లైంగిక సమ్మతి వయసును తగ్గించొద్దు.. కేంద్రానికి లా కమిషన్ సూచన

దేశంలో లైంగిక సమ్మతి వయసు తగ్గించాలనే వాదనలు వెల్లువెత్తడం.. అదే స్థాయిలో తగ్గించవద్దనే విజ్ఞప్తులు వస్తున్న వేళ.. కేంద్ర ప్రభుత్వానికి లా కమిషన్ కీలక సూచనలు చేసింది. ప్రస్తుతం లైంగిక కార్యకలాపాలకు సమ్మతి తెలిపే వయసు 18 ఏళ్లు కాగా.. దాన్ని తగ్గించడం సరికాదని పేర్కొంది. ఈ లైంగిక సమ్మతి వయసును తగ్గించాలని దేశంలోని కొన్ని కోర్టులు సూచనలు చేసిన నేపథ్యంలో లా కమిషన్ దానికి వ్యతిరేకంగా తన నివేదికను సమర్పించడం ప్రస్తుతం తీవ్ర చర్చనీయాంశంగా మారింది. పోక్సో చట్టం ప్రకారం ప్రస్తుతం ఉన్న లైంగిక సమ్మతి వయసును మార్చడం అనేది అంత మంచి నిర్ణయం కాదని లా కమిషన్ తన అభిప్రాయాన్ని వ్యక్తం చేసింది. లైంగిక కార్యకలాపాలకు సమ్మతి తెలిపే వయసును తగ్గిస్తే తలెత్తే నష్టాలను కూడా వివరించింది.

పోక్సో చట్టం ప్రకారం 18 ఏళ్ల లోపు ఉన్న బాలబాలికలతో లైంగిక కార్యకలాపాలు చేయడం నేరం. అందుకు వారి అనుమతి ఉన్నా అది చట్ట విరుద్ధమే. అయితే 18 ఏళ్ల లోపు ఉన్న బాలబాలికలు లైంగిక కార్యకలాపాల్లో పాల్గొనేందుకు సమ్మతి తెలిపే విషయంలో దేశ వ్యాప్తంగా భిన్నాభిప్రాయాలు వ్యక్తమవుతున్నాయి. లైంగిక సమ్మతి వయసును 18 ఏళ్ల నుంచి 16 ఏళ్లకు తగ్గించాలనే వస్తున్న వాదనలను తీవ్రంగా వ్యతిరేకించింది. ఈ వయసును తగ్గించాలని దేశంలోని కొన్ని న్యాయస్థానాలు వివిధ కేసుల విచారణ సందర్భంగా కేంద్ర ప్రభుత్వానికి సూచించాయి. ఈ నేపథ్యంలోనే ఈ అంశంపై అధ్యయనం చేసిన లా కమిషన్‌.. తాజాగా కేంద్ర ప్రభుత్వానికి కీలక సూచనలు చేసింది.

పోక్సో చట్టం ప్రకారం ప్రస్తుతం ఉన్న లైంగిక సమ్మతి వయసును తగ్గించడం సరైంది కాదని.. ఒకవేళ అలా తగ్గిస్తే.. అది బాల్య వివాహాలు, పిల్లల అక్రమ రవాణాకు మరింత ఆజ్యం పోసినట్లు అవుతుందని పేర్కొంది. ఇలాంటి వాటికి వ్యతిరేకంగా ఏళ్లుగా జరుగుతున్న పోరాటాలకు విలువ లేకుండా పోతుందని అభిప్రాయపడింది. అయితే 16 నుంచి 18 ఏళ్ల బాల బాలికలు తమ ఇష్టపూర్వకంగానే లైంగిక కార్యకలాపాల్లో పాల్గొంటే.. అలాంటి కేసులను పరిష్కరించేందుకు పోక్సో చట్టంలో కొన్ని సవరణలు చేయవచ్చని లా కమిషన్‌ అభిప్రాయపడింది. ఆ కేసుల్లో శిక్షలు విధించేటప్పుడు కోర్టులు తమ విచక్షణ మేరకు తీర్పులు ఇవ్వాలని సూచించింది. అది ఆ వయసులో భావోద్వేగాలను నియంత్రించుకోలేక జరిగిందా లేక ఏదైనా క్రిమినల్‌ ఉద్దేశాలు ఉన్నాయా అని గుర్తించాలని పేర్కొంది. అలాంటి సమయంలో కోర్టులు అత్యంత అప్రమత్తంగా వ్యవహరించాలని లా కమిషన్‌ తన నివేదికలో వెల్లడించింది.