ఏటీఎం నింపుతుండగా సిబ్బందిపై దుండగుల దాడి,,,సీసీటీవీలో నమోదైన దొంగతనం దృశ్యాలు

ఒకప్పుడు దొంగలు ఏదైనా దొంగతనం చేయాలంటే దానికి పెద్ద ప్లాన్ వేసి.. జాగ్రత్తగా అమలు చేసేవారు. కానీ ప్రస్తుతం టెక్నాలజీ అందుబాటులోకి వచ్చిన తర్వాత క్షణాల్లో రెప్పపాటులో లక్షలు కొట్టేస్తున్నారు. ఈ క్రమంలోనే తాజాగా జరిగిన ఓ ఘటన తీవ్ర చర్చనీయాంశంగా మారింది. అందరూ చూస్తూ ఉండగానే పట్టపగలే రూ.39 లక్షలతో దొంగలు పారిపోయారు. ఈ దొంగతనం చేసే క్రమంలో కాల్పులు జరపడంతో ఒకరు మృతి చెందగా మరికొందరు గాయాల పాలయ్యారు. ఈ ఘటన ఉత్తర్‌ప్రదేశ్‌లో జరిగింది.

ఉత్తర్‌ప్రదేశ్‌ మీర్జాపూర్‌లో ఈ సినిమా రేంజ్ దొంగతనం జరిగింది. స్థానికంగా ఉన్న ఓ యాక్సిస్ బ్యాంక్ ఏటీఎంలో నగదు నింపేందుకు బ్యాంకు సిబ్బంది ఏటీఎం వద్దకు చేరుకున్నారు. డబ్బుతో ఉన్న వాహనంలో ఒక సెక్యురిటీ గార్డ్, ఇద్దరు క్యాషియర్లు అక్కడికి వచ్చారు. ఏటీఎం ముందు డబ్బు ఉన్న వ్యాన్‌ను ఉంచి.. అందులో నుంచి డబ్బు పెట్టెలను బయటికి తీసే ప్రయత్నం చేశారు. ఇంతలో అక్కడే హెల్మెట్ పెట్టుకుని ఉన్న ఓ వ్యక్తి తుపాకీ పట్టుకుని వచ్చి.. అక్కడ ఉన్న సెక్యూరిటీ గార్డుపై కాల్పులు జరిపాడు. అనంతరం మరో వ్యక్తి వచ్చి ఆ వ్యాన్‌లో ఉన్న డబ్బు పెట్టెను తీసుకుని అక్కడి నుంచి పరారయ్యాడు. అందులో రూ.39 లక్షల నగదు ఉన్నట్లు బ్యాంకు అధికారులు తెలిపారు.

దుండగుడి కాల్పులతో బెదిరిపోయిన బ్యాంకు సిబ్బంది భయంతో వ్యాన్‌లోకి ఎక్కి ప్రాణాలు కాపాడుకున్నారు. అయితే నడిరోడ్డుపై పట్టపగలు ఇంత దారుణం జరిగినా కొంతమంది తమకు ఏదీ పట్టనట్లు వెళ్లిపోయారు. ఇంతలో సైకిల్‌ మీద వెళ్తున్న ఓ స్టూడెంట్ వచ్చి కాల్పుల కారణంగా కుప్పకూలిపోయిన సెక్యూరిటీ గార్డును.. స్థానికుల సాయంతో ఆస్పత్రికి తరలించారు. ఈ పూర్తి ఘటనకు సంబంధించిన దృశ్యాలు అక్కడే ఉన్న సీసీటీవీ కెమెరాల్లో రికార్డ్ అయ్యాయి. ఈ ఘటన తర్వాత ఆ సీసీటీవీ ఫుటేజీ ఆధారంగా పోలీసులు విచారణ చేపట్టారు.

అయితే బుల్లెట్ గాయాలతో ఆస్పత్రిలో చేరిన ఆ సెక్యూరిటీ గార్డు చికిత్స పొందుతూ చనిపోయాడు. మరో ముగ్గురు వ్యక్తులకు కూడా గాయాలైనట్లు తెలుస్తోంది. దీంతో రంగంలోకి దిగిన పోలీసులు.. కేసు నమోదు చేసి దర్యాప్తు చేపట్టారు. పరారీలో ఉన్న నిందితుల కోసం స్పెషల్ టీమ్‌లు గాలింపు చేపట్టాయి. దుండగులను పట్టుకునేందుకు ఆ ప్రాంతంలో ఉన్న సీసీటీవీ కెమెరాలను జల్లెడ పడుతున్నారు. అయితే నిందితులు పక్కా ప్లాన్ ప్రకారమే ఏటీఎం నింపేందుకు వచ్చిన బ్యాంకు సిబ్బంది నుంచి డబ్బులు కాజేయాలని అక్కడ వేచి ఉన్నట్లు పోలీసులు అనుమానిస్తున్నారు.