తప్పుల తడకగా గిడుగు పురస్కారానికి ఆహ్వానం,,,, భాషా ప్రేమికుల ఆగ్రహం

తెలుగు అధికార భాషా సంఘం అంటే.. తెలుగు భాష మీద ఎంతో ప్రేమతో.. తెలుగు భాషాభివృద్ధి కోసం కృషి చేసే సంస్థ. మన భాష గొప్పదనాన్ని పెంచేలా తెలుగు భాషాభివృద్ధి ప్రాధికారిక సంస్థ పనితీరు ఉండాలి. కానీ ఆంధ్రప్రదేశ్‌ అధికార భాషా సంఘం పేరిట విడుదలైన ఓ ఆహ్వాన పత్రం తప్పులతడకగా ఉండటాన్ని భాషా ప్రేమికులు జీర్ణించుకోలేకపోతున్నారు. నిజంగానే ఈ ఆహ్వాన్ని పత్రాన్ని అధికారిక భాషా సంఘం రిలీజ్ చేసిందా..? లేదా ఎవరైనా మార్ఫింగ్ చేశారా తెలీదు గానీ.. సోషల్ మీడియాలో మాత్రం తప్పుల తడకగా ఉన్న ఇన్విటేషన్ తెలుగు భాషా ప్రేమికులకు తీవ్ర ఆగ్రహాన్ని కలిగిస్తోంది.

తెలుగు వ్యవహార భాషా పితామహుడైన గిడుగు రామ్మూర్తి పంతులు.. గ్రాంథిక భాషలో ఉన్న తెలుగు వచనాన్ని వాడుక భాషలోకి తీసుకొచ్చారు. వ్యవహరిక భాషోద్యమానికి ఆయన్ను మూలపురుషుడిగా చెప్పొచ్చు. తెలుగు భాషకు ఎంతో సేవ చేసిన గిడుగు రామ్మూర్తి పంతులు జన్మదినమైన ఆగస్టు 29వ తేదీన ఏపీ ప్రభుత్వం తెలుగు భాషా దినోత్సవం జరుపుకుంటోంది. ఈ సందర్భంగా ఏటా గిడుగు పురస్కారాన్ని అందజేస్తోంది. ఈసారి మొగిలిచెండు సురేశ్‌ను ఈ పురస్కారానికి ఎంపిక చేశారు. ఆగస్టు 29న విజయవాడలోని తుమ్మలపల్లి క్షేత్రయ్య కళాక్షేత్రంలో తెలుగు భాషా దినోత్సవం కార్యక్రమాలతోపాటు గిడుగు పురస్కారాన్ని సైతం అందించనున్నారు. ఈ సందర్భంగా ఆంధ్రప్రదేశ్ భాషా సంఘం అధ్యక్షులైన పి.విజయ బాబు పేరిట పురస్కార గ్రహీత మొగిలిచెండు సురేశ్‌ కోసం ప్రత్యేక ఆహ్వాన పత్రాన్ని విడుదల చేశారు. అందులో బోలెడన్ని తప్పులు ఉండటం ఆశ్చర్యం కలిగిస్తోంది.

మొదటి పదమైన గౌరవనీయులైన మొదలు.. చివరి పదమైన తెలుగు భాషాభివృద్ధి ప్రాధికారిక సంస్థ వరకు తప్పులు దొర్లడం భాషా ప్రేమికులకు ఆగ్రహం తెప్పించింది. నిర్వహిస్తున్న బదులు నిర్వహిస్తున అని, గ్రహీత బదులు గ్రహిత అని.. ఆహ్వానాన్ని బదులు ఆహ్వాన్నాని అని.. సన్మాన కార్యక్రమం బదులు సభా కార్యక్రమం అని.. ఉంటుంది అనాల్సిన చోట జరుగుతాయని ఉండటం నెటిజన్లకు చిరాకు తెప్పించింది. దీంతో ఆంధ్రప్రదేశ్ అధికారిక భాషా సంఘం వారికి తెలుగులో ఒక ప్రెస్ రిలీజ్ ఇవ్వడం కూడా రాదా? అని నెటిజన్లు ప్రశ్నిస్తున్నారు. ప్రతి వ్యవస్థను పొలిటికల్ టూల్‌గా, రాజకీయ తొత్తుగా చేస్తే ఫలితాలు ఇలాగే ఉంటాయని కందుల రమేశ్ అనే జర్నలిస్ట్ ట్వీట్ చేశారు. గిడుగు వారికి గొప్ప నివాళి ఇచ్చారయ్యా అంటూ మరో జర్నలిస్ట్ సెటైరికల్‌గా స్పందించారు. తెలుగును ఇలా భ్రష్టు పట్టించారంటూ నెటిజన్లు ఆవేదన వ్యక్తం చేస్తు్న్నారు.