యూట్యూబ్ ద్వారా కోటి రూపాయలు సంపాదించిన అన్వేష్,,,సినిమాల్లో హీరోగా అవకాశం వచ్చిందని వెల్లడి

‘నా అన్వేషణ’ పేరిట ప్రపంచ దేశాలను చుట్టి వస్తున్న తెలుగు యూట్యూబర్ అన్వేష్.. యూట్యూబ్ ద్వారా కోటి రూపాయల ఆదాయాన్ని పొందారు. జూన్, జులై, ఆగస్టు నెలల్లో ఆయన నెలకు రూ.35 లక్షల చొప్పున యూట్యూబ్ ద్వారా సంపాదించారు. ఈ సందర్భంగా ఓ వీడియో చేసిన ఆయన.. తాను ఎంత కష్టపడి వీడియోలు చేస్తున్నాననే విషయాలను వెల్లడించారు. ‘నేను ఆడుతూ పాడుతూ కోట్లు సంపాదిస్తున్నానని టీవీ ఛానెళ్లలో చెబుతున్నారు. కానీ తెర వెనుక నేను పడే కష్టం ఎవరికీ తెలియడం లేదు. అందుకే నేను ఎలా వీడియోలు చేస్తానో చెప్పాలనుకుంటున్నా. ఇది చూస్తే.. యూట్యూబ్ ఛానెల్ పెట్టాలో వద్దో మీరే ఓ అవగాహనకు వస్తారు’ అని అన్వేష్ చెప్పారు. తన తోటి హిందీ యూట్యూబర్ తన సక్సెస్ వివరాలను ఓ సంస్థతో పంచుకొని రూ.50 లక్షలు సంపాదించాడని అన్వేష్ తెలిపారు. తాను ఏం చేస్తున్నాననో చెబితే కోటి రూపాయలు వచ్చే అవకాశం ఉన్నా.. విద్యను అమ్ముకోవడం తనకు ఇష్టం లేదన్నారు.

మిగతా యూట్యూబర్లు ఒక ఫోన్ మాత్రమే వాడుతుంటే.. తాను బోలెడెన్ని ఎక్విప్‌మెంట్లు, సాఫ్ట్‌వేర్లను వాడుతున్నానని అన్వేష్ చెప్పారు. తాను వాడే పరికరాల సాఫ్ట్‌వేర్ల కోసం ప్రతి నెలా రూ.60 వేలు ఖర్చు చేస్తున్నానన్నారు. వీడియో పర్‌ఫెక్ట్‌గా రావడం కోసమే తాను ఈ సాఫ్ట్‌వేర్లను వాడుతున్నానన్నారు. ఇక పరికరాలు పోతే వాటిని మళ్లీ కొనుగోలు చేయడానికి ఎంతో ఖర్చవుతుందన్నారు.

‘నేను ఫస్ట్ చేసిన పారిస్ వీడియోను వంద మంది చూశారు.. తర్వాత చేసిన పోర్చుగల్ వీడియోను 200 మంది మాత్రమే చూశారు. అయినా సరే నేను రెగ్యులర్‌గా వీడియోలు తీస్తున్నాను. నాలుగేళ్లు కష్టపడితేనే నేను ఈ స్థాయికి వచ్చాను. పది వేల లోపు వ్యూస్ వచ్చిన వీడియోలు కూడా బోలెడు ఉన్నాయి. వాటి కోసం కూడా బోలెడంత ఖర్చు చేశాను’ అని అన్వేష్ చెప్పారు.

గత ఏడాది ఈ టైంకి ఒక్క వీడియోకు కూడా వన్ మిలియన్ వ్యూస్ రాలేదన్న అన్వేష్.. కానీ ఏడాదిలోనే 150 వీడియోలకు వన్ మిలియన్ వ్యూస్ వచ్చాయన్నారు. ఒకాయన ఫోన్ చేసి తనకు సినిమా ఆఫర్ ఇచ్చారని అన్వేష్ తెలిపారు. తనకు సినిమా కథ చెప్పి.. హీరోగా నటించేందుకు కోటి రూపాయలు ఆఫర్ చేశాడన్నారు. తనలో హీరో క్వాలిటీస్ లేవన్న అన్వేష్.. ఆ సినిమా ఆఫర్‌ను రిజెక్ట్ చేశానన్నారు. రోజూ ప్రపంచం నలుమూలలా తిరిగే తాను బిగ్ బాస్ హౌస్‌లో రోజుల తరబడి ఉండటం కష్టమన్నారు. నేను బిగ్ బాస్‌కు వెళ్తే.. అణుబాంబును రూమ్‌లో పెట్టినంత ప్రమాదమన్న అన్వేష్.. హోస్ట్ నాగార్జునకు బీపీ తారాస్థాయికి చేరే ప్రమాదం ఉందన్నారు. ప్రపంచ యాత్రికుడు అనేది తనకు చాలన్నారు.

‘యూట్యూబ్ ఛానెల్ అనేది కరోనా ముందు ఎవరికీ పెద్దగా తెలీదు. దీంతో యూట్యూబే స్వయంగా చాలా మందిని వీడియోలు చేయాలని ఆహ్వానించింది. కరోనా టైంలో జనం వీడియోలు ఎక్కువగా చూశారు. కానీ జనం ఇప్పుడు యూట్యూబ్‌ను వదిలేసి తమ పనులు తాము చేసుకుంటున్నారు. దీంతో యూట్యూబ్ క్రియేటర్లు అడుక్కుతింటున్నారు. ముందు చదువుకొని సక్సెస్ అయ్యాక యూట్యూబ్ ఛానెల్ పెట్టండి. యూట్యూబ్ ఛానెల్‌కు ఆదరణ వచ్చిన తర్వాత.. దానికి ప్రాధాన్యం ఇవ్వండి. నేను మూడేళ్లు కష్టపడితే నాలుగో ఏడాదికి సక్సెస్ వచ్చింది’ అని అన్వేష్ సూచించారు.

తనకు యూట్యూబ్ ద్వారా డబ్బులు వచ్చినా రాకున్నా.. తన ఆరోగ్యం బాగున్నంత వరకు వీడియోలు కచ్చితంగా అప్‌లోడ్ చేస్తానని ఆయన చెప్పారు. యూట్యూబ్ ఛానెల్ పెట్టాలంటే.. సక్సెస్ అయిన తనను కాదు.. ఫెయిల్ అయిన వాళ్లతో మాట్లాడి నిర్ణయం తీసుకోవాలన్నారు. ట్రావెలింగ్ అనేది కత్తి మీద సాములాంటిదన్నారు.

తనకు చైనా సిరీస్ ద్వారా రూ.35 లక్షల ఆదాయం వచ్చిందన్న అన్వేష్.. లక్ష్మీ దేవిని వస్తున్నప్పుడు కాదనకూడదన్నారు. తాను వీడియోలు చేయడం తగ్గించినప్పటికీ ఆదాయం వస్తోందన్నారు. జనం తన పాత వీడియోలను వెతికి మరీ చూస్తుండటం వల్లే డబ్బులొస్తున్నాయన్నారు. డబ్బు సంపాదించడం కంటే ఆరోగ్యాన్ని కాపాడుకోవడం తనకు ఎంతో ముఖ్యమన్నారు.