ఉద్యోగాల్లేక క్యాబ్ డ్రైవర్లు, హెల్పర్లుగా కెనడాలో భారతీయ విద్యార్థులు

ఖలీస్థానీ తీవ్రవాది నిజ్జర్ హత్య విషయంలో భారత్‌పై కెనడా ప్రధాని చేసిన ఆరోపణలతో ఇరు దేశాల మధ్య దౌత్య యుద్ధం తారాస్థాయికి చేరింది. ఈ నేపథ్యంలో కెనడాలోని భారతీయ విద్యార్థులు సరైన ఉద్యోగాలు దొరక్క తీవ్ర ఆందోళనలకు గురవుతున్నారు. గతేడాది 2,26,450 మంది భారతీయ విద్యార్థులు ఉన్నత విద్య కోసం కెనడాకు వెళ్లారు. అంతర్జాతీయ విద్యా సంబంధిత వేదిక ఎర్యుడెరా నివేదిక ప్రకారం.. కెనడాలో మొత్తం విదేశీ విద్యార్థుల సంఖ్య 807,750. వీరిలో 551,405 మందికి గతేడాది స్టడీ పెర్మిట్ వచ్చింది. వీరిలో దాదాపు సగం మంది భారతీయులు ఉన్నారు.

‘భారత్‌-కెనడాల మధ్య చోటుచేసుకున్న ఉద్రిక్తతల కంటే నా భవిష్యత్తు మీదే నాకు ఆందోళన నెలకొంది.. ఇక్కడ తీవ్రమైన ఉద్యోగాల కొరత నెలకొంది. నా ఉన్నత విద్య పూర్తయ్యేసరికి నాకు ఉద్యోగం దొరుకుతుందో లేదో తెలియడంలేదు’ అని ఓ భారతీయ విద్యార్థి ఆవేదన వ్యక్తం చేశాడు. టొరంటోలోని అనేక మంది భారత విద్యార్థులది ఇదే పరిస్థితి. ‘‘ఆరోగ్య సేవల విభాగంలో మెడికల్ డిగ్రీలు చేసిన పలువురు భారతీయ విద్యార్థుల దుర్భర పరిస్థితి నాకు తెలుసు.. వారికి మంచి వేతనాలు వచ్చే ఉద్యోగాలు దొరకడంలేదు. దీంతో అనేక మంది క్యాబ్‌లు నడుపుతూ, దుకాణాలు, రెస్టారెంట్లలో హెల్పర్లుగా పనిచేస్తూ తమ బిల్లులు కట్టుకుంటున్నారు.. ఇది మాకు చాలా క్లిష్టమైన పరిస్థితి’’ అని మయాంక్ అనే విద్యార్థి వాపోయాడు.

భారత్, కెనడా మధ్య దౌత్యపరమైన ప్రతిష్టంభన తర్వాత తాను, తన స్నేహితులు ఎటువంటి ఇబ్బందులు ఎదుర్కోనప్పటికీ.. తమ చదువు పూర్తి చేసిన తర్వాత ఉద్యోగం దొరకదనే ఆలోచనతో నిద్రలేని రాత్రులు గడుస్తున్నాయని అతడు చెప్పాడు. దీనికి తోడు టొరంటో, చుట్టుపక్కల నగరాల్లో ఉండే అత్యధిక జీవన వ్యయ పరిస్థితులు విద్యార్థులకు మూలిగే నక్కపై తాటిపండు పడ్డ చందంగా మారాయి. దీంతో ఎక్కువ మంది నెలవారీ ఇంటి అద్దెలు, ఇతర ఖర్చులు తగ్గించుకునేందుకు ఇరుకైన గదుల్లో కాలం గడుపుతున్నారు.

‘ఇక్కడ చదువు పూర్తయిన తర్వాత మేము మంచి జీతంతో కూడిన ఉద్యోగాలు పొంది.. భారత్‌లోని మా తల్లిదండ్రులు, కుటుంబాలకు అండగా నిలబడతామనే ఆశతో వచ్చాం... కానీ ఉద్యోగాలు లేవు.. జీవన వ్యయం, ఆరోగ్య సంరక్షణ ఇబ్బందిగా మారింతి.. మేము అవసరాలను తీర్చుకోవడానికి కష్టపడుతున్నాం’ అని హరియాణాకు చెందిన మరో విద్యార్థి అన్నారు.

 విద్య రంగంలో మార్కెట్ ఇంటెలిజెన్స్ వనరు ICEF Monitor ప్రకారం.. గతేడాది డిసెంబరు నాటికి 3,20,000 మంది భారతీయ విద్యార్థులకు యాక్టివ్ స్టడీ పెర్మిట్ పొందారు. ఇది అంతకు ముందు సంవత్సరంతో పోల్చితే 47 శాతం అధికం. కెనడాలోని ప్రతి పది విదేశీ విద్యార్థుల్లో దాదాపు నలుగురు భారతీయులు ఉన్నారని ఐసీఈఎఫ్ తెలిపింది. భారతీయ విద్యార్థుల రాళ్లు మధ్య ఇరుక్కుపోయినట్టు ఉన్నాయని వివరించింది. ఉన్నత చదువుల కోసం విదేశాలకు పంపడానికి భారత్‌లోని తమ కుటుంబాలు, తల్లిదండ్రులు అనేక కష్టాల పడుతున్నారని పేర్కొంది. ‘కెనడాలో తమ పిల్లల ఉన్నత చదువుల కోసం తల్లిదండ్రులు ఆస్తులు, భూమిని విక్రయించడం.. భారీ రుణాలు తీసుకోవడం వంటివి చేస్తున్నారు’ అని వ్యాఖ్యానించింది.