ఆదిత్య ఎల్1 విజయవంతం కావాలని,,,చెంగాలమ్మ ఆలయంలో ఇస్రో ఛైర్మన్ పూజలు

ఆదిత్య ఎల్1 ప్రయోగం నేపథ్యంలో ఇస్రో ఛైర్మన్ డాక్టర్ సోమనాథ్.. ఏపీలోని నెల్లూరు జిల్లా సూళ్లూరుపేటలో చెంగాలమ్మ పరమేశ్వరీ అమ్మవారి ఆలయాన్ని సందర్శించారు. సూర్యుని గురించి అధ్యయనం నిమిత్తం ప్రయోగించనున్న ఆదిత్య ఎల్1 (Aditya-L1) మిషన్ విజయవంతం కావాలని కోరుతూ ప్రత్యేక పూజలు నిర్వహించారు. చంద్రయాన్ 3 రాకెట్ ప్రయోగం విజయం సాధించిన వారం రోజుల వ్యవధిలోనే భారత అంతరిక్ష పరిశోధన సంస్థ (ISRO) మరో కీలక రాకెట్ ప్రయోగానికి సిద్ధమైన విషయం తెలిసిందే. PSLV C57 రాకెట్ ద్వారా ఆదిత్య ఎల్1 ఉపగ్రహాన్ని శ్రీహరికోటలోని సతీష్ ధావన్ స్పేస్ సెంటర్ (SHAR) నుంచి ప్రయోగించనుంది. శనివారం (సెప్టెంబర్ 2) ఉదయం సరిగ్గా 11:50 గంటలకు ఈ ప్రయోగం ప్రారంభం అవుతుంది. ఇందుకోసం ఇప్పటికే కౌంట్‌డౌన్ మొదలైంది.

అంతకుముందు ఇస్రో ఛైర్మన్ సోమనాథ్ సహా శాస్త్రవేత్తల బృందం తిరుమల శ్రీవారిని దర్శించుకున్నారు. వేంకటేశ్వర స్వామి పాదాల వద్ద ఆదిత్య ఎల్1 రాకెట్ నమూనాను ఉంచి ప్రత్యేక పూజలు నిర్వహించారు. ఇస్రో ఏ ప్రయోగం చేపట్టినా.. తిరుమలలో శ్రీవారి ఆలయాన్ని దర్శించుకుని.. ప్రయోగం విజయవంతం కావాలని ప్రత్యేక పూజలు చేసే ఆనవాయితీ కొనసాగుతున్న సంగతి తెలిసిందే. ఈ నేపథ్యంలో శుక్రవారం ఉదయం ఇస్రో శాస్త్రవేత్తలు శ్రీవారిని దర్శించుకుని.. రాకెట్ నమూనాను స్వామి చెంతన ఉంచి పూజలు చేశారు.

ఈ ప్రయోగం నేపథ్యంలో ఇస్రో చీఫ్ డాక్టర్ సోమనాథ్‌ గురువారం రాత్రే షార్‌కు చేరుకున్నారు. ప్రయోగం పూర్తయ్యే వరకూ మూడు రోజుల పాటు ఆయన ఇక్కడే బస చేయనున్నారు. ప్రయోగాన్ని వీక్షించేందుకు కేంద్ర శాస్త్ర, సాంకేతిక శాఖ మంత్రి జితేంద్ర సింగ్‌ సైతం రానున్నారు. చెంగాలమ్మ పరమేశ్వరి అమ్మవారిని దర్శించుకున్నవారిలో ఇస్రో ఛైర్మన్ డాక్టర్ ఎస్ సోమనాథ్, షార్ డైరెక్టర్ ఎ. రాజరాజన్ ఉన్నారు. ఆలయ అధికారులు వీరికి స్వాగతం పలికి అమ్మవారి దర్శనానికి ఏర్పాట్లు చేశారు. అనంతరం ఇస్రో ఛైర్మన్ సోమనాథ్ మీడియాతో మాట్లాడుతూ... కౌంట్‌డౌన్ ప్రక్రియ 24 గంటల పాటు కొనసాగిన అనంతరం శనివారం ఉదయం 11 గంటల 50 నిమిషాలకు రాకెట్ నింగిలోకి దూసుకెళ్తుందని తెలిపారు. రాకెట్ 125 రోజుల పాటు నింగిలో ప్రయాణించిన అనంతరం సూర్యుని 11 పాయింట్ వద్దకు ఉపగ్రహం చేరుకుంటుందని వెల్లడించారు.

ఇస్రో భవిష్యత్తులో చేయబోయే ప్రయోగాల గురించి ఈ సందర్భంగా డాక్టర్ సోమనాథ్ తెలిపారు. అక్టోబర్ మొదటి, రెండు వారాల్లో గగన్‌యాన్ ప్రయోగం చేపడుతున్నామని, ఆ తర్వాత సీఎస్ఎల్వీ మార్క్ - 2 రాకెట్ ప్రయోగం ద్వారా ఇన్సాట్ త్రీడీ ఉపగ్రహాన్ని నింగిలోకి పంపనున్నామని వివరించారు.

ఆదిత్య ఎల్‌1 ప్రత్యేకతలు:

★ సూర్యుడిని అధ్యయనం చేసేందుకు భారత్ చేపడుతున్న తొలి మిషన్‌ ఇది.

★ భూమి నుంచి సూర్యుని దిశగా 15 లక్షల కి.మీ. దూరంలోని లాగ్రాంజ్‌ పాయింట్ 1 (ఎల్‌ 1) చుట్టూ ఉన్న కక్ష్యలో దీన్ని ప్రవేశపెట్టనున్నారు.

★ గ్రహణాలతో సంబంధం లేకుండా ఈ శాటిలైట్ ద్వారా సూర్యుడిని నిరంతరం అధ్యయనం చేసేందుకు వీలు కలుగుతుందని ఇస్రో శాస్త్రవేత్తలు తెలిపారు.

★ ఆదిత్య-ఎల్‌1‌ మొత్తం 7 పేలోడ్లను మోసుకెళ్లనుంది. సూర్యగోళం నుంచి ప్రసరించే అత్యంత శక్తిమంతమైన కాంతి ప్రభావాన్ని అధ్యయనం చేసేందుకు అనువుగా ఈ పేలోడ్‌లను రూపొందించారు.

★ ఈ మిషన్‌లోని ఉపగ్రహం బరువు 1500 కిలోలు.