చంద్రబాబును 2 రోజుల సీఐడీ కస్టడీకి ఇస్తూ సీబీఐ కోర్టు తీర్పు

స్కిల్ డెవలప్‌మెంట్ కేసులో టీడీపీ అధినేత చంద్రబాబు నాయుడుకు మరోసారి చుక్కెదురైంది. ఈ కేసులో చంద్రబాబు నాయుడును సీఐడీ కస్టడీకి అనుమతిస్తూ విజయవాడ ఏసీబీ కోర్టు తీర్పు ఇచ్చింది. 5 రోజుల పోలీస్ కస్టడీ కోరగా.. 2 రోజులు విచారించేందుకు న్యాయస్థానం అనుమతించింది. ఏపీ సీఐడీ పోలీసులు ఆయణ్ని అదుపులోకి తీసుకొని విచారించనున్నారు. ఒక మాజీ ముఖ్యమంత్రిని పోలీస్ కస్టడీలోకి తీసుకొని విచారించనుండటం.. తెలుగు రాష్ట్రాల్లో ఇదే తొలిసారి.

చంద్రబాబు నాయుడు ప్రస్తుతం రాజమండ్రి జైలులో రిమాండ్ ఖైదీగా ఉన్నారు. ఆయణ్ని విజయవాడలోని కార్యాలయానికి తీసుకొచ్చి విచారించే అంశం భద్రతా అంశాలతో ముడిపడి ఉంటుంది. టీడీపీ శ్రేణులు అడుగడుగునా అడ్డుపడి ఆందోళనలు నిర్వహించే అవకాశం కూడా ఉంది. అయితే.. చంద్రబాబును రెండు రోజుల కస్టడీకి అనుమించిన న్యాయస్థానం.. ఆయనను ఎక్కడ విచారిస్తారని సీఐడీని ప్రశ్నించింది. కాగా.. జైల్లోనే విచారిస్తామని కోర్టుకు సీఐడీ పోలీసులు తెలిపారు.

స్కిల్ డెవలప్‌మెంట్ కేసులో అరెస్టయిన చంద్రబాబు నాయుడి రిమాండ్ శుక్రవారంతో ముగిసింది. దీంతో పోలీసులు బాబును వర్చువల్‌గా ధర్మాసనం ముందు హాజరుపరిచారు. కాగా.. మరో రెండు రోజుల రిమాండును పొడగిస్తూ న్యాయమూర్తి తన నిర్ణయాన్ని వెల్లడించారు. ఈ సందర్భంగా దాదాపు 14 రోజుల తర్వాత చంద్రబాబు తొలిసారి జడ్జితో భావోద్యగంతో మాట్లాడారు. 45 ఏళ్ల తన సుధీర్ఘ రాజకీయలో ఇలాంటి పరిస్థితి ఎప్పుడూ రాలేదని.. కనీసం నోటీసు కూడా ఇవ్వకుండా అరెస్టు చేశారని ఆవేదన వ్యక్తం చేశారు. తన తప్పు ఉంటే విచారణ చేసి అరెస్టు చేయాల్సిందని పేర్కొన్నారు. తాను చేసిన అభివృద్ధి తెలుగు రాష్ట్రాల్లో కనిపిస్తోందని చెప్పుకొచ్చారు. అయితే.. అన్యాయంగా తన్ను అరెస్టు చేశారన్నారు. "ఇది నా బాధ, నా ఆవేదన, నా ఆక్రందన." అంటూ న్యాయమూర్తి ముందు తన బాధను వెల్లగక్కారు.

ఈ వయసులో తనకు ఇది పెద్ద శిక్ష అని చంద్రబాబు బాధపడ్డారు. తన మీద వచ్చినవి కేవలం ఆరోపణలు మాత్రమేని.. ఇంకా నిర్ధారణ కాలేదన్నారు. చట్టానికి అందరూ సమానమేనన్న చంద్రబాబు... చట్టాన్ని తాను గౌరవిస్తానని స్పష్టం చేశారు. ఇదిలా ఉండగా.. జైలులో సౌకర్యాల విషయంలో ఇబ్బందులు ఏమైనా ఉన్నాయా? అంటూ చంద్రబాబుని న్యాయమూర్తి అడిగి తెలుసుకున్నారు. సౌకర్యాలు అవసరమైతే దానికి అనుగుణంగా ఆదేశిస్తామని తెలిపారు.

చంద్రబాబు బాధ విన్న జడ్జి.. "మీరు పోలీసు కస్టడీలో లేరు.. జ్యుడిషియల్ కస్టడీలో ఉన్నారు" అని తెలిపారు. దీన్ని శిక్షగా భావించొద్దని స్పష్టం చేశారు. వచ్చినవి ఆరోపణలు మాత్రమేనని.. నిరూపణ జరగలేదన్న విషయాన్ని ఉద్ఘాటించారు. చట్టం, నిబంధనల ప్రకారమే రిమాండ్‌ విధించినట్టు జడ్జి పేర్కొన్నారు. 24 వరకు జ్యుడిషియల్‌ కస్టడీలోనే ఉంటారని స్పష్టం చేశారు. చట్టం ముందు అందరూ సమానమే అంటూ న్యాయమూర్తి చెప్పుకొచ్చారు. మరోవైపు.. చంద్రబాబు క్వాష్ పిటిషన్‌ను హైకోర్టు తోసిపుచ్చింది. సీఐడీ తరఫు లాయర్ల వాదనలతో ఏకీభవించిన హైకోర్టు.. పిటిషన్‌ను కొట్టివేసింది. ఏకవాక్యంతో చంద్రబాబు క్వాష్ పిటిషన్‌ను కొట్టివేస్తున్నట్లు ఉన్నత న్యాయస్థానం తీర్పు వెల్లడించింది. దీంతో రెండు న్యాయస్థానాల్లో చంద్రబాబుకు చుక్కెదురైనట్టయింది.