జంటహత్యల కేసులో 28 ఏళ్ల తర్వాత మాజీ ఎంపీకి జీవిత ఖైదు

తనకు ఓటు వేయలేదన్న కోపంతో ఇద్దరు వ్యక్తులను చంపిన కేసులో ఆర్జేడీ మాజీ ఎంపీకి సుప్రీం కోర్టు జీవిత ఖైదు విధిస్తూ సంచలన నిర్ణయం తీసుకుంది. 28 ఏళ్ల క్రితం జరిగిన ఈ జంట హత్యల కేసులో కోర్టు తాజాగా సుప్రీంకోర్టు కీలక తీర్పు వెలువరించింది. ఈ క్రమంలోనే కింది కోర్టులు ఇచ్చిన తీర్పులను కొట్టివేసింది. ఈ కేసుల్లో ఆ మాజీ ఎంపీని హైకోర్టు నిర్దోషిగా తేల్చగా.. ఆ తీర్పును రద్దు చేస్తూ.. సుప్రీంకోర్టు తాజా తీర్పును వెల్లడించింది. దీంతోపాటు ఈ ఘటనలో చనిపోయిన ఇద్దరు మృతుల కుటుంబాలకు నష్ట పరిహారం అందించాలని ఆ రాష్ట్ర ప్రభుత్వాన్ని సుప్రీంకోర్టు ఆదేశాలు జారీ చేసింది.

బిహార్‌లో 28 ఏళ్ల కింద జరిగిన ఘటనలో ఆర్జేడీ నేత, మాజీ ఎంపీ ప్రభునాథ్‌ సింగ్‌కు జీవిత ఖైదు విధించింది. అసెంబ్లీ ఎన్నికల పోలింగ్ రోజు జరిగిన జంట హత్యల కేసులో ప్రభునాథ్ సింగ్‌ను దోషిగా తేల్చిన సుప్రీంకోర్టు తాజాగా శుక్రవారం శిక్ష విధించింది. దీంతో ప్రభునాథ్ సింగ్‌ను నిర్దోషిగా ప్రకటిస్తూ పాట్నా హైకోర్టు గతంలో ఇచ్చిన తీర్పును ఈ సందర్భంగా గత నెల సుప్రీంకోర్టు కొట్టి వేసింది. అయితే తీర్పును ఇన్ని రోజులు రిజర్వ్‌లో ఉంచిన సర్వోన్నత న్యాయస్థానం.. తాజాగా శిక్ష ఖరారు చేసింది. శిక్షతో పాటు మృతుల కుటుంబాలకు రూ.10 లక్షల చొప్పున నష్ట పరిహారాన్ని అందించాలని బిహార్‌ ప్రభుత్వాన్ని సుప్రీం కోర్టు ఆదేశించింది.

1995 లో బిహార్‌లో జరిగిన అసెంబ్లీ ఎన్నికల్లో ఈ ఘటనలు చోటు చేసుకున్నాయి. ఆ ఎన్నికల్లో బీజేపీ తరఫున ప్రభునాథ్ సింగ్‌ పోటీ చేశారు. అయితే పోలింగ్‌ జరుగుతున్న సమయంలోనే సరణ్‌ జిల్లాలోని చాప్రా ప్రాంతంలో కాల్పుల ఘటనలు జరిగాయి. ఈ ఘటనలో ఇద్దరు వ్యక్తులు ప్రాణాలు కోల్పోగా.. మరో వ్యక్తికి తీవ్ర గాయాలు అయ్యాయి. అయితే తాను చెప్పినట్లుగా ఓటు వేయలేదన్న కారణంతో ప్రభునాథ్ సింగ్ ఈ కాల్పులు జరిపించారని అప్పట్లో ఆరోపణలు వచ్చాయి. దీంతో ప్రభునాథ్ సింగ్‌పై కేసు నమోదు కాగా.. 28 ఏళ్లుగా విచారణ జరుగుతోంది. అయితే సుదీర్ఘంగా జరిగిన విచారణలో సరైన సాక్ష్యాలు లేవని ప్రభునాథ్‌ను నిర్దోషిగా తేల్చుతూ 2008 డిసెంబర్‌లో ట్రయల్‌ కోర్టు తీర్పు ఇచ్చింది. ఆ తర్వాత 2012 లో పాట్నా హైకోర్టు కూడా ప్రభునాథ్‌ను నిర్దోషిగా ప్రకటించింది. దీంతో హైకోర్టు తీర్పును మృతుల కుటుంబసభ్యులు సుప్రీంలో సవాల్‌ చేయగా.. ఆయనకు జీవిత ఖైదు విధించింది. మరోవైపు.. 1995లో జరిగిన ఎన్నికల్లో ప్రభునాథ్‌పై గెలిచిన ఎమ్మెల్యే అశోక్‌ సింగ్‌ కూడా హత్యకు గురయ్యారు. ఆ కేసులోనూ ప్రభునాథ్ దోషిగా తేలడంతో 2017లో హజారీబాఘ్‌ కోర్టు ఆయనకు జీవిత ఖైదు విధించింది. గతంలో జనతాదళ్‌, జనతాదళ్‌ యునైటెడ్‌ పార్టీల్లో ఉన్న ప్రభునాథ్.. ఆ తర్వాత ఆర్జేడీలో చేరారు. ప్రభునాథ్.. 2 సార్లు ఎమ్మెల్యే, 4 సార్లు ఎంపీగా గెలిచారు.