వివాదంగా మారిన యూనివర్సిటీ కొత్త సిలబస్‌,,,,మాజీ మంత్రి ఆత్మకథను చేర్చిన యూనివర్సిటీ

కేకే శైలజ. కేరళ మాజీ ఆరోగ్య మంత్రి. కరోనా సమయంలో ఆమె చేసిన సేవలకు దేశ, విదేశాల్లో ఎంతో గుర్తింపు లభించింది. దేశంలోనే తొలిసారి కొవిడ్ వైరస్ వెలుగు చూసిన కేరళలో సమర్థంగా అడ్డుకోవడంలో ఆమె పాత్ర కీలక పాత్ర పోషించారు. దీంతో ఆమెకు పలు అవార్డులు కూడా అందుకున్నారు. దీంతో కేరళలోని కన్నూర్ యూనివర్సిటీ ఆమెకు గౌరవంగా తమ పాఠ్యాంశాల్లో కేకే శైలజ ఆత్మకథను చేర్చింది. అయితే ఇప్పుడు ఈ నిర్ణయమే తీవ్ర వివాదాస్పదంగా మారింది. కన్నూరు యూనివర్సిటీ తీసుకున్న నిర్ణయం పట్ల పలు వర్గాల నుంచి తీవ్ర వ్యతిరేకత వ్యక్తం అవుతోంది. రాజకీయ ప్రయోజనాల కోసమే కేకే శైలజ ఆత్మకథను కన్నూర్ యూనివర్సిటీ సిలబస్‌లో చేర్చారంటూ తీవ్ర ఆరోపణలు వ్యక్తం అవుతున్నాయి.

కన్నూర్ విశ్వవిద్యాలయం తీసుకున్న నిర్ణయంపై కేరళ స్టూడెంట్స్ యూనియన్‌, కాంగ్రెస్ స్టూడెంట్స్‌ వింగ్ తీవ్రంగా వ్యతిరేకత వ్యక్తం చేస్తున్నాయి. రాజకీయ ప్రయోజనాలు ఆశించి కేకే శైలజ బయోగ్రఫీని యూనివర్సిటీ సిలబస్‌లో చేర్చారంటూ తీవ్ర స్థాయిలో మండిపడుతున్నాయి. యూనివర్సిటీ నిర్ణయాన్ని సేవ్ యూనివర్సిటీ కమిటీ కూడా తీవ్రంగా ఖండించింది. అయితే ఈ వివాదం తలెత్తడంతో కన్నూర్ విశ్వవిద్యాలయం కూడా స్పందించింది. దీనిపై ఆ యూనివర్సిటీ చెబుతున్న వాదన మాత్రం ఇందుకు పూర్తి భిన్నంగా ఉండటం గమనార్హం.

కన్నూర్ యూనివర్సిటీ అడ్‌హాక్ కమిటీ వెల్లడించిన వివరాల ప్రకారం.. ఈ ఆత్మకథ తప్పనిసరి పాఠ్యాంశం కాదని తెలిపింది. కోర్‌ రీడింగ్ సెక్షన్‌లో ఈ పుస్తకానికి చోటు ఉంటుందని.. అందులో మహాత్మాగాంధీ, బీఆర్‌ అంబేడ్కర్ వంటి ప్రముఖుల ఆత్మకథలు కూడా అందుబాటులో ఉంటాయని వివరణ ఇచ్చింది. అయితే ఈ వివాదంపై మాజీ మంత్రి కేకే శైలజ కూడా స్పందించారు. తన ఆత్మకథను యూనివర్సిటీ సిలబస్‌లో చేర్చిన విషయం తెలియదని ఆశ్చర్యం వ్యక్తం చేయడమ గమనార్హం. ఈ మేరకు తన ఆత్మకథను పాఠ్యాంశం చేర్చారని తెలియదంటూ ఫేస్‌బుక్‌లో ఆమె పోస్ట్ పెట్టారు. న్యూస్‌లో చూసి తాను ఈ విషయం తెలుసుకున్నట్లు వివరించారు.

అయితే కన్నూర్ యూనివర్సిటీ సిలబస్‌లో తన ఆత్మకథను చేర్చడంపై విశ్వవిద్యాలయ అధికారులకు తన అసమ్మతిని వ్యక్తం చేశారు. తన బయోగ్రఫీని కోర్ రీడింగ్ సెక్షన్‌లో చేర్చారని.. సిలబస్‌లో భాగం కాదని విశ్వవిద్యాలయ సిబ్బంది తనకు చెప్పినట్లు కేకే శైలజ వెల్లడించారు. కొవిడ్ వైరస్‌ మొదటి వేవ్, రెండో వేవ్‌ను కేరళ సర్కార్ సమర్థంగా ఎదుర్కోవడంలో కేకే శైలజ కీలక పాత్ర పోషించారు. 2018 లో వెలుగు చూసిన ప్రాణాంతక నిపా వైరస్‌ను నియంత్రించేందుకు చేపట్టిన చర్యలతో కేకే శైలజకు అంతర్జాతీయంగా ప్రశంసలు వెల్లువెత్తాయి.