ఇది పోలీసుల వైఫల్యానికి నిదర్శనం... వర్ల రామయ్య
Andhra Pradesh Telugu | Suryaa Desk | Published : Tue, Sep 05, 2023, 02:45 PM
నారా లోకేశ్ పాదయాత్రలో వైసీపీ గుండాల దాడి పోలీసుల వైఫల్యానికి నిదర్శనమని టీడీపీ సీనియర్ నేత వర్ల రామయ్య విమర్శలుగుప్పించారు. టీడీపీ యువనేత నారా లోకేశ్ చేపట్టిన యువగళం పాదయాత్రకు సరైన భద్రతను కల్పించడంలో పోలీసులు విఫలమయ్యారని ఆయన మండిపడ్డారు. ఇదే విషయంపై రాష్ట్ర డీజీపీ రాజేంద్రనాథ్ రెడ్డికి లేఖ రాశారు. పాదయాత్రలో లోకేశ్ భద్రత గురించి తాను ఇప్పటికే పలు లేఖలు రాసినా లోకేశ్ కు భద్రతను పెంచడం లేదని విమర్శించారు. సెప్టెంబర్ 2, 3 తేదీల్లో లోకేశ్ పాదయాత్ర ఉంగుటూరు నియోజకవర్గంలో కొనసాగుతుందని ముందుగానే సమాచారం ఇచ్చినప్పటికీ పోలీసులు రక్షణ చర్యలు చేపట్టలేదని అన్నారు. దీంతో, నిడమర్రు మండలం నుంచి మందలపర్రుకు పాదయాత్ర చేరుకున్న సమయంలో వైసీపీ గూండాలు దాడి చేశారని తెలిపారు. లోకేశ్ పాదయాత్ర లోకి దూసుకొచ్చిన వైసీపీ గూండాలు వాహనాలపై దాడి చేశారని, లోకేశ్ వెంట నడిచేందుకు వచ్చిన ప్రజలను కూడా బూతులు తిడుతూ బెదిరించారని మండిపడ్డారు. శాంతియుతంగా జరుగుతున్న పాదయాత్రలో అలజడి సృష్టించారని డీజీపీకి తెలిపారు. దాడి జరుగుతున్నా పోలీసులు ఆపలేదని, పోలీసుల వైఫల్యానికి ఇది నిదర్శనమని చెప్పారు.
|
|