విమానంలో మహిళా సిబ్బందిని హగ్ చేసుకున్న వ్యక్తి,,,ల్యాండ్ అయిన తర్వాత ప్రయాణికుడి అరెస్ట్

విమానాల్లో ప్రయాణించాలంటేనే ఇటీవలి కాలంలో ప్రయాణికులు జంకుతున్నారు. అయినా గమ్యస్థానాలకు చేరేందుకు విమానం ఎక్కడం తప్పనిసరి కావడంతో అందులోనే వెళ్తున్నారు. గత కొంత కాలంగా విమానాల్లో చోటు చేసుకుంటున్న సంఘటనలు తీవ్ర భయాందోళనకు గురి చేస్తున్నాయి. ప్రస్తుతం విమానంలో జరిగిన ఓ ఘటన కూడా తీవ్ర చర్చనీయాంశంగా మారింది. మస్కట్ నుంచి ముంబై మీదుగా ఢాకా వెళ్తున్న విమానంలో ఓ ప్రయాణికుడు చేసిన హంగామా రచ్చ రచ్చ అయింది. సదరు ప్రయాణికుడు మహిళా ఫ్లైట్ అటెండెంట్‌పై లైంగిక వేధింపులకు పాల్పడ్డాడు.

బంగ్లాదేశ్‌కు చెందిన ఓ ప్రయాణికుడు.. విమానంలో ఉండే మహిళ సిబ్బంది పట్ల అసభ్యంగా ప్రవర్తించాడు. ఈ ఘటన గురువారం తెల్లవారుజామున జరిగింది. అయితే మస్కట్ నుంచి బంగ్లాదేశ్‌లోని ఢాకాకు వెళ్తున్న ఈ విమానం ముంబైలో ల్యాండ్ అయింది. వెంటనే రంగంలోకి దిగిన ఎయిర్‌పోర్టు పోలీసులు ఆ నిందితుడిని అరెస్ట్ చేశారు. అనంతరం కోర్టులో హాజరు పరిచి.. జైలుకు తరలించారు. బంగ్లాదేశ్‌కు చెందిన 30 ఏళ్ల మహ్మద్ దులాల్ అనే ప్రయాణికుడు.. విస్తారా విమానంలో మస్కట్ నుంచి ముంబై మీదుగా ఢాకా బయల్దేరాడు. ఈ క్రమంలోనే విమానం ముంబైలో ల్యాండ్ కావడానికి అరగంట ముందు తనలో ఉన్న వికృత రూపాన్ని బయటపెట్టాడు.

తాను కూర్చున్న సీట్ నుంచి లేచిన మహ్మద్ దులాల్.. అక్కడే ఉన్న మహిళా అటెండెంట్‌పై లైంగిక వేధింపులకు పాల్పడ్డాడు. మహిళ సిబ్బందిని కౌగిలించుకున్నాడు. అంతటితో ఆగకుండా ఆమెను ముద్దు పెట్టుకునే ప్రయత్నం చేశాడు. వెంటనే అది గమనించిన ఇతర క్యాబిన్ సిబ్బంది, ప్రయాణికులు.. మహ్మద్ దులాల్‌ను అడ్డుకునే ప్రయత్నం చేశారు. అయినా అతడు వినకుండా వారిని తోసేసే ప్రయత్నం చేసినట్లు ప్రత్యక్ష సాక్ష్యులు వెల్లడించారు. చివరికి ఫ్లైట్ కెప్టెన్ వార్నింగ్ ఇచ్చినా మహ్మద్ దులాల్ పట్టించుకోలేదు.

దీంతో విమాన సిబ్బంది.. ముంబైలో ఉన్న ఎయిర్‌పోర్ట్ అధికారులకు సమాచారం అందించారు. దీంతో వారు విమానం ల్యాండ్ అయ్యే సమయానికి భద్రతా అధికారులు, పోలీసులు సిద్ధంగా ఉన్నారు. మహ్మద్ దులాల్‌ను సహర్ పోలీస్ స్టేషన్‌కు తీసుకెళ్లారు. విమానంలోని మహిళా సిబ్బంది ఇచ్చిన ఫిర్యాదు ఆధారంగా నిందితుడిపై కేసు నమోదు చేశారు. స్థానిక కోర్టులో హాజరుపరచగా.. శుక్రవారం వరకు పోలీస్ కస్టడీ విధించారు.