓట్ల మెజార్టీతో గెలిచారని, ఈసారి 20వేల ఓట్ల తేడాతో ఓడిపోనున్నారని వైఎస్సార్‌సీపీ జిల్లా అధికార ప్రతినిధి ఆలపాటి నరసింహమూర్తి విమర్శించారు. ఎమ్మెల్యే అవినీతిపై పార్టీ పెద్దల దృష్టికి తీసుకెళ్లినా ప్రయోజనం లేదని.. వచ్చే ఎన్నికల్లో ఎమ్మెల్యే అభ్యర్థిని మారిస్తే తప్ప పార్టీకి పనిచేసే ప్రసక్తే లేదన్నారు. ఉప ఎన్నికల్లో పంచాయతీ వార్డు సభ్యులనూ గెలిపించుకోలేని పరిస్థితుల్లో ఉన్నారని ఘాటు వ్యాఖ్యలు చేశారు.

గత ఎన్నికల్లో నియోజకవర్గంలోని సీనియర్‌ నేతలు, కార్యకర్తలు ఎన్నో ప్రయాసలతో అబ్బయ్యచౌదరిని గెలిపించారన్నారు. ఆయన గెలిచిన తర్వాత వారిని పక్కనపెట్టి సొంత కోటరీ ఏర్పాటు చేసుకున్నారన్నారు. కోటరీతో నియోజకవర్గంలో మట్టి, ఇసుక మాఫియా దగ్గర నుంచి భూకబ్జాలు, జూదాలు, కోడిపందేలు, చేపల చెరువుల అక్రమ తవ్వకాలను ప్రోత్సహిస్తున్నారని ఆరోపించారు. పెదవేగి, దెందులూరు మండలాల్లో వైఎస్సార్‌సీపీకి ఓట్లు పడే పరిస్థితి లేదన్నారు. ఎమ్మెల్యే అబ్బయ్య చౌదరి నియంతృత్వ పోకడల కారణంగా పార్టీలో సీనియర్‌ నాయకులు ఉండలేని పరిస్థితులు కనిపిస్తున్నాయన్నారు.

ఎమ్మెల్యే స్థానికంగా ఉండాల్సింది పోయి.. విదేశాల్లో ఉంటూ ఇక్కడ పెత్తనం చేస్తున్నారని ఘాటు వ్యాఖ్యలు చేశారు. అవినీతి, అక్రమాలతో ఎమ్మెల్యే అబ్బయ్య చౌదరి పార్టీని భ్రష్టు పట్టించారని.. వచ్చే ఎన్నికలకు అభ్యర్థిని మార్చాలని నరసింహమూర్తి డిమాండ్ చేశారు. ఎమ్మెల్యే గెలుపు కోసం అహర్నిశలు కష్టపడిన నాయకులను కాదని.. కేవలం తన కోటరీకి చెందిన వ్యక్తులనే అందలమెక్కిస్తున్నారని మండిపడ్డారు. నియోజకవర్గంలో తలెత్తుకోలేని పరిస్థితుల్లో ఉన్నామని.. ఈ విషయాలన్నింటినీ పార్టీ అధిష్ఠానం దృష్టికి తీసుకెళ్తామన్నారు నరసింహమూర్తి.

వైఎస్సార్‌సీపీ అధికార ప్రతినిధిగా తనకు జగన్‌ సంతకంతో గుర్తింపుకార్డు ఉందని.. తనను తొలగించినట్లు పార్టీ నుంచి ఎలాంటి నోటీసులు రాలేదని చెప్పారు. అబ్బయ్యచౌదరిపై సీనియర్‌ నేతలు, కార్యకర్తలకు విశ్వాసం లేదనిజజ వచ్చే ఎన్నికల్లో పార్టీ అభ్యర్థిని మార్చాలని అధిష్ఠానం దృష్టికి తీసుకెళ్తామన్నారు. ఈ విషయాన్ని ఇప్పటికే లేళ్ల అప్పిరెడ్డి, సలహాదారు సజ్జల రామకృష్ణారెడ్డికి దృష్టికి తీసుకెళ్లామన్నారు. నరసింహమూర్తి ఎమ్మెల్యే అబ్బయ్య చౌదరిపై చేసిన ఆరోపణలు సంచలనంగా మారాయి. మరి ఎమ్మెల్యే ఈ వ్యాఖ్యలపై ఎలా స్పందిస్తారన్నది చూడాలి.