ఇది చాలా చిన్న కేసు, ఇంకా పెద్దపెద్దవి చాలా ఉన్నాయి..: సజ్జల

స్కిల్ డెవలప్‌మెంట్ కేసులో ఏపీ మాజీ సీఎం చంద్రబాబుకు విజయవాడ ఏసీబీ కోర్టు ఇచ్చిన తీర్పుపై ఏపీ ప్రభుత్వ ముఖ్య సలహాదారు సజ్జల రామకృష్ణారెడ్డి స్పందించారు. ఇది చాలా చిన్న కేసని.. ఇంకా పెద్దపెద్దవి చాలా ఉన్నాయని సజ్జల చెప్పుకొచ్చారు. ఔటర్ రింగు రోడ్డు, అమరావతి భూములు ఇలా ఎన్నో పెద్ద పెద్ద స్కాములున్నాయని పేర్కొన్నారు. ఇదేదో జరగరాని ఘోరం జరిగిపోయినట్టు.. ఇలాంటిది ప్రపంచంలో ఎక్కడా జరగనట్లు చేస్తున్నారని ఎద్దేవా చేశారు. చాలా మంది పెద్ద పెద్ద స్థాయిలో ఉన్న వాళ్లు కూడా అరెస్టయిన సంఘటనలున్నాయని.. కానీ చిన్నదాన్ని వాళ్లే గోలగోల చేసి పెద్దదిగా చూపించుకుంటున్నారని చెప్పుకొచ్చారు. ఇప్పటికే చేసిన తప్పుకు తలదించుకోవాల్సింది పోయి ప్రజలను రెచ్చగొట్టే ప్రయత్నం చేస్తున్నారని మండిపడ్డారు.

నిన్న ఓ సీఐ మీద నారా లోకేష్ సీరియస్ కావటంపై మండిపడ్డారు సజ్జల. సీఎం కొడుకని గౌరవిస్తే బూతులు తిడతావా అంటూ ప్రశ్నించారు. ఆయన పోలీసు కాబట్టి ఊరుకున్నాడని.. వైసీపీ కార్యకర్త అయితే తొక్కి నారతీసేవాడంటూ వ్యాఖ్యానించారు. ఇక జనసేనాని పవన్ కళ్యాణ్ మీద సైటైర్లు వేశారు. సొంత కొడుకు కంటే దత్తపుత్రుడే ఓవర్ యాక్షన్ చేశారంటూ వ్యంగ్యాస్త్రాలు సంధించారు. వాళ్లు శాంతికి భంగం కలిగించే ప్రయత్నం చేశారు కాబట్టే ఈరోజు తాము మాట్లాడవలసి వస్తోందన్నారు సజ్జల.

చంద్రబాబు 40 ఏళ్ల రాజకీయ జీవితమంతా అవినీతిమయమేనని సజ్జల పేర్కొన్నారు. మాట్లాడితే.. మచ్చలేని వ్యక్తినంటూ బీరాలు పోతాడని.. అరెస్ట్ చేస్తే మాత్రం ఇంత రాద్దాంతం చేస్తున్నారంటూ పేర్కొన్నారు. ఈ స్కీముకు దర్శకత్వం, రూపకర్త అంతా చంద్రబాబేననంటూ చెప్పుకొచ్చారు. ఈ స్కాంలో చంద్రబాబు పాత్రపై పూర్తి ఆధారాలున్నాయని.. కోర్టు వాటినన్నిటిని పరిగణనలోకి తీసుకునే తీర్పునిచ్చిందని వివరించారు. ప్రజాస్వామ్య వ్యవస్థలో తప్పు చేస్తే ఎంతటి పెద్ద వారికైనా న్యాయపరమైన శిక్షలు తప్పవన్నారు. చట్టాలను, న్యాయవ్యవస్థను మనం గౌరవించాలని సజ్జల పేర్కొన్నారు.