కెనడాలో రెచ్చిపోతున్న ఖలిస్థానీ వేర్పాటువాదులు

ఖలిస్థానీ మద్దతుదారుల గురించి ప్రస్తుతం భారత్ కెనడాల మధ్య దౌత్య పరమైన సంబంధాలు దెబ్బతిన్నాయి. ఈ నేపథ్యంలోనే కెనడాలో ఉన్న భారతీయులకు ముఖ్యంగా అందులోని హిందువులకు ఖలిస్థాన్ వేర్పాటు వాదులు హెచ్చరికలు, బెదిరింపులకు పాల్పడుతున్నారు. ఈ నేపథ్యంలోనే భారత్ ఖలిస్థానీ సానుభూతి పరులపై ఉక్కుపాదం మోపుతోంది. ఇప్పటికే ఉగ్రవాదులుగా గుర్తించిన వారితోపాటు దేశం దాటి భారత వ్యతిరేక కార్యకలాపాలకు పాల్పడుతున్న వారిని ఆర్థికంగా దెబ్బ కొట్టేందుకు చర్యలు చేపడుతోంది. ఇందులో భాగంగానే ఆ ఖలిస్థానీ మద్దతుదారులకు భారత్‌లో ఉన్న ఆస్తులను స్వాధీనం చేసుకుంటోంది.

ఈ ఏడాది జూన్‌లో కెనడాలో హత్యకు గురైన ఖలిస్థాన్ నేత హర్దీప్ సింగ్ నిజ్జర్ ఆస్తులను నేషనల్ ఇన్వెస్టిగేషన్ ఏజెన్సీ -ఎన్ఐఏ స్వాధీనం చేసుకుంది. పంజాబ్‌లోని జలంధర్‌ జిల్లాలో ఉన్న హర్దీప్ సింగ్ నిజ్జర్‌కు చెందిన ఆస్తులను సీజ్ చేసింది. జూన్ 18 వ తేదీన కెనడాలోని ఓ గురుద్వారాలో ఉండగా.. హర్దీప్ సింగ్ నిజ్జర్‌ను దుండగులు కాల్చి చంపారు. ఖలిస్థాన్ వేర్పాటు వాదం ఎజెండాగా భారత వ్యతిరేక కార్యకలాపాలకు పాల్పడుతున్న నిజ్జర్‌ను 2020 జులైలో కేంద్రం మోస్ట్ వాంటెడ్ ఉగ్రవాదిగా గుర్తించింది.

ఇక ఇటీవల కెనడాలో ఉన్న హిందువులను భారత్ వెళ్లిపోవాలని హెచ్చరించిన సిఖ్స్ ఫర్ జస్టిస్ నేత గుర్ పత్వంత్ సింగ్ పన్నుకు చెందిన ఆస్తులను కూడా ఎన్ఐఏ అటాచ్ చేసింది. పంజాబ్‌లోని చంఢీగఢ్‌లో ఉన్న గుర్ పత్వంత్ సింగ్ పన్ను ప్రాపర్టీని సీజ్ చేసినట్లు ఎన్ఐఏ ప్రకటించింది. భారత్ కెనడాల మధ్య తాజాగా తలెత్తిన దౌత్య పరమైన వివాదం నేపథ్యంలో యాంటీ టెర్రర్ ప్రోబ్ ఏజెన్సీ తాజాగా 43 మంది మోస్ట్ వాంటెడ్ క్రిమినల్స్ వివరాలను వెల్లడించింది. ఇందులో కెనడాలోని ఉగ్రవాదులు, గ్యాంగ్‌స్టర్లతోపాటు ఖలిస్థానీ ఉద్యమంతో సంబంధం ఉన్న వారి వివరాలను కూడా బహిర్గతం చేసింది.

ఈ 43 మందికి చెందిన ఆస్తులు ఎక్కడెక్కడ ఉన్నాయో వివరాలను చెప్పాలని ప్రజలకు విజ్ఞప్తి చేసింది. వాటిని కేంద్రం స్వాధీనం చేసుకుంటుందని ప్రకటించింది. ఈ 43 మంది క్రిమినల్స్‌లో లారెన్స్ బిష్ణోయ్, జస్‌దీప్ సింగ్, కాలా జతేరీ అలియాస్ సందీప్, వీరేందర్ ప్రతాప్ అలియాస్ కాలా రాణా, జోగిందర్ సింగ్ సహా వివిధ మోస్ట్ వాంటెడ్ క్రిమినల్స్ వివరాలు వెల్లడించింది. హర్దీప్ సింగ్ నిజ్జర్ హత్య వెనుక భారత ఏజెంట్ల ప్రమేయం ఉందని కెనడా ప్రధాని జస్టిన్ ట్రూడో ఆ దేశ పార్లమెంటులో చేసిన వ్యాఖ్యలు భారత్, కెనడా సంబంధాల మధ్య తీవ్ర ప్రభావాన్ని చూపాయి.