ఆ నేతను అరెస్టు చేయండి,,,, డీజీపీని కోరిన వాసిరెడ్డి పద్మ

మంత్రి ఆర్కే రోజాను ఉద్దేశించి జుగుప్సాకరంగా మాట్లాడిన బండారు సత్యనారాయణను అరెస్టు చేయాలని ఏపీ మహిళా కమిషన్ చైర్‌పర్సన్ వాసిరెడ్డి పద్మ.. డీజీపీని కోరారు. మాజీ మంత్రి, తెలుగుదేశం పార్టీ నేత బండారు సత్యనారాయణ.. సభ్య సమాజం తలదించుకునే మంత్రి రోజాపై వ్యాఖ్యలు చేశారని ఆమె మండిపడ్డారు. కఠిన చర్యలు తీసుకోవాలని డీజీపీ రాజేంద్రనాథ్ రెడ్డిని కోరారు. ‘మంత్రి హోదాలో ఉన్న మహిళకే ఇలాంటి పరిస్థితి ఉంటే, మామూలు మహిళల పరిస్థితి ఏంటి’ అంటూ దర్శకుడు రాంగోపాల్ వర్మ.. మహిళ ఛైర్‌పర్సన్ వాసిరెడ్డిని ట్యాగ్ చేస్తూ ట్వీట్ చేశారు. బండారు సత్యనారాయణ చేసిన వ్యాఖ్యలకు సంబంధించిన వీడియోను జత చేశారు. ఈ నేపథ్యంలో వాసిరెడ్డి పద్మ స్పందించారు.

శనివారం (సెప్టెంబర్ 30) డీజీపీ రాజేంద్రనాథ్ రెడ్డికి రాసిన లేఖలో బండారు సత్యనారాయణ మాట్లాడిన నీచమైన భాష జుగుప్సాకరంగా ఉందని వాసిరెడ్డి పద్మ పేర్కొన్నారు. ‘ఒక మంత్రిపై, రాజకీయాల్లో ఉన్న మహిళా నేతపై ప్రెస్ మీట్‌లు పెట్టి బండబూతులు మాట్లాడుతున్నారు. వీటిని ఎంతమాత్రం సహించరాదు. కేసు నమోదు చేసి తక్షణం అరెస్టు చేయాలి’ అని వాసిరెడ్డి పద్మ కోరారు. మంత్రి రోజాను ఉద్దేశించి బండారు సత్యనారాయణ చేసిన అనుచిత వ్యాఖ్యలపై మహిళా కమిషన్‌కు ఫిర్యాదులు అందాయని వాసిరెడ్డి పద్మ తెలిపారు. పలువురు మహిళా నేతలు, న్యాయవాదులు బండారుపై ఫిర్యాదు చేశారని వెల్లడించారు. బండారు లాంటి మహిళా వ్యతిరేకులకు తగిన గుణపాఠం చెప్పాలని, ఆయన వ్యాఖ్యలపై సీరియస్‌గా స్పందించాలని ఆమె అన్నారు. ఈ అంశాన్ని జాతీయ మహిళా కమిషన్ చైర్‌పర్సన్ దృష్టికి సైతం తీసుకెళ్లినట్లు వాసిరెడ్డి పద్మ తెలిపారు. నేషనల్ విమెన్ కమిషన్‌కు లేఖ రాసినట్లు తెలిపారు. మహిళా కమిషన్ సభ్యులు కె. జయశ్రీ, గజ్జల లక్ష్మి, గెడ్డం ఉమ, బూసి వినీత, రోఖయా బేగం సైతం బండారు సత్యనారాయణ వ్యాఖ్యలను ఖండించారు