పౌర హక్కుల నేతలే టార్గెట్‌గా,,,తెలుగు రాష్ట్రాల్లో ఎన్‌ఐఏ సోదాలు,,,ఏకకాలంలో 60కి పైగా చోట్ల తనిఖీలు

ఏపీ, తెలంగాణలో ఎన్‌ఐఏ సోదాలు కలకలం రేపుతున్నాయి. రెండు తెలుగు రాష్ట్రాల్లో 60కి పైగా ప్రాంతాల్లో ఏకకాలంలో ఈ సోదాలు జరుగుతున్నాయి. పౌరహక్కుల నేతలు, అమరబంధు మిత్రుల సంఘం నాయకుల ఇళ్లలో ఎన్‌ఐఏ అధికారులు ఇవాళ తెల్లవారుజూము నుంచే తనిఖీలు నిర్వహిస్తున్నారు. మావోయిస్టు సంఘాలతో సంబంధాల కేసులో ఈ సోదాలు చేస్తున్నాట్లు తెలుస్తోంది. హైదరాబాద్‌లో పౌర హక్కుల సంఘం మహిళా నేత భవాని, న్యాయవాది సురేశ్‌ ఇళ్లలో తనిఖీలు జరుగుతున్నాయి. వరంగల్‌ హంటర్‌ రోడ్డులో చైతన్య మహిళా మండలి సభ్యులు అనిత, శాంతమ్మ ఇళ్లల్లోనూ సోదాలు నిర్వహిస్తున్నారు.

నెల్లూరులోని పౌరహక్కుల నేత ఎల్లంకి వెంకటేశ్వర్లు ఇంట్లోనూ సోదాలు జరుగుతున్నాయి. ఉస్మాన్ సాహెబ్ పేటలోని వెంకటేశ్వర్లు నివాసంలో తనిఖీలు జరుగుతున్నాయి. రెండు దశాబ్దాలుగా అణగారిన వర్గాల పక్షాన నిలబడి పౌర హక్కుల ఉద్యమంలో ఎల్లంకి వెంకటేశ్వర్లు క్రియాశీలకంగా పనిచేస్తున్నారు. ఇక ప్రకాశం జిల్లా.. చీమకుర్తిలో పౌరహక్కుల నేత దుడ్డు వెంకట్రావు.. శ్రీకాకుళం జిల్లా పౌరహక్కుల నేత విస్కా కృష్ణయ్య నివాసంలోనూ ఎన్‌ఐఏ సోదాలు సాగుతున్నాయి. కృష్ణయ్య ఆమదాలవలస మండలం తోటవాడ ప్రభుత్వ పాఠశాలలో ఉపాధ్యాయుడిగా పనిచేస్తున్నారు. తిరుపతిలో క్రాంతి చైతన్య, గుంటూరులో డాక్టర్‌ రాజారావు ఇళ్లలో ఎన్‌ఐఏ అధికారులు తనిఖీ చేశారు. తిరుపతి జిల్లా చిల్లకూరు మండలంలో కుల నిర్మూలన పోరాట సమితి జిల్లా అధ్యక్షుడు కావలి బాలయ్య ఇంటిలో సోదాలు జరుగుతున్నాయి. గతంలో బాంబు పేలుళ్ల కేసులో బాలయ్య కుమార్తె పద్మ, అల్లుడు శేఖర్‌ నిందితులుగా ఉన్నారు.

గుంటూరు జిల్లా కొండపాటూరులో తమలపాకుల సుబ్బారావు, ప్రకాశం జిల్లా సంతమాగులూరులో ఓరు శ్రీనివాసరావు, రాజమహేంద్రవరంలోని బొమ్మేరులో పౌర హక్కుల నేత నాజర్‌, హార్లిక్స్‌ ఫ్యాక్టరీ ఉద్యోగి కోనాల లాజర్‌, అనంతపురంలో ఉపాధ్యాయుడు శ్రీరాములు ఇంట్లోనూ ఎన్‌ఐఏ అధికారులు సోదాలు నిర్వహించారు. విజయవాడలో విప్లవ రచయితల సంఘం నేత అరసవల్లి కృష్ణ ఇంట్లో సోదాలు చేపట్టింది. మావోయిస్టులకు సహకరించారన్న ఆరోపణలపై వీరి ఇళ్లలో సోదాలు చేపట్టారు.