సామాన్యుల కలల కారు మారుతి 800,,,రోల్స్ రాయిస్‌గా మార్చేసిన టీనేజర్

అవకాశాలుండాలే గానీ.. దేశంలో ప్రతిభకు కొదువేలేదు. ఒక్క అవకాశం ఇస్తే చాలు తామేంటో నిరూపించుకుంటారు. ఎలాంటి ప్రోత్సాహం లేకపోయిన తమ కళలతో ఎదుటివారిని కట్టిపడేస్తారు. తాజాగా, కేరళకు చెందిన ఓ యువకుడు.. తన ప్రతిభతో అద్భుతాన్ని చేశాడు. ఒకప్పుడు మారుతి 800 కారు మధ్యతరగతి ప్రజల వాహనంగా గుర్తింపు పొందింది. అందుబాటు ధర, సౌకర్యంగా ఉండటంతో చాలామంది దీనివైపే మొగ్గు చూపేవారు. టాప్ మోడల్ చూసుకున్నా రూ.6 లక్షలకు మించదు. కాగా, మారుతి 800 సామాన్యుడి కారు అయితే రోల్స్ రాయిస్ సంపన్నులది. దీని బేసిక్ మోడల్ కూడా కనీసం రూ.6 కోట్లక పైనే ఉంటుంది.

ఈ కారును చూడటమే తప్ప కొనాలనే ఆలోచన మధ్యతరగతి జనం కలలో కూడా రాదు. అలాంటింది కేరళ యువకుడు తమకున్న మారుతి 800 కారునే కష్టపడి రోల్స్ రాయిస్ కారులా మార్చేశాడు. కేవలం రూ.45 వేలు ఖర్చుచేసి.. కొత్త బాడీ సెటప్‌తో అచ్చంగా రోల్స్ రాయిస్ లా కనిపించేలా తీర్చిదిద్దుకున్నాడు. నెలల తరబడి కష్టపడి తన ప్రతిభను మారుతి 800ను రోల్స్ రాయిస్‌గా మార్చేసిన వీడియో ప్రస్తుతం సోషల్ మీడియాలో వైరల్ అవుతోంది. కేరళకు చెందిన పద్దెనిమిదేళ్ల హదీఫ్‌కు లగ్జరీ కార్లంటే చాలా ఇష్టం. అయితే వాటిని కొనుగోలు చేసే స్తోమత హదీఫ్ కుటుంబానికి లేదు. అలాగని నిరాశ చెందలేదు. తన మెదడుకు పదునుపెట్టి సాధారణ కారునే లగ్జరీ కారుగా మార్చుకోవాలని భావించాడు. నెలల తరబడి కష్టపడి పాత రోల్స్ రాయిస్ కార్ల విడిభాగాలు సేకరిస్తూ.. వెల్డింగ్ చేస్తూ మారుతి 800 కారును చివరకు తన కలల కారుగా మార్చేశాడు. మారుతి 800 ముందు భాగాన్ని పూర్తిగా తొలగించి దాని స్థానంలో రోల్స్ రాయిస్ డిజైన్‌లో ఉండే కొత్త ప్యానెల్‌ను అమర్చాడు. అదేవిధంగా వెనుక భాగం స్టీల్ షీట్‌లతో పొడిగించి బూట్ అచ్చం రోల్స్ రాయిస్‌లా ఉంటుంది.

మారుతి 800 ఇంటీరియర్‌ లోపల సెకండ్ హ్యాండ్ బీఎండబ్ల్యూ సోర్డ్స్ సీట్లును అమర్చాడు. మెటల్ షీట్లు, వెల్డింగ్ వర్క్, ఇతర విడి భాగాలతో తన కారును రూపొందించడానికి హదీఫ్ పరిమిత వనరులను ఉపయోగించాడు. కేవలం రూ. 45,000 పెట్టుబడితో అద్భుతం చేశాడు. ప్రస్తుతం ఆ కారులో దర్జాగా చక్కర్లు కొడుతూ చూసేవారిని ఆశ్చర్యపోయేలా చేస్తున్నాడు. ఈ వీడియోను తన యూట్యూబ్ ఛానెల్ లో పోస్ట్ చేయగా నెటిజన్లు ప్రశంసల వర్షం కురిపిస్తున్నారు. యూట్యూబ్ ఛానెల్ ‘ట్రిక్స్ ట్యూబ్’లో అప్‌లోడ్ చేసిన వీడియోలో హదీఫ్ కార్లపై తనకున్న మక్కువ గురించి.. గతంలో మోటార్‌సైకిల్ ఇంజన్‌ని ఉపయోగించి జీప్ తయారుచేసిన విధానం.. లగ్జరీ కార్ల ప్రతిరూపాలను ఎలా తయారు చేయాలనుకుంటున్నాడో వివరించాడు.