చంద్రయాన్ 3 సక్సెస్‌తో దేశంలో పండగ సీజన్ ప్రారంభమైంది

చంద్రుడిపై పరిశోధనలు జరపడానికి భారత అంతరిక్ష పరిశోధన సంస్థ ఇస్రో.. చంద్రయాన్ 3 ని ప్రయోగాన్ని చేపట్టింది. ఇందులో భాగంగా చంద్రయాన్ 3 ప్రయోగంలోని విక్రమ్ ల్యాండర్.. జాబిల్లి దక్షిణ ధ్రువంపై సాఫ్ట్ ల్యాండింగ్ అయింది. ఈ క్రమంలోనే ఇప్పటివరకు ఏ దేశానికీ సాధ్యం కాని విజయాన్ని భారత్‌కు ఇస్రో అందించింది. దీంతో దేశ విదేశాల్లో ఇస్రో సాధించిన విజయాన్ని సెలబ్రేట్ చేసుకుంటున్నారు. ఈ క్రమంలోనే ప్రధాని నరేంద్ర మోదీ విదేశీ పర్యటన ముగించుకుని నేరుగా బెంగళూరులోని ఇస్రో శాస్త్రవేత్తలను కలిసి వారిని అభినందించారు. తాజాగా ప్రధాని మరోసారి చంద్రయాన్ 3 ప్రయోగం గురించి మాట్లాడారు. చంద్రయాన్‌ 3 విజయంతో భారత్‌లో పండగల సీజన్‌ ఆగస్టు 23 వ తేదీనే మొదలైందని పేర్కొన్నారు.

ఢిల్లీలో కొనసాగుతున్న బీ-20 సదస్సులో తాజాగా ప్రధానమంత్రి నరేంద్ర మోదీ ప్రసంగించారు. ప్రస్తుత పారిశ్రామిక యుగంలో డిజిటల్‌ విప్లవానికి భారత్‌ దిక్సూచిగా మారిందని మోదీ వెల్లడించారు. క్రిప్టో కరెన్సీ సమస్యల పరిష్కారంతోపాటు ఆర్టిఫిషియల్ ఇంటెలిజెన్స్‌ను అసాంఘిక కార్యకలాపాలకు కాకుండా అవసరమైన వాటి కోసం వినియోగించేందుకు ఇంటర్నేషనల్ ఫ్రేమ్‌వర్క్‌ అవసరమని ఈ సందర్భంగా ప్రధాని మోదీ గుర్తు చేశారు. వరల్డ్ డెవలప్‌మెంట్ అనేది.. ఇంటర్నేషనల్ ట్రేడ్‌పై ఆధారపడి ఉంటుందని దాన్ని మరింత ముందుకు తీసుకెళ్లాలని సూచించారు. ఇందులో సప్లై చైన్ విధానం చాలా కీలకమని తెలిపారు. ఈ సందర్భంగా భారత్‌లో గత ఐదేళ్లలో దాదాపు 13.5 కోట్ల మంది పేదరికం నుంచి బయటపడ్డారని పేర్కొన్నారు.

అయితే మన్‌ కీ బాత్‌ 104 వ ఎపిసోడ్‌లో మాట్లాడిన మోదీ.. భారత్‌ విజయానికి చంద్రయాన్‌ 3 సక్సెస్ ఎప్పటికీ ప్రతీకగా నిలుస్తుందని కొనియాడారు. ఈ మన్‌ కీ బాత్ కార్యక్రమంలో దేశంలో జరుగుతున్న వివిధ అంశాల గురించి ప్రస్తావన తీసుకువచ్చిన ప్రధాని.. పలు రంగాల నుంచి వివిధ రకాలైన ప్రజలతో సంభాషించారు. ఈ సందర్భంగా తెలుగు భాషా దినోత్సవ శుభాకాంక్షలు చెప్పారు. చంద్రయాన్‌ 3 ప్రాజెక్టు మహిళా సాధికారతకు చిహ్నంగా నిలిచిందని ప్రధాని కొనియాడారు. సెప్టెంబరు రెండో వారంలో భారత్‌ జీ 20 సమావేశాలకు ఆతిథ్యం ఇస్తోందని వెల్లడించారు. గతంలో ఎప్పుడూ లేని విధంగా సుమారు 40 దేశాలకు చెందిన ప్రతినిధులు హాజరు కానున్నారని చెప్పారు. క్రీడల్లో ప్రస్తుతం భారత్‌ భారీ విజయాలు సాధిస్తోందని.. తాజాగా చైనాలో జరిగిన ప్రపంచ విశ్వవిద్యాలయాల క్రీడల్లో చాలా మంది భారతీయులు పతకాలు సాధించారని గుర్తు చేశారు. మరోవైపు.. ఈ ఏడాది స్వాతంత్ర్య దినోత్సవం సందర్భంగా దాదాపు 10 కోట్ల మంది జాతీయ పతాకంతో సెల్ఫీ దిగారని వెల్లడించారు.